ولگىم كەلدى: اكتەر سەرىك ءشارىپ سۇحبات بەردى

فوتو: اشىق دەرەككوز

اكتەر سەرىك ءشارىپ داۋدان كەيىن ءبىرىنشى رەت سۇحبات بەردى, دەپ حابارلايدى qandastar.kzQazaq today سايتىنا سىلتەمە جاساپ.

ول اكىمشىلىك قۇقىق بۇزۋشىلىق كودەكسىنىڭ 73-بابىنىڭ 1-بولىگى, ياعني, (وتباسىلىق-تۇرمىستىق قاتىناستار سالاسىنداعى قۇقىققا قارسى ارەكەت) بويىنشا 5 كۇن قاماۋدا بولعان ەدى.

ءساۋىردىڭ باسىندا اكتەردىڭ بۇرىنعى سۇيىكتىسى ءاليا بوتەەۆا الەۋمەتتىك جەلىلەردە ونى كۇش قولداندى دەپ ايىپتاپ, ليفتىدەن كۇشتەپ شىعارىپ جاتقان ءساتى تۇسىرىلگەن بەينەجازبانى جاريالاعان بولاتىن.

اكتەر يزولياتوردان كەيىنگى العاشقى سۇحباتىن بلوگەر الىشەر ەلىكباەۆقا بەرگەن. وندا ول نە ايتتى, قانداي كوزقاراستارىن جەتكىزدى? inbusiness.kz سايتى سۇحباتتى قىسقاشا تۇيىندەپ, نەگىزگى بولىمدەرىن ۇسىندى.

ليفتىدە بولعان وقيعا تۋرالى

سەرىك ءشارىپتىڭ سۇحباتى كوپشىلىك بىلگىسى كەلگەن اكتەردىڭ بۇرىنعى سۇيىكتىسىمەن بولعان وقيعا تۋرالى ءوز نۇسقاسىنان باستالعان.

ونىڭ ايتۋىنشا, ولار بوتەەۆامەن ءبىر جارىم جىل كەزدەسكەن, ءبىر-ءبىرىن قاتتى جاقسى كورگەن. الايدا 2024 جىلدىڭ مامىرىنان باستاپ ارالارىندا ءجيى قايتالاناتىن ۇرىس-كەرىس باستالعان. سول جىلدىڭ قاراشاسىندا تۇرمىستىق ماسەلەلەرگە بايلانىستى ەكەۋى ايىرىلىسۋعا شەشىم قابىلدايدى.

اكتەردىڭ ايتۋىنشا, جەلتوقساندا بوتەەۆانىڭ ءوزى حابارلاسىپ, قارىم-قاتىناستى قايتا قالپىنا كەلتىرۋگە تىرىسقان, بىراق ناتيجە بولماعان. كوپ وتپەي بيىل قاڭتاردا اكتەردىڭ ءوزى كەشىرىم سۇراپ, قاجىلىققا بارار الدىندا ونىمەن بايلانىسقا شىعىپتى. شەتەلدە ءجۇرىپ تە ولار ءجيى سويلەسىپ تۇرعان. ال الماتىعا ورالعان سوڭ قايتا كەزدەسكەن.

بەينەباقىلاۋ كامەراسىنا ءتۇسىپ قالعان جانجال 8 اقپاندا بولعان. اكتەردىڭ ايتۋىنشا, ۇرىس سودان 1 كۇن بۇرىن باستالىپتى. ءاليا ونىڭ مەنەدجەرى قىزمەتىن اتقارعاندىقتان, جۇمىس بارىسىنداعى تۇسىنىسپەۋشىلىك بولعان. الەۋمەتتىك جەلى ارقىلى ۇرىسىپ, كەيىن اكتەر ونى بۇعاتتاپ تاستاپتى. بىراق ءاليا اكتەردىڭ ۇيىنە كەلگەن. سول جەردە ءسوز تالاستىرىپ, بوتەەۆا ليفتكە قاراي كەتكەن. سەرىك ءشارىپتىڭ سوزىنشە, قىزدىڭ ايتقان سوزدەرى كوڭىلىنە تيگەن, بۇدان سوڭ ول ارتىنان جۇگىرىپ بارىپ, ليفتىدەن شىعارىپ العان.

