Odaq tóraǵasyna laıyq kim bar?

«Ulyqbek aǵa tóraǵalyqtan kete qalsa, ol orynǵa laıyq kim bar?» degen oı mazalaǵaly bir aı boldy.

Ary oılap, beri oılap óz basym Júsipbek Qorǵasbektiń kandıdatýrasyna toqtadym.

Menińshe, qandaı jaǵdaı bolmasyn, Sáken, Sábıt, Ǵabıtterdeı alyptardan qalǵan qasıetti ordany aldymen qazaqty shyǵarmashylyǵymen moıyndatqan qalamger basqarý kerek.

Júsipbek aǵanyń «Jansebil», «Jyndy qaıyń», «Qasqyr adamynan» bastap bar shyǵarmasy sol údeden shyǵady.

Bul — bir.

Ekinshiden, kóp adam Odaq basshysy degen laýazymdy «aqsha tabýmen, kitap satýmen, jazýshylardy baıytýmen» aınalysatyn qyzmet retinde qarap ketken sııaqty. Odaq degen kitap satatyn baspa emes. Jazýshynyń bızneske úıretetin motıvaııalyq uıym deý de kúlkili. Odaq aldymen Jazýshylardyń jazǵanyn talqylaıtyn, olardyń shyǵarmashylyǵyna baǵa beretin oryn.

Burynǵy jazýshylarmen sóılese qalsań, Keńes dáýirindegi Odaqtyń shyǵarmashylyq atmosferasyn tamsana aıtyp otyrady. Sol shyǵarmashylyq atmosfera Berdibek, Safýan, Saıyn, Muqaǵalı, Keńshilik, Jarasqan, Oralhandardy alypqa aınaldyrmady ma?

Ondaı shyǵarmashylyq atmosferany qazaqtyń barsha qalamgeriniń shyǵarmalaryn tolyq oqyp shyqqan, jazýshynyń janyn tereń túsinetin adam ǵana qalyptastyra alady.

Sebebi, Júsipbek aǵa qalamgerlerdiń arasynda múıizi qaraǵaıdaı alyptardan bastap, bizge deıingi hám bizden keıingi kez-kelgen «dóráktiń» jazǵanyn oqyǵan jalǵyz adam.

Úshinshiden, Odaq tizginin ádebıetke eńbegi ábden sińgen adam ustaýy kerek. Qazirgi jazýshylar arasynda óziniń emes, ózge qalamgerlerdiń jazǵan-syzǵanyn nasıhattaý isinde Júsipbek aǵanyń aldyn oraıtyn jáne adam joq! Osy ýaqytqa deıin túrli ádebı baǵdarlamalar ashyp, búkil Odaq bolyp isteýge tıis jumysty bir ózi atqaryp kele jatqanyn eshkim joqqa shyǵara almaıdy.

Men, árıne qazirgi Odaqtyń qyzmetkeri retinde mundaı oı aıtpaýǵa tıis shyǵarmyn. Biraq, «týra bıde týǵan joq» degen qaǵıdaǵa súıenip, óz oıymdy ortaǵa salýdy jón sanadym.

Siz ne deısiz?

Qanat Ábilqaıyr Facebook paraqshasynan