«وكپەسىن پنەۆمونيا باسقان, ءىرىڭ اققان گايموريت جۇقتىرعان»: ۇلتتىق ۇلان كوماعا تۇسكەن ەرباياننىڭ وقيعاسى تۋرالى ايتتى

كوللاج: sn.kz

ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارى قايرات ۇمبەتوۆ جاعدايى مۇشكىل جاتقان سارباز ەربايان مۇحتارعا قاتىستى اقپارات ايتتى, دەپ حابارلايدى   qandastar.kz اقپارات پورتالى  Azattyq Rýhy-نا سىلتەمە جاساپ.

بۇل تۋرالى ول جاستاردى قولداۋ جونىندەگى رەسپۋبليكالىق كەڭەستىڭ كەزەكتى وتىرىسىندا باياندادى.

«مۇحتار ەربايانعا قاتىستى ايتسام. ول ۇلتتىق ۇلان قاتارىندا قىزمەتىن اتقارۋ كەزىندە تۇنگى ساعات 02:00-دە ۇيىقىسىنان تۇرىپ, جىعىلىپ قالىپ, جاراقات العان. جاراقات العاننان كەيىنگى قازىرگى احۋالى قۇلاعاننىڭ سالدارى ەمەس. سولدات ەمدەلۋ كەزىندە ينفەكتسيالىق اۋرۋعا دۋشار بولعان. وكىنىشكە قاراي, ەمدەلۋ كەزىندە ونىڭ وكپەسىن پنەۆمونيا باسقان, قوسىمشا ءىرىڭ اققان گايموريت جۇقتىرعان. دارىگەرلەر كەڭەسە وتىرىپ وعان وتا جاساعان سوڭ وسىنداي جاعدايعا دۋشار بولىپ وتىر», – دەدى ول.

اسكەري قىزمەتشى سۇيەك-مي جاراقاتىن العان. ەربايان مۇحتار وتكەن جىلدىڭ جەلتوقسان ايىندا كوماعا تۇسكەن بولاتىن. اسكەري بولىمدەگىلەر ونىڭ اجەتحانادا قۇلاپ, باسىن پليتكاعا سوعىپ العانىن ايتىپ, بۇل وقيعانى جازاتايىم جاعداي دەپ تۇسىندىرگەن. الايدا, تۋىستارى بۇل نۇسقانى قابىلدامادى.