«وكپەسى تەسىلگەن»: ەكس-پوليتسەي كولىگىمەن باسىپ وتكەن بالانىڭ جاعدايى بەلگىلى بولدى

الماتى وبلىسى قاراساي اۋدانى كوكوزەك اۋىلىندا ەكس-پوليتسەي كولىگىمەن باسىپ كەتكەن بالانىڭ جاعدايى وتە اۋىر. بۇل تۋرالى Sputnik قازاقستان تىلشىسىنە بالانىڭ اكەسى ايتتى.

تاپا-تال تۇستە كولىكتىڭ استىندا قالعان 7 جاستاعى جانارىس تولەننىڭ جاعدايى وتە اۋىر. ونى 42 جاستاعى بۇرىنعى پوليتسيا قىزمەتكەرى كولىگىمەن باسىپ ءوتىپ كەتكەن. بالانى قاققان بويدا ول وقيعا ورنىنان ءىزىن سۋىتقان.

«بالامنىڭ جاعدايى وتە اۋىر. جانساقتاۋ بولىمىندە جاتىر. ەكى رەت وتا جاسالدى, سودان وڭالماي تۇر. باۋىرى ەزىلىپ, وكپەسى ەكى جەردەن تەسىلگەن», — دەيدى بالانىڭ اكەسى ەركىن قالىقباەۆ.

كۇدىكتى سول كوكوزەك اۋىلىندا ۋچاسكەلىك پوليتسيا ينسپەكتورى بولىپ ىستەگەن. كەيىنگى كەزدەرى ماس كۇيدە جۇرەتىن. وقيعا بولعان كۇنى دە ماس بولعان, دەيدى بالانىڭ اكەسى.

«قاسكەلەڭدىك دارىگەرلەر وبلىستىق بالالار اۋرۋحاناسىنا اۋىستىرامىز دەپ سول جاققا سۇرانىس جىبەرىپ قويدى, بىراق وبلىستىق بالالار اۋرۋحاناسى ءالى جاۋاپ قاتپادى. بالامنىڭ وكپەسىنە ەكى جەرىنە زونت قويعان. اياق-قولى سىنباعان سياقتى, بىراق قوزعالا المايدى. بالام كوزىن اشادى, بىراق ءتىل جوق», — دەيدى ەركىن قالىقباەۆ.

جانارىس وتباسىنداعى ءتورت بالانىڭ ءۇشىنشىسى. اتا-اناسى جەكە كاسىپپەن اينالىسادى. تالاپتى بالا تاەكۆاندومەن اينالىسقان. ءتىپتى تالاي رەت جەڭىستى قانجىعاسىنا بايلاعان.

الماتى وبلىستىق پوليتسيا دەپارتامەنتى ۋچاسكەلىك پوليتسەي وقيعا بولاردان بۇرىن جۇمىستان شىعارىلعانىن ايتادى.

جەدەل-ىزدەستىرۋ ءىس شارالارى بارىسىندا Lexus RX 300 اۆتوكولىگىنىڭ 42 جاستاعى جۇرگىزۋشىسى ۇستالدى. كۇدىكتى ۋاقىتشا ۇستاۋ يزولياتورىنا قامالدى.

«اتالعان ازامات پوليتسيا قىزمەتكەرى ەمەس, ول جول اپاتىنان بۇرىن تەرىس سەبەپتەرمەن جۇمىستان شىعارىلعان. بۇل فاكت بويىنشا تەرگەۋ جۇرگىزىلىپ جاتىر», — دەيدى ۆەدومستۆو.

ەسكە سالا كەتەيىك, 4 شىلدەدە ۆەلوسيپەد مىنگەن بالانى Lexus RX 300 كولىگى ارتقا ءجۇرىپ كەلە جاتىپ, باسىپ ءوتتى. جۇرگىزۋشى قايىرىلىپ توقتاماعان كۇيى وقيعا ورنىنان ءىزىن سۋىتتى. وعان دەرەۋ ىزدەۋ جاريالاندى. ال ءبىر كۇن وتكەن سوڭ بالانى قاققان جۇرگىزۋشىنىڭ كىم ەكەنى انىقتالىپ, قولعا ءتۇستى. ول بۇرىنعى پوليتسيا قىزمەتكەرى بولىپ شىقتى.