«ول مەنەن ءبىر نارسە تالاپ ەتتى…»: سابينا التىنبەكوۆا باپكەرىمەن بولعان ارا-قاتىناسىن جايىپ سالدى

فوتو: offside.kz

قازاقستاندىق ۆولەيبولشى سابينا التىنبەكوۆا جۋرناليست دينارا ساتجانعا بەرگەن سۇحباتىندا 2014 جىلى جاستار قۇراماسىنىڭ باس باپكەرىمەن بولعان كەلىسپەۋشىلىكتەرىن اشىق ايتتى, دەپ حابارلايدى qandastar.kz

Skifnews.kz جازعانداي,  باپكەر تاراپىنان وعان الدىن الا قالىپتاسقان تەرىس كوزقاراس بولعان.

«نەگە ماعان بۇلاي قارايتىنىن تۇسىنبەدىم. كەيىننەن “ول مۇلدەم ويناي المايدى, تەك ادەمىلىگى ءۇشىن عانا قۇرامادا ءجۇر. جەڭىلىستەردىڭ ءبارى سابيناعا نازاردىڭ كوپتىگىنەن” دەگەن اڭگىمەلەر تارادى. مۇنى قاقتىعىس دەپ ەمەس, تۇسىنبەۋشىلىك دەپ قابىلدادىم. ول مەنەن ءبىر نارسە تالاپ ەتتى, بىراق ناقتى نە قالاعانىن تۇسىنە المادىم. ءار جاتتىعۋدان كەيىن كوز جاسىمدى تيا المايتىن كەزدەرىم كوپ بولدى. ءتىپتى قوناقۇيدە تۇرىپ باپكەرگە حابارلاسىپ: “ۇلتتىق قۇرامادا ويناعىم كەلمەيدى, قاتتى شارشادىم” دەيتىنمىن», – دەدى التىنبەكوۆا.

ايتا كەتەيىك, سابينا التىنبەكوۆا 2013–2018 جىلدارى قازاقستان ۇلتتىق قۇراماسىنىڭ ساپىندا وينادى. ول العاش رەت 2013 جىلى 23 جاسقا دەيىنگى قىزدار اراسىنداعى ازيا چەمپيوناتىندا ەل نامىسىن قورعاعان. ال 2014 جىلى تايبەيدە وتكەن U-19 ازيا چەمپيوناتىنان كەيىن بۇكىل ازياعا تانىلىپ, ۇلكەن تانىمالدىلىققا يە بولدى. 2018 جىلدان بەرى ۇلتتىق قۇراماعا شاقىرىلماعان.