وقىستا ۇلىنان ايىرىلعان انا بەيبىت الىبەكوۆتى سوتتاۋ كەرەگىن ايتتى

فوتو: ulusmedia

كاسىپكەر بەيبىت الىبەكوۆتىڭ كولىگىمەن كونتەنت تۇسىرەمىن دەپ اجال قۇشقان باتىرحان ەرجاننىڭ اناسى تەرگەۋدىڭ ۇزاققا سوزىلعانىنا شاعىمداندى. ايەلدىڭ ايتۋىنشا, بالاسىنا كولىگىن بەرگەن كاسىپكەر بەيبىت الىبەكوۆتى دە جاۋاپقا تارتۋ كەرەك. بۇل تۋرالى qandastar.kz اقپارات پورتالى 31-ارنانىڭ “ينفورمبيۋرو” باعدارلاماسىنا سىلتەمە جاساپ حابارلايدى.

مارقۇمنىڭ تۋىستارى قۇزىرلى ورگاننىڭ وقيعاعا قاتىستى قوزعاعان قىلمىستىق ىسىنە دە كوڭىلى تولمايدى. ولار ولىمگە اكەلگەن جايتتى ابايسىزدا ەمەس, قاساقانا جاسالعان قىلمىس رەتىندە قاراۋدى تالاپ ەتىپ وتىر. ودان بولەك, جاس جىگىتكە قىزىل تەمىر تۇلپارىن بەرگەن بەيبىت الىبەكوۆتىڭ ءوزى دە جاۋاپكەرشىلىككە تارتىلسىن دەيدى اناسى.

ايتا كەتەيىك, 22 جاستاعى جىگىت باتىرحان ەرجان بىلتىر 29 قازاندا زىمىراعان كولىكتەن جاقىنداي بەرگەن ساتتە ۇستىنەن سەكىرىپ وتۋگە تىرىسقان. وسىلايشا قاۋىپتى تريۋك جاساپ, الەۋمەتتىك جەلىدە ەلدى ءتانتى قىلار ۆيدەو تۇسىرگىسى كەلگەن كورىنەدى. الايدا كاسىپكەر بەرگەن قىزىل جۇيرىك جىگىتتى سوعىپ ءوتىپ, جاس بلوگەر ءتىرى قالۋى مۇمكىن ەمەس جاراقات الدى.

مارقۇمنىڭ اناسى وقيعادان بەرى 2 اي وتكەنىن جانە ءىستى تەرگەۋگە پوليتسەيلەر ءالى ناقتى شارا قابىلداماعانىن ايتادى. دامەتكەن اۋباكىروۆانىڭ ايتۋىنشا, كولىك رولىندە بولعان جۇرگىزۋشىنى كۇدىكتى دەپ تانىعانمەن ونى قاماۋعا دا الماعان.

«بالامنىڭ ءولىمىن قاساقانا جاسالعان قىلمىس رەتىندە تەرگەۋىن تالاپ ەتەمىن. ويتكەنى 45 جاستاعى ەر ادام قاۋىپتى تۇسىنە تۇرا جوعارى جىلدامدىقپەن ءجۇردى. توقتاعان جوق. وسىلايشا الدىندا تۇرعان ادامدى قاعىپ ءوتتى. بۇل ابايسىزدا جاسالعان ارەكەت دەۋگە كەلمەيدى. سوسىن بالامنىڭ قاۋىپتى ىسكە باراتىنىن تۇسىنسە دە, كولىگىن بەرگەن كاسىپكەر بەيبىت الىبەكوۆ تە زاڭ الدىندا جاۋاپ بەرسىن!» – دەدى مارقۇمنىڭ اناسى.

جىگىتتىڭ جاقىندارىنىڭ ايتۋىنشا, رولدە بولعان جۇرگىزۋشى دە – كاسىپكەردىڭ شوپىرى. بەيبىت الىبەكوۆ بۇل ءسوزدى جوققا شىعارمادى.

«باسىندا ۇزاق ۋاقىت بويى كولىكتى بەرۋدەن باس تارتىپ ءجۇردىم. بىراق ول جىگىت ىزىمنەن قالماي, قايتكەن كۇندە دە ماشينانى الۋدىڭ امالىن جاسادى. سوڭىندا مەنىڭ ۇلىم ارقىلى بايلانىسقا شىقتى. ءسويتىپ كولىكتى بەردىم. الايدا ونىڭ مۇنداي تىم قاۋىپتى ارەكەتكە باراتىنىن بىلمەدىم. ولار اۆتودرومدا جۇرگەندە قاسىندا بولمادىم. ارينە, تۋىستارىنىڭ نارازىلىعىن تۇسىنەمىن. وڭاي ەمەس. ءىستىڭ انىعىن تەرگەۋ شەشەدى», – دەدى كاسىپكەر بەيبىت الىبەكوۆ.

ال الماتى وبلىسى پوليتسياسى قازىر وقيعانى ءالى زەرتتەپ جاتىر. ءىس ازىرگە ابايسىزدا قازاعا ۇشىراتۋ فاكتىسى بويىنشا تەرگەلىپ جاتىر.