Olımpıadaǵa shaqyrmady: Ulttyq quramanyń burynǵy bas bapkeri ókpesin aıtty

Foto: olympic.kz

Ulttyq quramanyń burynǵy bas bapkeri Tursynǵalı Edilov «Ýaqyt kórsetedi» youtube-arnasyna bergen suhbatynda qazir nemen aınalysyp júrgenin baıandap berdi, dep habarlaıdy Massaget.kz tilshisi.

Qazir ol 8 sotyq úıiniń jertólesin balalar jattyǵatyn sport zal etip qoıǵan.

«8 sotyq úıim bar. Jertólesin balalar jattyǵatyn sport zal etip qoıdym. Birinshi qabatta ózim turamyn, ekinshi qabatta balalarǵa hostel etip qoıdym. Sport zaldyń edenin ózim jýamyn, kerek bolsa balalardy shaqyramyn. Keshke balalar keledi, soǵan sheıin tap-taza bolyp turýy kerek. Onda turǵan eshteńe joq dep oılaımyn. Osy ýaqytqa deıin Nazarbaevpen de, premer-mınıstrlermen de 2-3 ret qushaqtasyp amandasqanmyn. Adam degen báribir topyraqqa túsedi. Adam bolyp qalý úshin shúberekti de kórý kerek. Qandaı baı bolsań da, qarapaıym bolý kerek», – dedi ol.

Tursynǵalı Edilovtiń Parıj Olımpıadasyna shaqyrtylmaǵanyna qynjylatynyn aıtty.

«Maǵan sportshylarǵa aqyl aıtýdyń keregi joq. Parıj Olımpıadasyna baryp, sportshylarǵa aqyl aıtý kesh. Nege deseńiz, Azııaǵa barmaı-aq, sportshylardy iriktep aparý kerek edi. Bas bapkerdiń bilimi kerek olarǵa. Jylqy da 12 jyl shappaıdy ǵoı bylaı qarasań. Biraq Parıj Olımpıadasyna nege shaqyrmaǵanyn bilmeımin. Ol jerge shynymdy aıtsam, qatysqym da kelmeıdi. Bapker retinde ondaı doda shákirtiń bolsa – arman. Al bylaı ósek aıtyp, anany-mynany tyńdap júrgen yńǵaısyz. Naǵyz trener bolsań, qaı dodaǵa barǵanda da – shákirtpen barýyń kerek. Shaqyrmaǵanyna «áttegen-aı» bar. Kezinde jýastyǵymnan ba, Ermahan shákirtim Atlantadan medal alyp kelgende bir páter alǵanym joq. Keıin Sıdneıden keldik, 100 myń dollar aldym, taǵy da páter almadym. Qaıta Baýyrjan Ospanovqa rahmet. 2010-2015 jyldary bas bapker retinde alyp, jylyna 1 mln dollar tóledi. Qazir maǵan Olımpıadalyq stıpendııa taǵaıyndalǵan – 370 myń alamyn. Biraq ol jetpeıdi. О́z balalarymnyń oqýyna kóp aqsha jumsaımyn. Al sportzalǵa kelgen balalardan 10 myń teńgeden alamyn, bermese tegin qatysa beredi», – dedi ol.