نۇرلان يمام ترامپ وتكىزگەن قايىرىمدىلىق اسقا قاتىستى

نۇرلان يمام دەگەن اتپەن تانىمال نۇرلان بايجىگىت ۇلى اقش استاناسى ۆاشينگتوندا وتكەن اق ءۇيدىڭ قايىرىمدىلىق تاڭعى اسىنا قاتىسقان, دەپ جازدى qandastar.kz

ۆاشينگتوندا وتكەن ءىس-شاراعا 2500 ادام جينالعان. سونداي-اق, قايىرىمدىلىق تاڭعى اسىندا اقش-تىڭ پرەزيدەنتى دونالد ترامپ ءسوز سويلەگەن.

«امەريكا قۇراما شتاتىنىڭ 45-ءشى جانە 47-ءشى پرەزيدەنتى دونالد ترامپ مىرزا قايىرىمدىلىق شارادا ءسوز سويلەدى. ەڭ ىلەرى: «قۇدايىم مەنى اتقان ادامعا ولتىرتپەي, سىزدەردىڭ الدارىڭىزعا شىعارۋى, بۇل — ەلىم ءۇشىن سىي ءارى مەنىڭ كوپ دۇنيەلەردى جاقسى جاعىنا وزگەرتۋىمە سەبەپ» دەپ ايتقانى. بۇل ءسوزىن ۆاشينگتوندا تاپ مەنىڭ الدىمدا ايتقانى ماعان ۇلكەن اسەر بەردى. وتىرعان ورنىم دا تۋرا الدىنا تۇسكەن ەكەن. قاسىمدا ارمەنيا, كوسوۆو, ۋكراينا جانە ت.ب. مەملەكەت پرەزيدەنتتەرى وتىردى. تۇيگەنىم: ەلىمىزدىڭ ءاربىر ازاماتى اماناتتى سەزىنىپ, ىسىنە ادال, جۇرەگى تازا, وتانىن شىنايى ءسۇيىپ قىزمەت ەتسە, ءبىزدىڭ دە العا باسار قادامدارىمىز قارىشتايتىنىنا سەنىمىم مول اعايىندار…» — دەدى ول.

ايتا كەتەيىك, نۇرلان يمام — استاناداعى «ىرىسكەلدى قاجى» مەشىتىنىڭ باس يمامى. ول كەيىنگى بىرنەشە جىلدان بەرى الەۋمەتتىك جەلىلەر ارقىلى حالىققا جاقسى تانىس.