وبلىس اكىمى الەم چەمپيونى مەن جۇلدەگەرىنە پاتەر كىلتتەرىن تابىستادى

جامبىل وبلىسىنىڭ اكىمى نۇرجان نۇرجىگىتوۆ 2023 جىلدىڭ 1-14 مامىرى ارالىعىندا بوكستان ەرەسەكتەر اراسىندا وزبەكستان رەسپۋبليكاسى, تاشكەنت قالاسىندا وتكەن الەم چەمپيوناتىنىڭ چەمپيونى اسلانبەك شىمبەرگەنوۆ پەن كۇمىس جۇلدەگەرى دۋلات بەكباۋوۆتى ماراپاتتاۋ سالتاناتىنا قاتىستى.

ايتا كەتەيىك, اتالعان بايراقتى باسەكەگە قازاقستان قۇراما كومانداسىنان 13 سپورتشى قاتىسسا, ونىڭ ەكەۋى جامبىلدىق 67 كگ سالماق دارەجەسىندە دۋلات بەكباۋوۆ جانە 71 كگ سالماق دارەجەسىندە قازاقستان قۇراما كومانداسىنىڭ كاپيتانى اسلانبەك شىمبەرگەنوۆ.

سالتاناتتى شارا بارىسىندا جامبىلدىق جانكۇيەرلەر, جاس سپورتشىلار جەڭىمپاز سپورتشىلار مەن ولاردىڭ جاتتىقتىرۋشىلارىن قوشەمەتپەن قارسى الىپ, قۇرمەت كورسەتتى. ايتىسكەر اقىن نۇرلىبەك قۇرمانوۆ سپورتشىلارعا ارناۋ ايتىپ, جەڭىستەرىن جىرعا قوستى.

— الەمدىك باسەكەدە كوك تۋىمىزدى بيىككە كوتەرگەن ورەندەرىمىز اسلانبەك پەن دۋلاتتى ايتۋلى الەمدىك جەڭىسىمەن شىن جۇرەكتەن قۇتتىقتايمىن! جامبىل بوكس مەكتەبىنىڭ جارقىن ءداستۇرىن ساقتاعان سپورتشىلارىمىز وزدەرىن ناعىز شەبەر بوكسشى ەكەندىكتەرىن وسى الەم بىرىنشىلىگىندە ايرىقشا كورسەتە ءبىلدى! بۇگىنگى بوكس الەمىندە وزدەرىنىڭ دارا تالانتىمەن تالايدى مويىنداتقان اسلانبەك پەن دۋلات كەشەگى جامبىل بوكسىنىڭ داڭقىن تورتكۇل دۇنيەگە پاش ەتكەن سەرىك قوناقباەۆ, بولات ءجۇمادىلوۆ, ەرماحان ىبرايىموۆ, بولات نيازىمبەتوۆ, باقتيار ارتاەۆ, عاني جايلاۋوۆ, ولجاس ساتتىباەۆ, ءابىلحان امانقۇل سىندى حاس شەبەرلەردىڭ جەڭىستى جولدارىن تابىستى جالعاستىرا ءبىلدى.

1999 جىلى حيۋستوندا (اقش) وتكەن الەم چەمپيوناتىندا بولات ءجۇمادىلوۆ التىننان القا تاقسا, اراعا 24 جىل سالىپ اسلانبەك شىمبەرەگەنوۆ سول جەڭىستى, سول ەرلىكتى قايتالاپ وتىر. بۇل ءبىز ءۇشىن ۇلكەن قۋانىش, جوعارى مارتەبە.

بوكسشىلارىمىزدى ۇلكەن رينگكە باۋلىپ, حالىقارالىق دارەجەدەگى سپورت شەبەرى دەڭگەيىنە كوتەرگەن قازاقستان رەسپۋبليكاسىنا ەڭبەگى سىڭگەن جاتتىقتىرۋشى نۇرلان اقۇرپەكوۆ پەن ەرمەك ەرتاەۆتاردىڭ ەرەن ەڭبەكتەرىن دە ايرىقشا اتاپ وتكىم كەلەدى,-دەي كەلە نۇرجان نۇرجىگىتوۆ بوكسشىلاردىڭ اتا-انالارىنا دا ريزاشىلىعىن جەتكىزدى.

سونداي-اق, ايماق باسشىسى اسلانبەكتىڭ التىن, دۋلاتتىڭ كۇمىس مەدالى – الداعى پاريج وليمپياداسىنىڭ التىن مەدالىنە ۇلاسۋىنا نيەتتەستىگىن ءبىلدىردى.

وبلىس اكىمى سپورتشىلاردى ماراپاتتاپ, سىي-سياپاتتارىن تابىستادى.

اتاپ ايتساق, الەم چەمپيونى اسلانبەك شىمبەرگەنوۆكە 3 بولمەلى پاتەردىڭ كىلتى, ونىڭ جەكە باپكەرى ەرمەك ەرتاەۆقا 5 000 000 تەڭگەنىڭ سەرتيفيكاتى تابىستالدى.
ال, الەم چەمپيوناتىنىڭ كۇمىس جۇلدەگەرى دۋلات بەكباۋوۆقا 2 بولمەلى پاتەردىڭ كىلتى, ونىڭ جەكە باپكەرى نۇرلان اقۇرپەكوۆكە 3 000 000 تەڭگەنىڭ سەرتيفيكاتى تابىستالدى.
سالتاناتتى شارا بارىسىندا قوعام قايراتكەرى, جامبىل وبلىسى بوكس فەدەراتسياسىنىڭ تۇڭعىش پرەزيدەنتى قايرات شوتپاقوۆ تە ءوز قۇتتىقتاۋىن جەتكىزىپ, سپورتشىلاردىڭ ەلەۋلى ەڭبەگىن اتاپ ءوتتى.

الەم چەمپيونى اسلانبەك شىمبەرگەنوۆ تە ءوزىنىڭ اسەرىمەن ءبولىسىپ, قولداۋ ءبىلدىرىپ, تىلەۋلەس بولعان بارشا جانكۇيەرلەرىنە العىسىن ايتتى.