الەم جاڭالىقتارىجاڭالىقتار
نىساندار ءالى جوندەۋدەن ءوتىپ جاتىر: كوشپەندىلەر ويىنىنا قازاقستاننىڭ دايىندىعى قالاي?
فوتو: ەگەمەن قازاقستان
بيىل كۇزدە, ناقتىراق ايتساق, 8-12 قىركۇيەك ارالىعىندا استانادا V دۇنيەجۇزىلىك كوشپەندىلەر ويىندارى وتپەك. ايتۋلى دوداعا 89 ەلدەن 2 مىڭنان اسا ويىنشى كەلىپ, سپورتتىڭ 21 تۇرىنەن باق سىنايدى. ونىڭ اراسىندا كارى قۇرلىق ەلدەرى دە بار. بۇعان قوسا جارىسقا 100 مىڭنان استام تۋريست كەلەدى دەپ كۇتىلۋدە. وسى ورايدا جارىس الدىندا ەلوردادا قانداي دايىندىقتار جاسالىپ جاتقانىن qandastar.kz شولىپ كوردى.
قارجى ۇنەمدەلىپ جۇمسالادى
قازىر اتالعان دودانىڭ جالپى وپەراتسيالىق بيۋدجەتى 5,7 ملرد تەڭگەنى قۇراپ وتىر. نەگىزى اۋەلدە كوزدەلگەن قارجى 7 ملرد-تان اساتىن. الايدا كوكتەمدەگى سۋ تاسقىنىنان كەيىن پرەزيدەنت كوشپەندىلەر ويىنىنا بولىنەتىن اقشانى ازايتۋدى تاپسىردى. ايتسە دە بۇل قارجىنىڭ ءوزى ازدىق ەتپەيدى, ۇيىمداستىرۋشىلار ۇنەمدەپ بولسا دا جارىستى جوعارى دەڭگەيدە وتكىزۋگە بولاتىنىن ۇعىنعان.
ەگەر سالىستىرىپ قاراساق, ويىندى وتكىزۋگە بولىنگەن 5,7 ملرد تەڭگە قاراجات 2011 جىلى الماتىدا وتكەن جەتىنشى قىسقى ازيا ويىندارىنىڭ بيۋدجەتىنەن 20 ەسە از. ول كەزدە جارىس ءۇشىن جۇزدەگەن ملرد شىعىندالعان بولاتىن. 2017 جىلى الماتىدا وتكەن ۋنيۆەرسيادانىڭ بيۋدجەتى دە قازىرگىدەن 5 ەسە كوپ بولدى. ايتپاقشى, بۇل تۇستا اتالعان سوماعا قارجىلىق سەرىكتەستەر مەن دەمەۋشىلەر اقشا قوسادى. جالپى العاندا, وپەراتسيالىق بيۋدجەت شامامەن 8 ملرد تەڭگەگە جۋىقتاماق.
بىرنەشە نىساندا قۇرىلىس جۇرۋدە
قازىر استانالىقتار جارىس الدىندا قانداي دايىندىق ءجۇرىپ جاتقانىنان حابارسىز. قۇددى ەشتەڭە اتقارىلماي تۇرعان ىسپەتتى كورىنەدى. الايدا V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسىنىڭ باسشىسى نايل نۇروۆتىڭ ايتۋىنشا, قولعا الىنعان ىستەر كوپ. ديرەكتسيا باسشىسى كوشپەندىلەر ويىندارى وتەتىن سپورت نىساندارىنا جوندەۋ جۇمىستارى قالاي جۇرگىزىلىپ جاتقانىن ءتىزىپ بەردى.
– استاناداعى «قازانات» يپپودرومىنداعى جۇگىرۋگە ارنالعان جولدىڭ ۇزىندىعى 12 مەترگە, ەنى 7 مەترگە كەڭەيە ءتۇستى. سونىمەن قاتار يپپودرومدا جىلقىلاردى دياگنوستيكالاۋ جانە قالپىنا كەلتىرۋ بويىنشا جاڭا زەرتحانا اشىلادى.
