جاڭالىقتار
وليمپياداعا شاقىرمادى: ۇلتتىق قۇرامانىڭ بۇرىنعى باس باپكەرى وكپەسىن ايتتى
فوتو: olympic.kz
ۇلتتىق قۇرامانىڭ بۇرىنعى باس باپكەرى تۇرسىنعالي ەدىلوۆ «ۋاقىت كورسەتەدى» youtube-ارناسىنا بەرگەن سۇحباتىندا قازىر نەمەن اينالىسىپ جۇرگەنىن بايانداپ بەردى, دەپ حابارلايدى Massaget.kz ءتىلشىسى.
قازىر ول 8 سوتىق ءۇيىنىڭ جەرتولەسىن بالالار جاتتىعاتىن سپورت زال ەتىپ قويعان.
«8 سوتىق ءۇيىم بار. جەرتولەسىن بالالار جاتتىعاتىن سپورت زال ەتىپ قويدىم. ءبىرىنشى قاباتتا ءوزىم تۇرامىن, ەكىنشى قاباتتا بالالارعا حوستەل ەتىپ قويدىم. سپورت زالدىڭ ەدەنىن ءوزىم جۋامىن, كەرەك بولسا بالالاردى شاقىرامىن. كەشكە بالالار كەلەدى, سوعان شەيىن تاپ-تازا بولىپ تۇرۋى كەرەك. وندا تۇرعان ەشتەڭە جوق دەپ ويلايمىن. وسى ۋاقىتقا دەيىن نازارباەۆپەن دە, پرەمەر-مينيسترلەرمەن دە 2-3 رەت قۇشاقتاسىپ امانداسقانمىن. ادام دەگەن ءبارىبىر توپىراققا تۇسەدى. ادام بولىپ قالۋ ءۇشىن شۇبەرەكتى دە كورۋ كەرەك. قانداي باي بولساڭ دا, قاراپايىم بولۋ كەرەك», – دەدى ول.
تۇرسىنعالي ەدىلوۆتىڭ پاريج وليمپياداسىنا شاقىرتىلماعانىنا قىنجىلاتىنىن ايتتى.
«ماعان سپورتشىلارعا اقىل ايتۋدىڭ كەرەگى جوق. پاريج وليمپياداسىنا بارىپ, سپورتشىلارعا اقىل ايتۋ كەش. نەگە دەسەڭىز, ازياعا بارماي-اق, سپورتشىلاردى ىرىكتەپ اپارۋ كەرەك ەدى. باس باپكەردىڭ ءبىلىمى كەرەك ولارعا. جىلقى دا 12 جىل شاپپايدى عوي بىلاي قاراساڭ. بىراق پاريج وليمپياداسىنا نەگە شاقىرماعانىن بىلمەيمىن. ول جەرگە شىنىمدى ايتسام, قاتىسقىم دا كەلمەيدى. باپكەر رەتىندە ونداي دودا شاكىرتىڭ بولسا – ارمان. ال بىلاي وسەك ايتىپ, انانى-مىنانى تىڭداپ جۇرگەن ىڭعايسىز. ناعىز ترەنەر بولساڭ, قاي دوداعا بارعاندا دا – شاكىرتپەن بارۋىڭ كەرەك. شاقىرماعانىنا «اتتەگەن-اي» بار. كەزىندە جۋاستىعىمنان با, ەرماحان شاكىرتىم اتلانتادان مەدال الىپ كەلگەندە ءبىر پاتەر العانىم جوق. كەيىن سيدنەيدەن كەلدىك, 100 مىڭ دوللار الدىم, تاعى دا پاتەر المادىم. قايتا باۋىرجان وسپانوۆقا راحمەت. 2010-2015 جىلدارى باس باپكەر رەتىندە الىپ, جىلىنا 1 ملن دوللار تولەدى. قازىر ماعان وليمپيادالىق ستيپەنديا تاعايىندالعان – 370 مىڭ الامىن. بىراق ول جەتپەيدى. ءوز بالالارىمنىڭ وقۋىنا كوپ اقشا جۇمسايمىن. ال سپورتزالعا كەلگەن بالالاردان 10 مىڭ تەڭگەدەن الامىن, بەرمەسە تەگىن قاتىسا بەرەدى», – دەدى ول.
