NZM tóraǵasy depýtattyń málimdemesine qatysty pikir bildirdi

Foto: Sputnik

«Nazarbaev Zııatkerlik mektepteri» DBBU Basqarma Tóraǵasy Ánýar Janǵozın Qazaqstan Respýblıkasy Parlamenti Májilisiniń depýtaty Magerram Magerramovtyń málimdemesine qatysty pikir bildirdi, dep jazady qandastar.kz

– Keshe Májilis depýtaty Nazarbaev Zııatkerlik mektepterin qarjylandyrýǵa qatysty taǵy bir málimdeme jasady. Magerram Magerramovtyń aıtýynsha, 2011-2024 jyldar aralyǵynda Nazarbaev Zııatkerlik mektepteriniń bir oqýshysyna jyl saıyn 27 mıllıon teńge bólingen. Bul derektiń naqty qaıdan alynǵany belgisiz, biraq bul múldem shyndyqqa janaspaıdy jáne qoǵamdy jańylystyrýda.

2024 jyly NIS-te oqýǵa arnalǵan bilim grantynyń somasy 2 349 191 teńgeni quraıdy. О́tken jyldary bul kórsetkish budan da tómen boldy. Grant boıynsha shyǵystar qatań retteledi jáne oǵan mektep qyzmetkerleriniń jalaqysy, oqýshylardyń tamaqtanýy jáne kommýnaldyq shyǵyndar kiredi. Zııatkerlik mektepterdi qarjylandyrý kólemi jyl saıyn ortalyq memlekettik organdar jáne Májilis depýtattary tarapynan maquldanyp, respýblıkalyq bıýdjet aıasynda bekitiledi. Sonymen qatar biz uıymnyń qyzmeti týraly senimdi ári tolyq aqparat berýge árqashan daıynbyz.

Jalpy mektepterdiń qarjylandyrý kólemin óńirlerdiń bıýdjetimen salystyrý mende úlken suraq týǵyzady. Bul múldem durys emes, óıtkeni ol salystyrýǵa, bir-birine para-par kelmeıtin jaǵdaılarǵa negizdelip ólshenedi.

Sonymen qatar jaqynda mynadaı derekke tap boldym, eger bilim uıasynyń qyzmetin basqa dúnıelermen salystyrý qısynsyz bolsa, kem degende salystyrý barysynda mynany este saqtaý kerek. Máselen, bir Zııatkerlik mektep oqýshysyn qarjylandyrý 2,3 mln. teńgeni qurasa, onda bir tutqyndy qarjylandyrýǵa 2,7 mln. teńge bólinedi (derekkózge silteme pikirde).

«Mektepterden aqsha únemdeıtin adam túrme salady» degen dáıeksóz bar.

Qazir Memleket basshysy da, el úkimeti de bilim berý sapasyn arttyrý úshin buryn-sońdy bolmaǵan jaǵdaılar jasap jatqany anyq. Munyń bári sózsiz nátıje beredi. Tek qoǵam qaı baǵytta júrgisi keletinin, nendeı dúnıege basymdyq beretinin túsiný ǵana qaldy.

Taǵy da aıta ketkim keledi, biz syndarly dıalogqa ashyqpyz. Respýblıkalyq bıýdjetti bekitý sheńberindegi Zııatkerlik mektepterdiń barlyq shyǵystary talqylanady, ashyq ári baqylaý jasaý qoljetimdi.

Men tek dáleldengen jáne naqty málimettermen jumys isteýge shaqyramyn, – dedi NZM Basqarma tóraǵasy.