وقيعادان كەيىن ولار پاتەرگە كىرىپ, قايتا جانجالداسقان. سول كەزدە اكتەر قىزدىڭ بەتىنەن ۇرعان. ولار ءتۇنى بويى سويلەسىپ, ءبىر-بىرىنەن كەشىرىم سۇراعان جانە سودان كەيىن كورىسپەگەن. ءاليا بەينەجازبانى جاريالاعانعا دەيىن ارالارىندا ەش بايلانىس بولماعان ەكەن.

«مەن بۇل ديالوگپەن ءوزىمدى اقتاۋعا تىرىسىپ جاتقان جوقپىن, بەينەدەگى ءىس-ارەكەتىم ءۇشىن كىنالىمىن. ءالى كۇنگە دەيىن نەگە ارتىنان جۇگىردىم دەپ ويلاي بەرەمىن» – دەيدى اكتەر.

قىزدىڭ ەكى ايدان كەيىن بەينەجازبانى جاريالاعان سەبەبىنە قاتىستى سۇراققا سەرىك ءشارىپ ونىڭ «ساباق بولسىن!» دەگەن ماقساتپەن جاساعانىن جەتكىزدى.

Cancel culture: قوعام اكتەر ءىسىن قالاي قابىلدادى

ليفتىدەگى بەينەجازبانىڭ الەۋمەتتىك جەلىگە تارالىپ كەتكەنى تۋرالى سەرىك شارىپكە ەڭ اۋەلى دوسى حابارلاعان ەكەن. باستاپقىدا اكتەر نە بولىپ جاتقانىن تۇسىنبەگەن. ونىڭ ەلەكتروندى پوشتاسى مەن الەۋمەتتىك جەلىدەگى اشۋلى حاتتارعا تولعان. جۋرناليستتەر, بلوگەرلەر جاپپاي قوڭىراۋ شالا باستاپتى.

كەيىننەن وعان جۇمىس بەرۋشىلەرى حابارلاسادى. الدىمەن Salem Social Media وكىلدەرى قوڭىراۋ شالىپ, بەدەلگە نۇقسان كەلۋ قاۋپىنە بايلانىستى ونى جوبالاردان ۋاقىتشا شەتتەتكەندەرىن جەتكىزگەن. بۇل شەكتەۋدىڭ مەرزىمى ازىرگە بەلگىسىز.

ناتيجەسىندە, بىرنەشە جوبا توقتاعان. اتاپ ايتقاندا, سەرىك ءشارىپتىڭ قاتىسۋىمەن تۇسىرىلگەن «پاترۋل: سوڭعى بۇيرىق» فيلمىنەن ونىڭ كورىنىستەرى قيىلىپ تاستالدى; «شاقال», «مياۋ», «الاياقتار» فيلمدەرىنىڭ پروديۋسەرلەرى ونىمەن جۇمىس ىستەۋدەن باس تارتتى; «Qarga» تەلەحيكاياسىنىڭ ءۇشىنشى ماۋسىمى توقتاتىلدى; اكتەر كوممەرتسيالىق جوبالاردان دا شەتتەتىلدى.

«باسىندا ءبارى ءبىتتى دەپ, ومىردەن ءتۇڭىلىپ, سۋيتسيد تۋرالى ويلادىم. 13 جىلىمدى كينوماتوگرافياعا ارناعانىمدى ەسكە الدىم. بۇل مەن ءۇشىن ۇلكەن سىناق», – دەدى اكتەر.

بيشىمباەۆپەن سالىستىرۋ

سۇحباتتا سەرىك ءشارىپ ءوزىن قۋاندىق بيشىمباەۆپەن سالىستىرۋ ماسەلەسىنە توقتالعان. الەۋمەتتىك جەلىلەردە ونىڭ يۆس-قا قامالۋى الدىندا بيشىمباەۆتىڭ اكتەردى جۇباتىپ جاتقانىن بەينەلەگەن, ياعني, جاساندى ينتەللەكت جاساعان روليك تاراعان بولاتىن.

«مەن كىسى ءولتىرۋشى ەمەسپىن. بىرەۋ ايتار «سەن ەكىنشى بيشىمباەۆ بولاسىڭ» دەپ. بىراق مەن ولاي سانامايمىن. بۇل – ونىڭ ءومىرى, ونىڭ تاعدىرى, ونىڭ قاتەلىگى. سول كۇنى مەن اليامەن جانجالداسۋدان قاشقاقتادىم. ءوزىمدى اقتاپ جاتقان جوقپىن, ءيا, مەن قاتەلەستىم. بىراق مۇنداي سالىستىرۋلار – قورلاۋ دەپ سانايمىن. بۇل ەكى بولەك وقيعا. مەن باسقا سالانىڭ ادامىمىن. بارلىعى تەك مەنىڭ ەر ادام ەكەنىمدى كورىپ, كىنالى دەپ قابىلدايدى», – دەدى سەرىك ءشارىپ.

