Nurlan О́nerbaev: Qazaq tili áli bosaǵadan syǵalap júr

«QASQA JOL» ıýtýb baǵdarlamasynyń bul aptadaǵy qonaǵy ánshi, Qazaqstannyń eńbek sińirgen qaıratkeri Nurlan О́nerbaev qazaq ónerindegi artyqshylyqtar men kemshin tustardy, qazaq tiliniń bolashaǵy jaıly, sondaı-aq aǵamyzdyń jeke ómiri jóninde sóz qozǵady, dep habarlaıdy qandastar.kz

«El bolyp egemendik alǵaly, týymyzdy kókke kótergeli tilimiz táýelsizdik ala almaı qoıdy. Áli de sol tilimiz bosaǵada júr. Biz óner adamy bolǵandyqtan, sahnada tól mádenıetimizdi ózimizdiń ana tilimizde jetkizgimiz keledi. Al eger tilimiz osy múshkil kúıinde ári qaraı keri kete beretin bolsa, erteń seni ana tilińde sóılep turǵan sóziń, ániń, jyryń kimge kerek bolady? Bul óte ózekti másele. Men ózim júrgen jerimde tilimizdi dáriptep júremin», — dedi óner ıesi.

Sondaı-aq, Nurlan О́nerbaev kóshede balasymen orys tilinde sóılesetin ata-analarǵa jıirkenishpen qaraıtynyn jasyrmady.

«О́zimizdiń qazaq azamattary balasymen shúldirlep basqa tilde sóılep jatqandary janyma batady. О́te jıirkenishti jaǵdaı. О́zimiz qazaqtyń balasy bola tura, týǵannan boıymyzǵa ananyń sútimen qazaqtyń tili damysa da ózge tildi qup kórip turamyz. О́z urpaǵyńa óz ana tilińde sóıleı almaý degen, birinshiden óz ata-anańdy tárk etý, óz bolmysyńdy tár etý jáne óz ultyńdy tárk etý, ıaǵnı bárin joqqa shyǵarý degen sóz. Men endi ondaı adamdarǵa alǵashqy kezde eskertý de jasap kórdim, mundaı kezde jurttar óte ashýlanyp, agressııa tanytady. Sol sebepti qazirgi kezde eshkimge eskertý jasap, aıtpaıtyn da boldym. Bılik qalasa bárin bir kúnde qazaqsha saıratar edi. Negizinen qazaq tilin memlekettik rámizder qataryna qosylsa degen tilegim bar. Sonda tilimiz zańmen qorǵalatyn bolady», — dep qorytyndylady ol.