«Oqý proesi haosqa aınalady»: Aımaǵambetov sabaq ýaqytyn qysqartqan Qazaqstan mektepterin synǵa aldy

Foto:  ortcom.kz

Burynǵy mınıstr, depýtat Ashat Aımaǵambetov keıbir mektepterde sabaq uzaqtyǵynyń qysqartylǵanyn synǵa aldy. Bul týraly  qandastar.kz  Stan.kz aqparat agenttigine silteme jasap habarlaıdy.

Pavlodardaǵy barlyq mektepte 40 mınýttyq sabaq engizilgen eken. Bul keste bilim berý uıymdarynda adam kóptigine baılanysty jasaldy deıdi.

Bul sheshimge burynǵy bilim mınıstri Ashat Aımaǵambetov pikir bildirdi.

“Pavlodar oblysynyń basshylary sabaqtardy 30 mınýtqa deıin qysqartýdy oılap tappaǵanyna shúkir! Mundaı logıkamen, endi jańa mektepter salmaı-aq, tórt aýysymǵa kóship, mıllıardtaǵan qarajatty únemdeýge bolar edi.

Shynyn aıtqanda, Pavlodarda sabaqtardy qysqartý kóptegen suraq týǵyzady. Baǵdarlamalardyń mazmuny, bilim maqsattary ózgermeı qalaı sabaqty qysqartýǵa bolady?”, – dedi Aımaǵambetov.

Sózinshe, aımaqtar sabaqtyń uzaqtyǵyn ózderi sheship, ákimdikke yńǵaıly kez kelgen jaǵdaıda onlaın oqýǵa kóshse, oqý proesi haosqa aınalady.

“Bul bilim sapasyna jáne barlyq oqýshyǵa sapaly bilim alý úshin teń jaǵdaı jasaýǵa úlken problema týdyratyny anyq. Qyzyq paradoks: bir jaǵynan, el boıynsha biryńǵaı ýaqyt beldeýi engizilip jatyr, al ekinshi jaǵynan ár oblys sabaqtyń uzaqtyǵyn ózi sheshedi. Birizdilik qaıda? Ǵylymǵa negizdelgen sheshim qaıda?”, – dedi depýtat.

Eske salsaq, buǵan deıin Qazaqstannyń bir óńirindegi mektepterde ózgeris engizilgen edi.