ءبىلىم
نزم-داعى شۋ: مينيسترلىك مۇعالىمدى بالاعاتتاعان جاعدايعا قاتىستى مالىمدەمە جاسادى
فوتو: نيش
وقۋ-اعارتۋ مينيسترلىگىنىڭ رەسمي وكىلى مەرەكە امانگەلدىقىزى نازارباەۆ زياتكەرلىك مەكتەبىندەگى جاعدايعا بايلانىستى رەسمي مالىمدەمە جاسادى, دەپ حابارلايدى qandastar.kz
ۆەدومستۆونىڭ رەسمي وكىلى اتاعانداي, ءبىزدىڭ ەلىمىزدە ۇستازدىڭ مارتەبەسى زاڭمەن بەكىتىلگەن, بۇل – ونىڭ قوعامداعى ورنى ەرەكشە ەكەنىن بىلدىرەدى. ۇستاز – بالا تاربيەلەپ, ۇرپاققا جول كورسەتەتىن ارداقتى جان. سوندىقتان اتا-انا مەن وقۋشى تاراپىنان مۇعالىمگە قۇرمەتپەن قاراۋ – ەڭ الدىمەن ادامگەرشىلىكتىڭ بەلگىسى. بىلىمگە سەنىم – سول ءبىلىمدى بەرىپ وتىرعان ۇستازعا سەنۋدەن باستالادى. مۇعالىمنىڭ ابىرويىنا كۇمان كەلتىرۋ – بۇكىل جۇيەنىڭ بەدەلىن تۇسىرۋمەن بىردەي.
وسى رەتتە وقۋ-اعارتۋ مينيسترلىگى پەداگوگتىڭ قادىر-قاسيەتىن تومەندەتەتىن كەز كەلگەن ارەكەتكە قاتاڭ سىن كوزقاراسپەن قارايدى. سونىمەن قاتار بۇل وقيعادا وقۋشى ءوز قاتەلىگىن ءتۇسىنىپ, وكىنىش ءبىلدىرىپ وتىر. ەندى نزم بۇل جاعدايدى تەك ىشكى تارتىپپەن عانا ەمەس, سونداي-اق ادامگەرشىلىك, كەشىرىمدىلىك پەن ناعىز ۇستازدىق ۇستانىمدارعا سۇيەنە وتىرىپ شەشەدى دەپ ۇمىتتەنەمىز, — دەدى مەرەكە امانگەلدىقىزى.
BAQ.KZ ءتىلشىسى جازعانداي, وقۋ-اعارتۋ ءمينيسترى عاني بەيسەمباەۆ بۇل ماسەلەگە ءوزى ءجىتى نازار اۋدارىپ, ءتيىستى تاپسىرمالار بەردى. ءمينيستردىڭ نۇسقاۋىنا سايكەس, اتالعان ماسەلەمەن بالالاردىڭ قۇقىقتارىن قورعاۋ كوميتەتىنىڭ جانە ايماقتىق دەپارتامەنتتىڭ وكىلدەرى اينالىسادى.
مينيستر «نزم» باسقارما توراعاسى انۋار جانعوزينمەن سويلەستى. باسقارما توراعاسى ماسەلەنى جەكە قولعا العاندىعىن, جاعدايدى جان-جاقتى قاراپ, نە بولعانىن ءادىل باعالاپ, دۇرىس شەشىم قابىلدايتىنىنا سەندىردى, — دەپ قوستى ۆەدومستۆو وكىلى.
