Oqýshylardyń synyp tazalaý tájirıbesi qaıta engizilmek

Qazaqstanda mektep oqýshylary óz kabınetterin jýyp-tazalaıtyn tájirıbe qaıta qolǵa alynýda, dep habarlaıdy QazAqparat tilshisi. «Japon metodıkasyna saı balalardy tazalyq mádenıetine úıretý tájirıbesi bizdiń gımnazııada ótken jyldan bastap qolǵa alyndy. Joba 7-11 synyptar arasynda júzege asyrylýda. Biz onda balalardy tazalyq pen basqa adamnyń eńbegin baǵalap, qurmetteı bilýge baýlımyz. Árıne, mektepte tazalyq qyzmetkerlerinen tolyqtaı bas tartqan joqpyz. Tańerteńgi aýysym sabaǵy aıaqtalǵan soń oqýshylar óz kabıentterin tazalap, kelesi aýysymǵa tapsyrady. Shynyn aıtqanda, bir ǵana ata-ana qarsy boldy, «qyzymnyń mektep tazalaǵanyn qalamaımyn» dep qysqa qaıyrdy. Biz óz kezegimizde ata-analarǵa atalǵan sharanyń erikti túrde júrgiziletinin aıtyp, eskerttik. Ata-analardyń kóbi qoldaıtyndyqtaryn jetkizdi. Búginde bizdiń mektepte 1906 oqýshy bilim alýda», – dedi Nur-Sultan qalalyq №80 mektep-gımnazııanyń dırektory Gúlmıra Jármenova.  О́z kezeginde QR Sybaılas jemqorlyqqa qarsy is-qımyl agenttigi Parasattylyq departamentiniń dırektory Danııar Sabyrbaev atalǵan bastamaǵa qatysty óz pikirin bildirdi. «Biz mektepte ár toqsannyń alǵashqy kúnin parasattylyq saǵatyna arnaý týraly sheshim qabyldadyq. Japonııada balalardy tazalyqqa kishkentaıynan baýlıdy. Ol degenimiz – tazalyq mádenıeti. Byltyr Reseıde ótken fýtboldan Álem chempıonatynda japondyq jankúıerler men fýtbolıster óz oryndaryn tazalap, «Oıyn úshin rahmet», dep jyly iltıpat bildirgenin bárińiz bilesizder. Bul óte mańyzdy, sebebi balany kishkentaıynan tazalyq pen bireýdiń eńbegin baǵalaýǵa úıretý – tárbıe. Osyndaı ıgi istiń elorda mektepterinde qolǵa alynyp jatqany qýantady. Aldaǵy ýaqytta elimizdiń basqa óńirleri de astanalyq tájirıbeni úlgi etip alady degen úmittemiz. Jáne óz tarapymyzdan tazalyq saǵatyn engizý tájirıbesine qatysty qajetti konsýltaııa berýge árqashan daıynbyz», – dedi Danııar Sabyrbaev agenttikte ótken baspasóz máslıhatynda.

Derekkóz: kazinform.kz/