«Ol menen bir nárse talap etti…»: Sabına Altynbekova bapkerimen bolǵan ara-qatynasyn jaıyp saldy

Foto: offside.kz

Qazaqstandyq voleıbolshy Sabına Altynbekova jýrnalıst Dınara Sátjanǵa bergen suhbatynda 2014 jyly jastar quramasynyń bas bapkerimen bolǵan kelispeýshilikterin ashyq aıtty, dep habarlaıdy qandastar.kz

Skifnews.kz jazǵandaı,  bapker tarapynan oǵan aldyn ala qalyptasqan teris kózqaras bolǵan.

«Nege maǵan bulaı qaraıtynyn túsinbedim. Keıinnen “ol múldem oınaı almaıdy, tek ádemiligi úshin ǵana quramada júr. Jeńilisterdiń bári Sabınaǵa nazardyń kóptiginen” degen áńgimeler tarady. Muny qaqtyǵys dep emes, túsinbeýshilik dep qabyldadym. Ol menen bir nárse talap etti, biraq naqty ne qalaǵanyn túsine almadym. Ár jattyǵýdan keıin kóz jasymdy tııa almaıtyn kezderim kóp boldy. Tipti qonaqúıde turyp bapkerge habarlasyp: “Ulttyq quramada oınaǵym kelmeıdi, qatty sharshadym” deıtinmin», – dedi Altynbekova.

Aıta keteıik, Sabına Altynbekova 2013–2018 jyldary Qazaqstan ulttyq quramasynyń sapynda oınady. Ol alǵash ret 2013 jyly 23 jasqa deıingi qyzdar arasyndaǵy Azııa chempıonatynda el namysyn qorǵaǵan. Al 2014 jyly Taıbeıde ótken U-19 Azııa chempıonatynan keıin búkil Azııaǵa tanylyp, úlken tanymaldylyqqa ıe boldy. 2018 jyldan beri ulttyq quramaǵa shaqyrylmaǵan.