جاڭالىقتار
ويىن بيزنەسى مەن لۋدومانياعا قارسى كۇرەستىڭ 2024-2026 جىلدارعا ارنالعان كەشەندى جوسپارى قابىلداندى
پرەزيدەنت قاسىم-جومارت توقاەۆتىڭ تاعى ءبىر باستاماسى ىسكە اسىرىلدى. ۇكىمەت زاڭسىز ويىن بيزنەسىنە جانە لۋدومانياعا قارسى كۇرەستىڭ 2024-2026 جىلدارعا ارنالعان كەشەندى جوسپارىن قابىلدادى. بۇل تۋرالى مەملەكەتتىك كەڭەسشى ەرلان قارين جازدى.
«مەملەكەت باسشىسى ۇلتتىق قۇرىلتايدىڭ اتىراۋدا وتكەن ءۇشىنشى وتىرىسىندا لۋدومانيامەن كۇرەسۋ ءۇشىن جۇيەلى جۇمىس جاساپ, كەشەندى جوسپار قۇرۋدى, سونداي-اق ءتيىستى زاڭدى تەزىرەك قابىلداۋدى تاپسىرعان ەدى.
ەستەرىڭىزدە بولسا, ءماجىلىس بۇعان دەيىن وسىعان قاتىستى زاڭ جوباسىن ءبىرىنشى وقىلىمدا قاراستىرعان بولاتىن. قابىلدانعان كەشەندى جوسپاردىڭ ءىس-شارالارى زاڭ جوباسىنىڭ نەگىزگى ەرەجەلەرىمەن تولىق ۇندەسەدى», — دەيدى مەملەكەتتىك كەڭەسشى.
كەشەندى جوسپاردىڭ جوباسىن ساراپشىلار, سونداي-اق جاستار ساياساتى جونىندەگى كەڭەستىڭ مۇشەلەرى كەڭىنەن تالقىلادى. جوسپار 4 بولىمنەن جانە 28 تارماقتان تۇرادى. ونىڭ ساپالى ورىندالۋىنا 15 ورتالىق جانە 20 جەرگىلىكتى مەملەكەتتىك ورگان جاۋاپتى بولادى.
«لۋدومانياعا قارسى كۇرەستە مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە بۇكىل قوعامنىڭ جۇمىلۋى, دايەكتى ءارى جۇيەلى جۇمىس جاساۋى اسا ماڭىزدى», — دەپ تولىقتىرعان ەرلان قارين.
