ويىنشىعا قول كوتەرگەن «استانا» فۋتبول كلۋبىنىڭ جاتتىقتىرۋشىسىنا 1 ملن تەڭگە ايىپپۇل سالىندى

«استانا» فۋتبول كلۋبىنىڭ جاتتىقتىرۋشىسى گريگوري بابايانعا ماتچتان كەيىنگى ارەكەتى ءۇشىن 1 ميلليون تەڭگە ايىپپۇل سالىندى, دەپ حابارلايدى qandastar.kz Skifnews.kz اقپارات اگەنتتىگىنە سىلتەمە جاساپ.

قازاقستان فۋتبول فەدەراتسياسىنىڭ مالىمەتىنە سايكەس جانجال 30 قازاندا «استانا» مەن «اتىراۋ» كلۋبتارىنىڭ اراسىنداعى ماتچتان كەيىن بولعان. ويىندا 3:2 ەسەبىمەن استانالىق كلۋب جەڭىسكە جەتكەن. الايدا ماتچ بىتكەن سوڭ داۋ تۋىنداپ, جاتتىقتىرۋشى بابايان ويىنشىعا قول كوتەرگەن.

داۋدان كەيىن 1 قاراشادا «استانا» مەن «اتىراۋ» كوماندالارى اراسىنداعى ءتارتىپ بۇزۋشىلىق قازاقستان فۋتبول فەدەراتسياسىنىڭ باقىلاۋ, تارتىپتىك جانە ەتيكا كوميتەتىنىڭ وتىرىسىندا قارالعان.

«قفف ەتيكا كودەكسىنىڭ 10, 12, 13 تارماقتارىن بۇزعانى ءۇشىن 48-تارماقتى نەگىزگە الا وتىرىپ «استانا» قۇراماسىنىڭ جاتتىقتىرۋشىسى بابايان گريگوريدى 2 ماتچقا ويىننان الشاقتاتىپ, 300 اەك نەمەسە 1 107 600 تەڭگە ايىپپۇل سالىندى. ويىننان الشاقتاتۋ مەرزىمى 2024 جىلدىڭ 31 قازانىنان باستاپ ەسەپتەلەدى. ايىپپۇلدى 2024 جىلدىڭ 1 جەلتوقسانىنا دەيىن تولەۋى كەرەك», – دەلىنگەن حابارلامادا.

سونىمەن قاتار «اتىراۋ» كلۋبىنا 369 200 تەڭگە ايىپپۇل سالىنعان. ال كلۋب ويىنشىسى Barbosa Soares Mateus تارتىپكە قايشى ارەكەتى ءۇشىن 200 اەك نەمەسە 738 400 تەڭگە ايىپپۇل تولەيدى.