ودان بولەك, «الاۋ» مۇز سارايى جاڭارىپ, كوشپەندىلەر ويىندارىنىڭ ارقاسىندا جاڭا كەلبەتكە يە بولادى. جارىستان كەيىن مۇز سارايى ادەتتەگى جۇمىس رەجيمىنە ورالىپ, كونكيشىلەردى قۋانتادى. «استانا-ارەنا» فۋتبول ستاديونى دا جاڭارتىلىپ جاتىر, ياعني, ىشكى ينفراقۇرىلىمى, تريبۋنالار مەن فۋتبول الاڭى اۋىستىرىلادى, – دەيدى ول.
يۋنيسەف دۇنيەجۇزىلىك كوشپەلىلەر ويىندارىنىڭ كوممەرتسيالىق ەمەس رەسمي سەرىكتەسى اتانسا, ايتۋلى الاماننىڭ باس دەمەۋشىسى بولىپ «Alageum Electric» كومپانيالار توبى تانىلدى. ەلوردا ءتورىن اپتا بويى ۇلى دۇبىرگە بولەيتىن ماڭىزدى ءىس-شارا ءۇش باعىت بويىنشا ءوربيدى: سپورت, مادەنيەت جانە عىلىم. «قازانات» اتشابارى مەن ەتنواۋىل اۋماعىندا ات بايگەسى, ءداستۇرلى ساداق اتۋ جانە قۇس سالۋ تۇرلەرىنەن, ات ۇستىندەگى سايىستار بويىنشا جارىستار وتكىزىلەدى. ج.ۇشكەمپىروۆ اتىنداعى جەكپە-جەك سارايى مەن «الاۋ» مۇز سارايىندا ۇلتتىق كۇرەس تۇرلەرىنەن, جەكپە-جەك تۇرلەرىنەن جانە حالىق ويىندارىنان دودا وتەدى.
«دۋمان» كەشەنىندە ءداستۇرلى زياتكەرلىك ويىندار بويىنشا جارىستار وتكىزىلەدى. «Qazaqstan» جەڭىل اتلەتيكا سپورت كەشەنىندە كوشپەلىلەر ويىندارىنا اككرەديتتەۋ جانە جابدىقتاۋ ورتالىقتارى ورنالاسادى. «قازانات» اتشابارىنىڭ وڭتۇستىك-باتىس جاعىنداعى ىرگەلەس قونىس تەبەتىن «كوشپەلىلەر عالامى» ەتنو اۋىلى دكو مادەني باعدارلاماسىنىڭ وشاعىنا اينالماق. مادەني باعدارلاما استانا قالاسىنىڭ ءارتۇرلى نىساندارىندا (الاڭداردا, ساياباقتاردا, باسقا دا قوعامدىق ورىنداردا, تەاترلاردا, كونتسەرت زالدارىندا, كينوتەاترلاردا, مۇراجايلاردا, كورمە پاۆيلوندارىندا) وتەدى.
ءار ءوڭىر بەس كيىز ۇيدەن تىگەدى
كوشپەلىلەر ويىنى كەزىندە ستۋدەنتتەر قالىپتى رەجيممەن وقي بەرەدى. ياعني, ايتارلىقتاي وزگەرىس جوق. سونداي-اق استانا اكىمدىگى جارىسقا قاتىسۋشىلاردى تاسۋعا 100 اۆتوبۋس بولىنگەنىن حابارلاعان. جالپى 343 كولىك پەن سپورتشىلاردىڭ تىنىعۋىنا 20 قوناق ءۇي قاراستىرىلعان. قازىر قوسىمشا 100 نەمەسە 200 اۆتوبۋس كورەرمەندەردى تاسىمالداۋعا قارالىپ جاتىر. اۆتوبۋستار مەن كوشە بويلارى ۇلتتىق ناقىشقا ساي بەزەندىرىلەدى. بۇعان قوسا ءار ءوڭىر 5 كيىز ۇيدەن تىكپەك.
