وقۋشى قىز بەن اناسىن ۇرىپ ولتىرگەن ەكس-مۇعالىمنىڭ ءىسى اشىق سوتتا قارالادى

وقۋشى قىز بەن ونىڭ اناسىن ايۋاندىقپەن ولتىرگەن ەكس-مۇعالىمنىڭ سوتى قالاي وتەتىنى بەلگىلى بولدى.

تۇركىستان وبلىستىق سوتى قوعامدى ءدۇر سىلكىندىرگەن ىسكە قاتىستى سوت پروتسەسى اشىق وتەتىنىن مالىمدەدى, دەپ حابارلادى qandastar.kz پورتالى otyrar.kz سايتىنا سىلتەمە جاساپ.

ياعني, قىلمىستىق ءىس القابيلەردىڭ قاتىسۋىمەن قارالادى. بۇگىندە القابيلەر تاڭدالىپ تا قويعان. ايتا كەتسەك, ەر ادامعا 3 بىردەي قىلمىستىق باپ بويىنشا ايىپ تاعىلىپ وتىر.

تۇركىستان وبلىستىق سوتىنىڭ ءباسپاسوز قىزمەتى: «ءىس ماتەريالدارىنا سايكەس, سوتقا دەيىنگى تەرگەپ-تەكسەرۋ ورگاندارى سوتتالۋشىعا قىلمىسقا دايىندالۋ جانە قىلمىسقا وقتالۋ (قك 24-بابى 3-بولىگى), كامەلەتكە تولماعان ادامدى زورلاۋ (قك 120-بابى 3-1-بولىگى 1-تارماعى), ەكi نەمەسە ودان كوپ ادامدى ءولتىرۋ (قك 99-بابى 2-بولىگى 1, 3, 10, 14-تارماقتارى) قىلمىستىق ارەكەتتەرى بويىنشا ايىپ تاعىپ, سوتقا جولداعان. سوتتالۋشىنىڭ ءوتىنىش حاتى بويىنشا ءىس القابيلەردىڭ قاتىسۋىمەن اشىق سوت وتىرىسىندا قارالۋدا»

ەسكە سالساق, 12 قىركۇيەك كۇنى كەلەس اۋدانىندا جانتۇرشىگەرلىك قاندى قىلمىس بولعان ەدى. ماڭايدا تۇراتىن اۋىل تۇرعىنى شىرت ۇيقىدا جاتقان 46 جاستاعى ايەل مەن ونىڭ 15 جاسار قىزىن ءولتىرىپ كەتكەن. الەۋمەتتىك جەلىدە تاراعان اقپاراتقا سايكەس, كۇدىكتى مۇعالىم بولىپ قىزمەت اتقارىپ ءجۇرىپ وقۋشى قىزعا قىرىنداعان. مۇنى بىلگەن اناسى پەداگوگتىڭ ۇستىنەن ارىز ءتۇسىرىپتى. جۇمىستان قۋىلعان ەر ادام ەكى بىردەي ادامنان كەك العان كورىنەدى. ءىستىڭ انىق-قانىعى ەندى سوت پروتسەسىندە بەلگىلى بولادى.