«Ol jerde bári aqshamen sheshiledi»: Aısultan Nazarbaevtyń 4 jyl burynǵy boljamy dál keldi

Eks-prezıdent Nursultan Nazarbaevtyń jıeni marqum Aısultan Nazarbaevtyń Trampqa qatysty aıtqan boljamy oryndaldy, – dep habarlaıdy qandastar.kz aqparat portaly Dalanews.kz-ke silteme jasap.

2020 jyly Aısultan áleýmettik jelidegi paraqshasynda Donald Tramp 2024 jyly ekinshi ret AQSh prezıdenti bolatynyn aıtqan.

«Tramp ekinshi ret prezıdent bolyp, Amerıkada demokratııa joq ekenine kóz jetkizesizder. Ol jerde bári aqshamen sheshiledi! Tramp AQSh tarıhyndaǵy sońǵy prezıdent bolady. Uly derjavanyń qulaýymen barlyǵy kúıreı bastaıdy «, – dep jazǵan edi Aısultan Facebook paraqshasynda.

Aısultan Nazarbaev osy jazbasyn jazǵannan keıin eki aıdan soń qaza tapty.

Eske salaıyq, búgin AQSh-taǵy prezıdent saılaýynyń aldyn ala nátıjesi shyqty. Amerıka Qurama Shtattaryndaǵy prezıdent saılaýynyń jeńimpazy – Donald Tramp.

Fox News málimetinshe, Tramp 277 daýys aldy, bul onyń prezıdent saılaýynda jeńiske jetkenin bildiredi.

The Hill basylymy da Donald Tramp saılaýda jeńiske jetkenin málimdedi. Tramp Pensılvanııa men Alıaskada da kósh bastaǵan.

Bul derekterdi sońǵy nátıje dep sanaýǵa bolmaıdy, óıtkeni daýys sanaý birneshe kúnge sozylýy múmkin.

Aıta keteıik, buǵan deıin L.N. Gýmılev atyndaǵy Eýrazııa ulttyq ýnıversıteti Saıasattaný kafedrasynyń meńgerýshisi m.a. Janat Momynqulov Dalanews.kz-ke suhbat berip, saılaý nátıjeleri týraly boljam jasady.

«Tramp álemdik saıasatta oıyp turyp oryn alady. Onyń ústine qazirgideı daǵdarys, soǵys jaǵdaıynda onyń is-qımyly – bári óte mańyzdy. Biraq Harrıs qalǵan jaǵdaıda Amerıkanyń osy saıasaty jalǵasa beredi. Qytaıǵa, Reseıge, Iranǵa qatysty shekteý, tejeý saıasaty júredi.

Meniń oıymsha, Harrıstiń jeńisine qýanamyz. Al Tramp keletin bolsa, Reseımen qarym-qatynasyndaǵy ózgerister Ortalyq Azııaǵa, bizge salqyn áser etedi. Bári aınalyp kelgende halyqaralyq júıege áser etedi. Biz boljap bolmaıtyn oqıǵalar bastalyp ketýi múmkin. Harrıs Ortalyq Azııaǵa jańa bir kózqaras tanytýy múmkin, ol – Aq úıdiń mańyndaǵy bıýrokrattardyń ókili, turaqtylyqtyń «garantııasy». Al Tramp kelse, Ýkraınadaǵy jaǵdaı uzaqqa sozylatyn daýǵa aınalýy múmkin. Sondyqtan, meniń oıymsha, Harrıstiń kelgeni Qazaqstanǵa tıimdi. Ortalyq Azııaǵa tikeleı áseri bolmasa da, sheshimderi arqyly aınalyp kelgende áseri bolady», – dedi ol.