جاڭالىقتار
«ولىمگە دەيىن جەتكىزبەي اجىراسقان دۇرىس»: دانا نۇرجىگىت دەپۋتات ارداق نازاروۆتى سىنعا الدى
سەناتتىڭ بۇرىنعى دەپۋتاتى, تەلەجۋرناليست دانا نۇرجىگىت ءماجىلىس دەپۋتاتى ارداق نازاروۆتىڭ اجىراسۋعا قاتىستى ۇسىنىسىن سىنعا الدى, دەپ حابارلايدى qandastar.kz سايتى.
بۇعان دەيىن ءماجىلىس دەپۋتاتى ارداق نازاروۆ ەلدەگى اجىراسۋ كورسەتكىشىنە الاڭداۋشىلىق ءبىلدىرىپ, ۇكىمەت باسشىسى ولجاس بەكتەنوۆكە جولداعان دەپۋتاتتىق ساۋالىندا بىرنەشە ۇسىنىس ايتقان ەدى.
ونىڭ ىشىندە اجىراساتىندارعا جارنا تولەۋ ءتارتىبىن ەنگىزۋ, رەسمي تۇردە اجىراسقان تۇلعالار ءۇشىن تابىس سالىعىنىڭ مولشەرلەمەسىن كەزەڭ-كەزەڭىمەن ارتتىرۋ ۇسىنىستارى بار.
«بىرىنشىدەن, اجىراسۋعا ءوتىنىش بىلدىرگەن ەرلى-زايىپتىنىڭ بىرجاقتى شەشىمى نەگىزىندە سوتقا ارىز قابىلدانباس بۇرىن ارنايى مەملەكەتتىك باج نەمەسە جارنا تولەۋ ءتارتىبىن ەنگىزۋ قاجەت. بۇل تولەمنىڭ كولەمى ەداۋىر جوعارى بولۋى ءتيىس. سونىمەن قاتار رەسمي تۇردە اجىراسقان تۇلعالار ءۇشىن تابىس سالىعىنىڭ مولشەرلەمەسىن كەزەڭ-كەزەڭىمەن ارتتىرۋ قاراستىرىلسىن», — دەگەن بولاتىن ارداق نازاروۆ.
دانا نۇرجىگىتتىڭ پىكىرىنشە, دەپۋتات نازاروۆ كەلتىرگەن ەلدەگى اجىراسۋ دەڭگەيىنە قاتىستى ستاتيستيكا الاڭداتادى. الايدا «اجىراسقاندارعا سالىق سالۋ» – اقىلعا سىيمايتىن ۇسىنىس.
«نازاروۆ ايتقان ستاتيستيكا شوشىتادى. ودان دا سونىڭ سەبەبىن زەرتتەيتىن ۋاقىت كەلدى دەيىك! ءبىر دە ءبىر ادام اجىراسامىن دەپ قوسىلمايدى! ءار ءتۇرلى جاعداي, سەبەپ بار. ءتىپتى باس جارىلىپ, كوز شىقپاي تۇرعاندا, ولىمگە دەيىن جەتكىزبەي اجىراسقان دۇرىس دەر ەدىم. سانالى اتا-انا بالانى وسى جاعدايدا دا دۇرىس ءوسىرۋدىڭ جولىن تابادى. وعان تەك تاربيە, مادەنيەت, تۇيسىك جەتسە, ارينە!
دەپۋتات كەلتىرگەن دەرەكتەگى 400 مىڭ جالعىزباستى انا, 60 مىڭ جالعىزباستى اكە وتباسى ينستيتۋتىن تۇبەگەيلى الەۋمەتتىك زەرتتەۋدەن, ساراپتاۋدان وتكىزۋ كەرەك دەگەن ءسوز. سوعان قاراي «نەكە جانە وتباسى» كودەكسىن قايتا قاراۋ كەرەك دەگەن قىزىل بەلگى بۇل!
ال اجىراسقاندارعا سالىق سالۋ كەرەك دەگەنى ءتىپتى ابسۋرد! ادامدى ەركىنەن تىس قاسىڭدا ۇستاۋ, سالىققا ۇشىرايمىز دەپ اجىراسپاۋ ما بۇل?! اقىلعا سىيمايتىن ماجبۇرلەۋ عوي مىناۋ! ادام قۇقىعى قايدا قالدى سوندا, دەپۋتات مىرزا? وتباسى ينتيتۋتىن ءدال وسىنداي راديكالدى فورمادا «قورعاماساڭىز» ەتتى…», — دەپ جازدى دانا نۇرجىگىت Instagram جەلىسىندەگى پاراقشاسىندا.
