وداق توراعاسىنا لايىق كىم بار?

« ۇلىقبەك اعا توراعالىقتان كەتە قالسا, ول ورىنعا لايىق كىم بار?» دەگەن وي مازالاعالى ءبىر اي بولدى.

ارى ويلاپ, بەرى ويلاپ ءوز باسىم جۇسىپبەك قورعاسبەكتىڭ كانديداتۋراسىنا توقتادىم.

مەنىڭشە, قانداي جاعداي بولماسىن, ساكەن, ءسابيت, عابيتتەردەي الىپتاردان قالعان قاسيەتتى وردانى الدىمەن قازاقتى شىعارماشىلىعىمەن مويىنداتقان قالامگەر باسقارۋ كەرەك.

جۇسىپبەك اعانىڭ «جانسەبىل», «جىندى قايىڭ», «قاسقىر ادامىنان» باستاپ بار شىعارماسى سول ۇدەدەن شىعادى.

بۇل — ءبىر.

ەكىنشىدەن, كوپ ادام وداق باسشىسى دەگەن لاۋازىمدى «اقشا تابۋمەن, كىتاپ ساتۋمەن, جازۋشىلاردى بايىتۋمەن» اينالىساتىن قىزمەت رەتىندە قاراپ كەتكەن سياقتى. وداق دەگەن كىتاپ ساتاتىن باسپا ەمەس. جازۋشىنىڭ بيزنەسكە ۇيرەتەتىن موتيۆاتسيالىق ۇيىم دەۋ دە كۇلكىلى. وداق الدىمەن جازۋشىلاردىڭ جازعانىن تالقىلايتىن, ولاردىڭ شىعارماشىلىعىنا باعا بەرەتىن ورىن.

بۇرىنعى جازۋشىلارمەن سويلەسە قالساڭ, كەڭەس داۋىرىندەگى وداقتىڭ شىعارماشىلىق اتموسفەراسىن تامسانا ايتىپ وتىرادى. سول شىعارماشىلىق اتموسفەرا بەردىبەك, سافۋان, سايىن, مۇقاعالي, كەڭشىلىك, جاراسقان, ورالحانداردى الىپقا اينالدىرمادى ما?

ونداي شىعارماشىلىق اتموسفەرانى قازاقتىڭ بارشا قالامگەرىنىڭ شىعارمالارىن تولىق وقىپ شىققان, جازۋشىنىڭ جانىن تەرەڭ تۇسىنەتىن ادام عانا قالىپتاستىرا الادى.

سەبەبى, جۇسىپبەك اعا قالامگەرلەردىڭ اراسىندا ءمۇيىزى قاراعايداي الىپتاردان باستاپ, بىزگە دەيىنگى ءھام بىزدەن كەيىنگى كەز-كەلگەن «دوراكتىڭ» جازعانىن وقىعان جالعىز ادام.

ۇشىنشىدەن, وداق تىزگىنىن ادەبيەتكە ەڭبەگى ابدەن سىڭگەن ادام ۇستاۋى كەرەك. قازىرگى جازۋشىلار اراسىندا ءوزىنىڭ ەمەس, وزگە قالامگەرلەردىڭ جازعان-سىزعانىن ناسيحاتتاۋ ىسىندە جۇسىپبەك اعانىڭ الدىن ورايتىن جانە ادام جوق! وسى ۋاقىتقا دەيىن ءتۇرلى ادەبي باعدارلامالار اشىپ, بۇكىل وداق بولىپ ىستەۋگە ءتيىس جۇمىستى ءبىر ءوزى اتقارىپ كەلە جاتقانىن ەشكىم جوققا شىعارا المايدى.

مەن, ارينە قازىرگى وداقتىڭ قىزمەتكەرى رەتىندە مۇنداي وي ايتپاۋعا ءتيىس شىعارمىن. بىراق, «تۋرا بيدە تۋعان جوق» دەگەن قاعيداعا سۇيەنىپ, ءوز ويىمدى ورتاعا سالۋدى ءجون سانادىم.

ءسىز نە دەيسىز?

قانات ابىلقايىر Facebook پاراقشاسىنان