«وقۋ پروتسەسى حاوسقا اينالادى»: ايماعامبەتوۆ ساباق ۋاقىتىن قىسقارتقان قازاقستان مەكتەپتەرىن سىنعا الدى

فوتو:  ortcom.kz

بۇرىنعى مينيستر, دەپۋتات اسحات ايماعامبەتوۆ كەيبىر مەكتەپتەردە ساباق ۇزاقتىعىنىڭ قىسقارتىلعانىن سىنعا الدى. بۇل تۋرالى  qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

پاۆلودارداعى بارلىق مەكتەپتە 40 مينۋتتىق ساباق ەنگىزىلگەن ەكەن. بۇل كەستە ءبىلىم بەرۋ ۇيىمدارىندا ادام كوپتىگىنە بايلانىستى جاسالدى دەيدى.

بۇل شەشىمگە بۇرىنعى ءبىلىم ءمينيسترى اسحات ايماعامبەتوۆ پىكىر ءبىلدىردى.

“پاۆلودار وبلىسىنىڭ باسشىلارى ساباقتاردى 30 مينۋتقا دەيىن قىسقارتۋدى ويلاپ تاپپاعانىنا شۇكىر! مۇنداي لوگيكامەن, ەندى جاڭا مەكتەپتەر سالماي-اق, ءتورت اۋىسىمعا كوشىپ, ميللياردتاعان قاراجاتتى ۇنەمدەۋگە بولار ەدى.

شىنىن ايتقاندا, پاۆلوداردا ساباقتاردى قىسقارتۋ كوپتەگەن سۇراق تۋعىزادى. باعدارلامالاردىڭ مازمۇنى, ءبىلىم ماقساتتارى وزگەرمەي قالاي ساباقتى قىسقارتۋعا بولادى?”, – دەدى ايماعامبەتوۆ.

سوزىنشە, ايماقتار ساباقتىڭ ۇزاقتىعىن وزدەرى شەشىپ, اكىمدىككە ىڭعايلى كەز كەلگەن جاعدايدا ونلاين وقۋعا كوشسە, وقۋ پروتسەسى حاوسقا اينالادى.

“بۇل ءبىلىم ساپاسىنا جانە بارلىق وقۋشىعا ساپالى ءبىلىم الۋ ءۇشىن تەڭ جاعداي جاساۋعا ۇلكەن پروبلەما تۋدىراتىنى انىق. قىزىق پارادوكس: ءبىر جاعىنان, ەل بويىنشا بىرىڭعاي ۋاقىت بەلدەۋى ەنگىزىلىپ جاتىر, ال ەكىنشى جاعىنان ار وبلىس ساباقتىڭ ۇزاقتىعىن ءوزى شەشەدى. بىرىزدىلىك قايدا? عىلىمعا نەگىزدەلگەن شەشىم قايدا?”, – دەدى دەپۋتات.

ەسكە سالساق, بۇعان دەيىن قازاقستاننىڭ ءبىر وڭىرىندەگى مەكتەپتەردە وزگەرىس ەنگىزىلگەن ەدى.