«وعان قامقورلىق جاساعىم كەلدى»: ادىلەت مايعازيەۆ سۇيىكتىسىمەن قالاي تانىسقانىن ايتتى

ساكەن مايعازيەۆتىڭ كۇنى كەشە عانا شاڭىراق كوتەرگەن ۇلى ادىلەت مايعازيەۆ سۇيىكتىسىمەن قالاي تانىسقانىن ايتتى, دەپ حابارلايدى Qandastar.kz اقپارات پورتالى.

ول سۇيىكتىسى ءاديانى العاش اقتاۋ قالاسىنا بارعاندا كورگەن.

«ءبىر جىل بۇرىن اقتاۋدا تانىستىق. بەرەكەت دەگەن دوسىم كوفەحانا اشقان. اكەم, كومەكشىسى ۇشەۋىمىز قولداۋ ءبىلدىرىپ باردىق. سول كەزدە كوردىم. سىرتتاي كورىپ, ۇناتىپ قالدىم. بىراق ول اشىلۋدا تانىسقان جوقپىز. سودان ارامىز ءۇزىلىپ قالدى. ءبىر كۇنى بەرەكەت دوسىم ۇيلەنەتىن بولدى. سول تويعا اتا-اناممەن باردىق. ءاديا – دوسىمنىڭ جاقىن قارىنداسى. ءدوسىمنىڭى تۋىسقانى بولعاسىن بىردەن سوزگە تارتىپ, تانىسىپ كەتە المادىم. ۇيلەنۋ تويدان كەيىن جاستار شاعىن باسقوسۋعا جينالدىق. ءبىزدىڭ جاقىن تانىسۋىمىزعا دا سول كەش سەبەپ بولدى. ەرتەڭىنە بەرەكەتتىڭ ۇيىنە مەنىڭ اتا-انام, ءوزىنىڭ تۋىستارى جينالدى. داستارحاندا ءاديا مەنىڭ جانىما وتىرىپ قالدى. سىرتقا شىققاندا ونىڭ اياق كيىمىن اپەردىم. وعان قامقورلىق جاساعىم كەلدى. سودان بەرى دوس بولىپ ارالاسا باستادىق. مىنە, شاڭىراق كوتەردىك», — دەدى ول.