وقۋشىلاردىڭ سىنىپ تازالاۋ تاجىريبەسى قايتا ەنگىزىلمەك

قازاقستاندا مەكتەپ وقۋشىلارى ءوز كابينەتتەرىن جۋىپ-تازالايتىن تاجىريبە قايتا قولعا الىنۋدا, دەپ حابارلايدى قازاقپارات ءتىلشىسى. «جاپون مەتوديكاسىنا ساي بالالاردى تازالىق مادەنيەتىنە ۇيرەتۋ تاجىريبەسى ءبىزدىڭ گيمنازيادا وتكەن جىلدان باستاپ قولعا الىندى. جوبا 7-11 سىنىپتار اراسىندا جۇزەگە اسىرىلۋدا. ءبىز وندا بالالاردى تازالىق پەن باسقا ادامنىڭ ەڭبەگىن باعالاپ, قۇرمەتتەي بىلۋگە باۋليمىز. ارينە, مەكتەپتە تازالىق قىزمەتكەرلەرىنەن تولىقتاي باس تارتقان جوقپىز. تاڭەرتەڭگى اۋىسىم ساباعى اياقتالعان سوڭ وقۋشىلار ءوز كابيەنتتەرىن تازالاپ, كەلەسى اۋىسىمعا تاپسىرادى. شىنىن ايتقاندا, ءبىر عانا اتا-انا قارسى بولدى, «قىزىمنىڭ مەكتەپ تازالاعانىن قالامايمىن» دەپ قىسقا قايىردى. ءبىز ءوز كەزەگىمىزدە اتا-انالارعا اتالعان شارانىڭ ەرىكتى تۇردە جۇرگىزىلەتىنىن ايتىپ, ەسكەرتتىك. اتا-انالاردىڭ كوبى قولدايتىندىقتارىن جەتكىزدى. بۇگىندە ءبىزدىڭ مەكتەپتە 1906 وقۋشى ءبىلىم الۋدا», – دەدى نۇر-سۇلتان قالالىق №80 مەكتەپ-گيمنازيانىڭ ديرەكتورى گۇلميرا جارمەنوۆا.  ءوز كەزەگىندە قر سىبايلاس جەمقورلىققا قارسى ءىس-قيمىل اگەنتتىگى پاراساتتىلىق دەپارتامەنتىنىڭ ديرەكتورى دانيار سابىرباەۆ اتالعان باستاماعا قاتىستى ءوز پىكىرىن ءبىلدىردى. «ءبىز مەكتەپتە ءار توقساننىڭ العاشقى كۇنىن پاراساتتىلىق ساعاتىنا ارناۋ تۋرالى شەشىم قابىلدادىق. جاپونيادا بالالاردى تازالىققا كىشكەنتايىنان باۋليدى. ول دەگەنىمىز – تازالىق مادەنيەتى. بىلتىر رەسەيدە وتكەن فۋتبولدان الەم چەمپيوناتىندا جاپوندىق جانكۇيەرلەر مەن فۋتبوليستەر ءوز ورىندارىن تازالاپ, «ويىن ءۇشىن راحمەت», دەپ جىلى ءىلتيپات بىلدىرگەنىن ءبارىڭىز بىلەسىزدەر. بۇل وتە ماڭىزدى, سەبەبى بالانى كىشكەنتايىنان تازالىق پەن بىرەۋدىڭ ەڭبەگىن باعالاۋعا ۇيرەتۋ – تاربيە. وسىنداي يگى ءىستىڭ ەلوردا مەكتەپتەرىندە قولعا الىنىپ جاتقانى قۋانتادى. الداعى ۋاقىتتا ەلىمىزدىڭ باسقا وڭىرلەرى دە استانالىق تاجىريبەنى ۇلگى ەتىپ الادى دەگەن ۇمىتتەمىز. جانە ءوز تاراپىمىزدان تازالىق ساعاتىن ەنگىزۋ تاجىريبەسىنە قاتىستى قاجەتتى كونسۋلتاتسيا بەرۋگە ارقاشان دايىنبىز», – دەدى دانيار سابىرباەۆ اگەنتتىكتە وتكەن ءباسپاسوز ءماسليحاتىندا.

دەرەككوز: kazinform.kz/