وقۋشى مەكتەپتە اتىس شىعاردى: 11 ادام قازا تاپتى

فوتو

اۋستريانىڭ گراتس قالاسىنداعى مەكتەپتەردىڭ بىرىندە اتىس بولدى. قازا تاپقاندار مەن جارالانعاندار بار, دەپ حابارلايدى Qandastar.kz اقپارات پورتالى. 

سوڭعى مالىمەتتەر بويىنشا, 11 ادام قازا بولدى, جاراقات العانداردىڭ سانى بەلگىسىز. ولاردىڭ كوپشىلىگىنىڭ جاعدايى اۋىر. جەرگىلىكتى اقپارات قۇرالدارى وق اتقان ادامنىڭ سول مەكتەپتىڭ وقۋشىسى ەكەنىن حابارلادى. ءبىلىم الۋشى ەكى سىنىپقا كىرىپ, وق جاۋدىرعان. كۋاگەرلەردىڭ ايتۋىنشا, 20-عا جۋىق وق اتىلعان.

شابۋىلدان كەيىن كۇدىكتىنىڭ دەنەسى مەكتەپ دارەتحاناسىنان تابىلعان. ول ءوز-وزىنە قول جۇمساعان بولۋى مۇمكىن. الدىن الا بولجام بويىنشا, ءجاسوسپىرىم ءوزىنىڭ بۋللينگ قۇربانى بولعانىن مالىمدەگەن.

وقيعا ورنىندا پوليتسيا مەن Cobra ارنايى جاساقتارى جۇمىس ىستەپ جاتىر. مەكتەپ تولىقتاي قورشاۋعا الىندى, عيمارات ءىشىن تازالاۋ جۇمىستارى ءجۇرىپ جاتىر.  اۆسترياداعى بارلىق ىشكى ساياسي شارالار توقتاتىلدى. ىشكى ىستەر ءمينيسترى گەرحارد كارنەر وقيعا ورنىنا شۇعىل اتتاندى.

بيلىك ازاماتتاردى ارنايى وپەراتسيا ءجۇرىپ جاتقان ايماققا جاقىنداماۋدى سۇرايدى. مۇعالىمدەردىڭ ءبىرىنىڭ كۇيەۋىنىڭ ايتۋىنشا, ايەلى بىرنەشە وق ەستىگەن سوڭ وقۋشىلارمەن بىرگە سىنىپتا جاسىرىنعان. قاشىپ ۇلگەرگەن وقۋشىلاردىڭ اتا-انالارىنا بالالارىمەن كەزدەسۋگە رۇقسات بەرىلدى. جارالانعان مەكتەپ وقۋشىلارىنا مەديتسينالىق كومەك كورسەتىلىپ جاتىر.