ء«ولىم اۋزىنان قالدىق»: شىمكەنت اۋەجايىندا 200-دەي جولاۋشى ءبىر تاۋلىكتەن بەرى ۇشا الماي جاتىر

فوتو: اشىق دەرەككوز

شىمكەنت-استانا باعىتى بويىنشا 4 قازاندا ۇشۋى كەرەك بولعان FlyArystan ۇشاعى ءبىر تاۋلىكتەن بەرى كوككە كوتەرىلە الماي جاتىر. ال ونداعى رەيcتى كۇتكەن 180 جولاۋشى اۋەجايدا ءالى ءجۇر. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

FlyArystan ۇشاعى كەشە تۇسكى ۇشتە شىمكەنتتەن استاناعا ۇشۋى كەرەك بولعان. الايدا رەيس 20 مينۋتتان كەيىنگە شەگەرىلىپ, كەشكى بەستەر شاماسىندا ءبىر-اق قوزعالىپتى. سودان جىلجىعان اۋە كەمەسى كوككە كوتەرىلە الماي جۇرتتىڭ ءبارى داۋرىقتى دەيدى جولاۋشىلاردىڭ ءبىرى.

“ۇشاق ىشىندە ەكى جۇزگە جۋىق جولاۋشى وتىردىق. رەيستى ەكى ساعات كۇتكەنىمىز ازداي ءولىم اۋزىنان قالدىق. اۋە كەمەسىنىڭ دوڭگەلەگى ءجۇرىپ ۇشۋعا سايلانىپ بارا جاتقاندا قاتتى داۋىستار شىعىپ, ءبارىمىز ايعايعا باستىق. ايتەۋىر امانبىز. ال ۇشاق سول كۇيى كوتەرىلمەي جەرگە قوندى. سودان بەرى جولاۋشىلاردىڭ ءبارى اۋەجايدا ساندالىپ ءجۇر. قوناقۇيگە دە ورنالاستىرمادى”, – ايگۇل مىرزابەكوۆا.

جولاۋشى سوزىنشە كومپانيا وكىلدەرى ءمان-جايدى تۇسىندىرمەگەن. جولىنان قالعان جۇرتتىڭ ەندى قاشان ۇشاتىنىن دا ايتا الماي وتىر ەكەن.

“بىزگە ۇشاقتىڭ ءبىر قۇرىلعىسى ىستەن شىققانىن ايتىپ جاتىر. ونى تەك شەت ەلدە ساتادى ەكەن. ەندى سونى كۇتىپ وتىر. ول زاتتىڭ قازاقستانعا قاشان جەتكىزىلەتىنىن دە ءبىر قۇداي بىلەدى. نە اقشامىزدى قايتارمايدى, نە باسقا اۋە كومپانيالارىمەن كەلىسىپ ۇشىرمايدى”, – دەيدى جولاۋشى ايگۇل مىرزابەكوۆا.

امالى تاۋسىلعان ەلگە اۋەجايدا تۇنەۋگە تۋرا كەلىپتى. ولاردىڭ ىشىندە جانازاعا, تويعا, ناۋقاس تۋىسىنا بارا جاتقاندار از ەمەس. جانە وزبەكستان, رەسەي ازاماتتارى دا بار.

“تەحنيكالىق سەبەپكە بايلانىستى ۇشاق رەيىسى كەينگە قالدى. 5-قازان كەشكى 16:50 دە شىمكەنت-استانا باعىتى بويىنشا جولىنان قالعان جولاۋشىلاردى جونەلتەمىز. وسى ارالىقتا ولارعا بيلەت قۇنىن قايتارۋ, قوناق ءۇي جانە تەگىن تاماق كومەگى ۇيىمداستىرىلدى”, –  دەيدى اۋە كومپانياسىنىڭ وكىلى.