جاڭالىقتار
وقۋ-اعارتۋ مينيسترلىگى مۇعالىمدەرگە ماڭىزدى ەسكەرتۋ جاسادى
وقۋ-اعارتۋ مينيسترلىگى مەسسەندجەرلەر مەن الەۋمەتتىك جەلىلەردە «پەدستارت» اتتى وليمپياداسىنىڭ اقىلى نەگىزدە وتكىزىلەتىنى جونىندە اقپاراتقا رەسمي تۇسىنىك بەردى, دەپ حابارلادى Qandastar.kz.
«قازاقستان رەسپۋبليكاسى وقۋ-اعارتۋ مينيسترلىگى «پەدستارت» وليمپياداسىن ۇيىمداستىرۋعا جانە وتكىزۋگە ەشقانداي قاتىسى جوق ەكەنىن رەسمي تۇردە مالىمدەيمىز.
اتالعان اقپارات شىندىققا جاناسپايدى. ال مينيسترلىكتىڭ فيرمالىق بلانكىن زاڭسىز پايدالانىپ, جالعان حابارلاما تاراتقان تۇلعالاردىڭ ارەكەتى – زاڭعا قايشى.
وسىعان وراي, ءبىلىم بەرۋ ۇيىمدارىنىڭ باسشىلارىن جانە پەداگوگيكالىق ۇجىمداردى قىزمەتكەرلەر اراسىندا ءتۇسىندىرۋ جۇمىستارىن جۇرگىزىپ, وقۋ-اعارتۋ مينيسترلىگى ۇسىنباعان, اقىلى ءارى كۇماندى وليمپيادالار مەن بايقاۋلارعا قاتىسۋعا جول بەرمەۋگە شاقىرامىز.
مينيسترلىك ۇسىنعان وليمپيادالار مەن بايقاۋلاردىڭ ءتىزىمى №514 بۇيرىقپەن بەكىتىلگەن. تەك وسى تىزىمگە ەنگىزىلگەن ءىس-شارالار عانا پەداگوگتەردىڭ اتتەستاتسياسى كەزىندە ەسەپكە الىنادى.
بارشاڭىزدى اباي بولۋعا شاقىرامىز. وسىنداي جاعدايلار انىقتالعاندا دەرەۋ وڭىرلىك ءبىلىم بەرۋ ۇيىمدارىنا نەمەسە ءبىلىم سالاسىندا ساپاسىن قامتاماسىز ەتۋ كوميتەتىنە حابارلاسۋىڭىزدى سۇرايمىز», — دەپ جازدى ۆەدومستۆونىڭ رەسمي وكىلى مەرەكە امانگەلدىقىزى.