ويىندارعا بيلەتتەردى رەسمي بيلەت وپەراتورىنىڭ سايتىنان ساتىپ الۋعا بولاتىنى حابارلاندى. جالپى بيلەت قۇنى – 500-25 000 تەڭگە ارالىعىندا بولماق. كوشپەلىلەر ويىندارىنىڭ اشىلۋ سالتاناتىن تاماشالايمىن دەگەن كورەرمەن بيلەتتى 15 000-نان باستاپ 50 000 تەڭگەگە دەيىن ساتىپ الادى. ەرەسەكتەرگە ارنالعان بيلەتتىڭ ورتاشا قۇنى – 4 000 تەڭگە. كورەرمەندەردىڭ جەكەلەگەن ساناتتارى ءۇشىن جەڭىلدىك بار. مىسالى, التى جاسقا دەيىنگى بالالار كەز كەلگەن ويىن ءتۇرىن تەگىن تاماشالاي الادى. 6-18 جاس ارالىعىنداعى بالالار مەن جاسوسپىرىمدەر ءۇشىن 50 پايىزدىق جەڭىلدىك جاسالادى. «تەڭگە ءىلۋ» مەن «قۇسبەگىلىك» جارىستارىنا بيلەت قۇنى 500 تەڭگە بولسا, مەكتەپ وقۋشىلارى ءۇشىن بيلەت بار بولعانى 250 تەڭگە.
ەرىكتىلەردى ىرىكتەۋ جۇمىسى جۇرگىزىلىپ, تاڭداۋ تۇسكەن جاستار دا ازىرلىكتى باستاۋدا. دۇنيەجۇزىلىك كوشپەلىلەر ويىندارىن دايىنداۋ جانە وتكىزۋ ديرەكتسياسىنىڭ ورىنباسارى ابىلاي قوندىباەۆتىڭ سوزىنشە, ەرىكتىلەردى ىرىكتەۋ بىرنەشە كەزەڭمەن وتكەن. ءتىپتى كورشىلەس قىرعىزستان, رەسەي, وزبەكستان, تۇرىكمەنستان ەلدەرىنەن عانا ەمەس, اقش, تۇركيا, گەرمانيا, فرانتسيا, يسپانيا, كورەيا, بەلارۋس جانە گانادان دا ەرىكتى بولۋعا ىنتالى جاستار ءوتىنىش جولداعان. ىرىكتەۋدىڭ ءبىرىنشى كەزەڭىندە 4 600 ءوتىنىم قابىلدانعان. ۇيىمداستىرۋشىلار ناۋرىز-ءساۋىر ايىندا وتكەن ەكىنشى كەزەڭدە ءاربىر ۇمىتكەرمەن ديدارلاسىپ, وزگە ءتىلدى قانشالىقتى يگەرگەنىن بايقاعان. وسىنداي سۇرىپتاۋدىڭ ناتيجەسىندە ىرىكتەلگەن 1 300 ەرىكتىگە تاڭداۋ ءتۇسىپتى. وزگە ءتىلدى بىلۋدە اعىلشىنشا ءھام تۇرىكشە ەركىن سويلەپ, ويىن جەتكىزە الاتىندارعا باسا نازار اۋدارىلعان.
جالپى, دۇنيەجۇزىلىك كوشپەلىلەر ويىندارىندا 97 مەدال جيىنتىعى ساراپقا سالىنباق. مەدالدىڭ جالپى سانى – 581. مەدالدا سپورت, مادەنيەت, عىلىم سالالارىن قامتيتىن نەگىزگى 3 سيمۆول بەدەرلەنگەن. وسىنىڭ بارلىعىن شاڭىراق كومكەرىپ تۇر. مەدالدىڭ ورتاسىندا كوشپەلىلەر وركەنيەتىنىڭ بەلگىسى – ات ۇستىندەگى كۇن باستى ادامنىڭ تاڭباسى بار.
م.سنادين
