جاڭالىقتار
نۇرلان ەرمەكباەۆ شىۇ-نىڭ باس حاتشىسى بولىپ تاعايىندالدى
قازاقستاننىڭ وكىلى نۇرلان ەرمەكباەۆ شانحاي ىنتىماقتاستىق ۇيىمىنىڭ 2025-2027 جىلدارداعى باس حاتشىسى بولىپ تاعايىندالدى, دەپ حابارلايدى BAQ.KZ ءتىلشىسى.
ەرمەكباەۆتى تاعايىنداۋ تۋرالى شەشىم استانادا وتكەن شىۇ سامميتىندە قابىلداندى.
ول 2022 جىلعى 1 قاڭتاردان باستاپ شىۇ باس حاتشىسى قىزمەتىن اتقارىپ كەلگەن قىتاي وكىلى چجان ءميندى اۋىستىرىپ, ۇيىمدى 2025 جىلعى 1 قاڭتاردان باستاپ باسقارادى.
نۇرلان ەرمەكباەۆ 1963 جىلعى 1 قاڭتاردا شىمكەنتتە تۋعان.
1986 جىلى كسرو قورعانىس مينيسترلىگىنىڭ اسكەري قىزىل تۋ ينستيتۋتىن قىتاي جانە اعىلشىن تىلدەرىن مەڭگەرگەن وفيتسەر ماماندىعى بويىنشا ۇزدىك بىتىرگەن.
1996 جىلى قازاق ساۋلەت جانە قۇرىلىس اكادەمياسىن ينجەنەر-ەكونوميست ماماندىعى بويىنشا تامامداعان. ءتۇرلى جىلدارى كوممەرتسيالىق كاسىپورىنداردا, سىرتقى ىستەر مينيسترلىگى قۇرىلىمىندا, قر پرەزيدەنتىنىڭ اكىمشىلىگىندە قىزمەت ەتكەن.
نۇرلان ەرمەكباەۆ قر پرەزيدەنتىنىڭ كەڭەسشىسى — قر پرەزيدەنتىنىڭ اكىمشىلىگى سىرتقى ساياسات ورتالىعىنىڭ مەڭگەرۋشىسى (2006–2007 جج.),
سىرتقى ىستەر ءمينيسترىنىڭ ورىنباسارى (2007–2010),
قر پرەزيدەنتىنىڭ كومەكشىسى (2010–2012 جج.),
قر قىتاي حالىق رەسپۋبليكاسىنداعى توتەنشە جانە وكىلەتتى ەلشىسى,
ۆەتنام سوتسياليستىك رەسپۋبليكاسىنداعى جانە كورەيا حالىق دەموكراتيالىق رەسپۋبليكاسىنداعى توتەنشە جانە وكىلەتتى ەلشىسى قىزمەتىن قوسا اتقارۋشى (2012–2014),
قر پرەزيدەنتىنىڭ كومەكشىسى — قر قاۋىپسىزدىك كەڭەسىنىڭ حاتشىسى (2014–2016),
قر ءدىن ىستەرى جانە ازاماتتىق قوعام ءمينيسترى (2016 ج.– 2018 ج. ساۋىرگە دەيىن).
2018 جىلعى ساۋىردەن باستاپ 2018 ج. تامىزعا دەيىن قر پرەزيدەنتىنىڭ كومەكشىسى — قر قاۋىپسىزدىك كەڭەسىنىڭ حاتشىسى لاۋازىمىن اتقاردى.
2018-2021 جىلدارى — قر قورعانىس ءمينيسترى.
2019 جىلدىڭ ناۋرىز ايىنشا مەملەكەت باسشىسىنىڭ جارلىعىمەن گەنەرال-مايور اسكەري اتاعى بەرىلدى.