اكتەر سونداي ايىپتاۋلاردان كەيىن وزىنە ءتىل تيگىزۋ فاكتىسى بويىنشا پوليتسياعا ارىز جازعانىن دا قوسا ايتتى.

Say Mo-مەن ءومىرى جانە قالاي ايىرىلىستى

سۇحباتتا الىشەر ەلىكباەۆ سەرىك ءشاپتىڭ ءاليا بوتەەۆامەن بولعان جاعدايعا دەيىن قازاق رەپەرى ءمولدىر ەسەمبەكپەن (Say Mo) بولعان قارىم-قاتىناسى تۋرالى دا سۇرادى. 2020 جىلدىڭ قاراشاسىندا اكتەر مەن Say Mo نەكەگە وتىرعان بولاتىن. كەيىنىرەك رەپەر ولار رەسمي تۇردە اجىراسقانىن جانە ءوز سوزىنشە, «ابيۋزەرمەن» بىرگە تۇرعانىن مالىمدەگەن.

بوتەەۆامەن بولعان جانجال كەزىندە Say Mo اشىق تۇردە ءاليانى قولداعان.

«ءبىز Say Mo ەكەۋمىز قارىم-قاتىناستا بولدىق. مەن ونى جاقسى كوردىم, ول مەنى جاقسى كوردى. 2020 جىلى كارانتين كەزىندە بىرگە بولىپ, ۇيدەن شىقپاعان كەزىمىزدى ءالى ەسكە الامىن. ءبىر رەت تە ۇرىسپادىق, فيلمدەر كورىپ, ۋاقىتتى بىرگە وتكىزدىك. ول كەرەمەت ادام, تالانتتى ءارتىس. ول ماعان كوپ نارسە ۇيرەتتى. سول ۋاقىت ءۇشىن ريزامىن», – دەپ باستادى ءسوزىن اكتەر.

ال Say Mo-عا قاتىستى كۇش قولدانۋ تۋرالى سۇراققا سەرىك ءشارىپ وعان «قول كوتەرمەگەنىن» العا تارتتى.

«بۇل سۇراققا قالاي جاۋاپ بەرەرىمدى بىلمەيمىن. ونى ۇردىم نە قول كوتەردىم دەپ ايتا المايمىن. ونداي جاعداي بولعان جوق. ۇرىس-كەرىس, ءسوز تالاس بولدى – بىراق ول بارىمىزدە دە بولادى عوي. بۇل مەنى اقتامايدى. بىراق ول ينتەرنەتتە ايتقانداي «ءومىرىمدى توزاققا اينالدىردى» دەگەنگە كەلىسە المايمىن. كوپ نارسەنى ەسىمە تۇسىرە المايمىن. ەگەر قازىر بىردەڭە قوسىپ نە الىپ تاستاسام, ول شىندىققا ساي كەلمەيدى», – دەپ جاۋاپ بەردى.

سۇحباتتان كەيىنگى قوعامنىڭ رەاكتسياسى

وسى تۇستا الەۋمەتتىك جەلى قولدانۋشىلارى سۇحباتتى ءارتۇرلى قابىلداعانىن ايتا كەتەيىك.

كەيبىر بەلسەندىلەر اكتەردى ايىپتاپ, بلوگەر الىشەر ەلىكباەۆتىڭ ودان سۇحبات الۋىن قارالاعان. كوبىنە بەلسەندىلەر ەر ادامداردىڭ ايەلدەرگە جاسالاتىن زورلىق-زومبىلىقتىڭ اۋىرلىعىن تۇسىنبەي كەلە جاتقانىن ايتقان.

ءوز كەزەگىندە بلوگەر الىشەر ەلىكباەۆ تا ءۇنسىز قالمادى. ول «نەگاتيۆتى پىكىرلەر جازىپ جاتقان ادامدار سۇحباتتى تولىق كورمەگەنىن, تەك ۇزىندىلەرىن قاراعاندار» ەكەنىن جەتكىزگەن.