«О́lik jóneltkendeı uzatqan ne masqara»: Aıgúl Elshibaeva syńsý ornyna Quran oqıtyndarǵa shúılikti

Foto: vıdeodan kadr

О́ner ıesiniń aıtýynsha, dástúrli emes dinı aǵym ókilderi salt-dástúrimizdi joqqa shyǵaryp jatqan kórinedi. 

Tanymal dástúrli ánshi Aıgúl Elshibaeva qyz uzatý kezinde syńsý ornyna Quran qosyp qoıatyndardy synady, dep habarlaıdy qandastar.kz Skifnews.kz-ke silteme jasap.. 

О́ner ıesiniń aıtýynsha, dástúrli emes dinı aǵym ókilderi salt-dástúrimizdi joqqa shyǵaryp jatqan kórinedi.

“Aljyǵan Ýahaptar! Qyz balany Quran oqyp, ólik jóneltkendeı uzatqan ne masqara. Kórgen kózde jazyq joq. Ýahaptar salt-dástúrge qarsy bolsańdar, Quran oqyp uzatqansha, uzatý toıyn jasamaı, úılerinen jibere salsańdarshy, salt-dástúrimizdi qor qylmaı. Qyz uzatý salt-dástúrimizge jatady. Aıalap ósirgen qyzyn, jat uıaǵa berý – qımastyǵynyń belgisi. Arabtarda kúń-qul satý, áıeldiń bıligi ekinshi orynda bolǵandyqtan, qazaqtyń dástúrindeı qyz balaǵa qurmeti joq – dep jazdy dástúrli ánshi.

Sonymen qatar óner ıesi dinı salttarǵa ultymyzdyń ejelden kele jatqan dástúrli ádet-ǵuryptarymen shatastyrmaýdy ótindi.

“Toıdy sadaqaǵa aınaldyrǵan, sadaqa men qyz uzatý salt-dástúrdi aıyra almaǵan dúbara saýatsyzdar. Ýahap sheıhtaryńa unaımyn degenshe, óle qalyńdar, qazaq bolmaı ketkirler. Ultymyzdyń tárbıeli, maǵynaly qyz balaǵa aq tilegimen qurmet kórsetken salt-dástúrin sadaqaǵa aınaldyrmańdarshy. Islam dini, Abý Hanıfa mazhabyn ustaǵan qazaq neshe ǵasyr mundaı sumdyqty kórmegen shyǵar?! Osylardyki durys pa, aǵaıyn?» –dep ashýlandy óner ókili.