ءبىلىم
نزم توراعاسى دەپۋتاتتىڭ مالىمدەمەسىنە قاتىستى پىكىر ءبىلدىردى
فوتو: Sputnik
«نازارباەۆ زياتكەرلىك مەكتەپتەرى» دببۇ باسقارما توراعاسى ءانۋار جانعوزين قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ماگەررام ماگەرراموۆتىڭ مالىمدەمەسىنە قاتىستى پىكىر ءبىلدىردى, دەپ جازادى qandastar.kz
– كەشە ءماجىلىس دەپۋتاتى نازارباەۆ زياتكەرلىك مەكتەپتەرىن قارجىلاندىرۋعا قاتىستى تاعى ءبىر مالىمدەمە جاسادى. ماگەررام ماگەرراموۆتىڭ ايتۋىنشا, 2011-2024 جىلدار ارالىعىندا نازارباەۆ زياتكەرلىك مەكتەپتەرىنىڭ ءبىر وقۋشىسىنا جىل سايىن 27 ميلليون تەڭگە بولىنگەن. بۇل دەرەكتىڭ ناقتى قايدان الىنعانى بەلگىسىز, بىراق بۇل مۇلدەم شىندىققا جاناسپايدى جانە قوعامدى جاڭىلىستىرۋدا.
2024 جىلى NIS-تە وقۋعا ارنالعان ءبىلىم گرانتىنىڭ سوماسى 2 349 191 تەڭگەنى قۇرايدى. وتكەن جىلدارى بۇل كورسەتكىش بۇدان دا تومەن بولدى. گرانت بويىنشا شىعىستار قاتاڭ رەتتەلەدى جانە وعان مەكتەپ قىزمەتكەرلەرىنىڭ جالاقىسى, وقۋشىلاردىڭ تاماقتانۋى جانە كوممۋنالدىق شىعىندار كىرەدى. زياتكەرلىك مەكتەپتەردى قارجىلاندىرۋ كولەمى جىل سايىن ورتالىق مەملەكەتتىك ورگاندار جانە ءماجىلىس دەپۋتاتتارى تاراپىنان ماقۇلدانىپ, رەسپۋبليكالىق بيۋدجەت اياسىندا بەكىتىلەدى. سونىمەن قاتار ءبىز ۇيىمنىڭ قىزمەتى تۋرالى سەنىمدى ءارى تولىق اقپارات بەرۋگە ارقاشان دايىنبىز.
جالپى مەكتەپتەردىڭ قارجىلاندىرۋ كولەمىن وڭىرلەردىڭ بيۋدجەتىمەن سالىستىرۋ مەندە ۇلكەن سۇراق تۋعىزادى. بۇل مۇلدەم دۇرىس ەمەس, ويتكەنى ول سالىستىرۋعا, ءبىر-بىرىنە پارا-پار كەلمەيتىن جاعدايلارعا نەگىزدەلىپ ولشەنەدى.
سونىمەن قاتار جاقىندا مىناداي دەرەككە تاپ بولدىم, ەگەر ءبىلىم ۇياسىنىڭ قىزمەتىن باسقا دۇنيەلەرمەن سالىستىرۋ قيسىنسىز بولسا, كەم دەگەندە سالىستىرۋ بارىسىندا مىنانى ەستە ساقتاۋ كەرەك. ماسەلەن, ءبىر زياتكەرلىك مەكتەپ وقۋشىسىن قارجىلاندىرۋ 2,3 ملن. تەڭگەنى قۇراسا, وندا ءبىر تۇتقىندى قارجىلاندىرۋعا 2,7 ملن. تەڭگە بولىنەدى (دەرەككوزگە سىلتەمە پىكىردە).
«مەكتەپتەردەن اقشا ۇنەمدەيتىن ادام تۇرمە سالادى» دەگەن دايەكسوز بار.
قازىر مەملەكەت باسشىسى دا, ەل ۇكىمەتى دە ءبىلىم بەرۋ ساپاسىن ارتتىرۋ ءۇشىن بۇرىن-سوڭدى بولماعان جاعدايلار جاساپ جاتقانى انىق. مۇنىڭ ءبارى ءسوزسىز ناتيجە بەرەدى. تەك قوعام قاي باعىتتا جۇرگىسى كەلەتىنىن, نەندەي دۇنيەگە باسىمدىق بەرەتىنىن ءتۇسىنۋ عانا قالدى.
تاعى دا ايتا كەتكىم كەلەدى, ءبىز سىندارلى ديالوگقا اشىقپىز. رەسپۋبليكالىق بيۋدجەتتى بەكىتۋ شەڭبەرىندەگى زياتكەرلىك مەكتەپتەردىڭ بارلىق شىعىستارى تالقىلانادى, اشىق ءارى باقىلاۋ جاساۋ قولجەتىمدى.
مەن تەك دالەلدەنگەن جانە ناقتى مالىمەتتەرمەن جۇمىس ىستەۋگە شاقىرامىن, – دەدى نزم باسقارما توراعاسى.
