نەسيەسىن 90 كۇن تولەي الماعاندارعا تۇتىنۋشى كرەديتىن بەرۋگە تىيىم سالىنباق

ەل تۇرعىندارىنىڭ قارجى ۇيىمدارىنىڭ الدىنداعى بەرەشەگى 19 ترلن تەڭگەگە جەتتى. بۇل تۋرالى ءماجىلىستىڭ جالپى وتىرىسىندا دەپۋتات ءۇنزيلا شاپاق ايتتى.

«مەملەكەت باسشىسى 2023 جىلعى 1 قىركۇيەكتەگى جولداۋىندا حالىقتىڭ شامادان تىس كرەديت الۋىن ازايتۋ جونىندە شارالار قابىلداۋدى تاپسىردى. مەملەكەت باسشىسىنىڭ تاپسىرماسىن ىسكە اسىرۋ اياسىندا 2023 جىلعى 20 قازاندا مەملەكەتتىك ورگانداردىڭ, قارجى ۇيىمدارىنىڭ, تاۋەلسىز ساراپشىلار مەن قوعام بەلسەندىلەرىنىڭ قاتىسۋىمەن حالىقتىڭ شامادان تىس كرەديت الۋى ماسەلەلەرى بويىنشا پارلامەنتتىك تىڭداۋ ءوتتى. 2024 جىلعى 1 قاڭتارداعى جاعداي بويىنشا 8,5 ميلليون قازاقستاندىقتىڭ قارجى ۇيىمدارىنىڭ الدىندا 19 ترلن تەڭگە سوماسىنا بەرەشەگى بار. ونىڭ ىشىندە 8,2 ميلليون ازاماتتىڭ كەپىلسىز تۇتىنۋشىلىق كرەديتتەر بويىنشا بەرەشەگى 10 ترلن تەڭگەنى قۇرايدى. بۇل رەتتە 1,6 ملن ازاماتتىڭ 1,7 ترلن تەڭگەگە 90 كۇننەن ارتىق مەرزىمى وتكەن پروبلەمالىق كرەديتتەرى بار», — دەدى دەپۋتات.
ءۇنزيلا شاپاقتىڭ اتاپ وتۋىنشە, پارلامەنتتىك تىڭداۋدىڭ قورىتىندىسى بويىنشا جۇيەلى ۇسىنىمدار كەشەنى ازىرلەندى.

ونىڭ نەگىزىندە ءماجىلىس دەپۋتاتتارى «كەيبىر زاڭنامالىق اكتىلەرگە كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەدى.

«پروبلەمالىق قارىزدارى بار ازاماتتاردىڭ قارىز جۇكتەمەسىنىڭ وسۋىنە جول بەرمەۋ ءۇشىن كرەديتتەر بويىنشا تولەم مەرزىمىن كەشىكتىرۋ 90 كۇننەن اسقان جاعدايدا ولارعا كەپىلسىز تۇتىنۋشىلىق كرەديتتەر بەرۋگە تىيىم سالۋ جونىندە نورما ەنگىزىلەدى. بۇدان باسقا, بانكتەر مەن ميكروقارجى ۇيىمدارى ءۇشىن بارلىق قولدانىستاعى (وتەلمەگەن) تۇتىنۋشىلىق كرەديتتەر بويىنشا تولەم مەرزىمىن كەشىكتىرۋ 90 كۇننەن اسقان سوڭ سىياقى ەسەپتەۋگە تىيىم سالىنادى», — دەدى ول.