جاڭالىقتار
«ولسەم, ءبارى جەڭىلدەيتىن سياقتى»: ەنەسى مەن كۇيەۋىنەن شارشاعان تانىمال بلوگەر مەرت بولدى
فوتو: doctor.guzalya.clinic / Instagram
12 جەلتوقسان كۇنى وزبەكستاننىڭ سامارقاند قالاسىندا 23 جاستاعى بيۋتي-بلوگەر جانە كوسمەتولوگ گۋزاليا ماحماتقۇلوۆا ءوز-وزىنە قول جۇمساپ, كوپقاباتتى ءۇيدىڭ تەرەزەسىنەن سەكىرىپ كەتتى. بۇل اقپاراتتى وزبەكستان باس پروكۋراتۋراسىنىڭ ءباسپاسوز حاتشىسى حايوت شامسۋتدينوۆ راستادى. بۇل تۋرالى Nemolchi.uz جازدى, دەپ حابارلايدى qandastar.kz اقپارات پورتالى.
«قايعىلى وقيعا 12 جەلتوقسانعا قاراعان ءتۇنى بولعان. قازىرگى ۋاقىتتا سامارقاند قالالىق پروكۋراتۋراسى ءىستىڭ ءمان-جايىن انىقتاۋ ءۇشىن تەكسەرىس جۇرگىزىپ جاتىر. وقيعا ورنىندا جەدەل تەرگەۋ توبى جۇمىس ىستەپ, كۋاگەرلەردەن جاۋاپ الدى. قايتىس بولۋ سەبەبىن انىقتاۋ ءۇشىن سوت-مەديتسينالىق ساراپتاما تاعايىندالدى», — دەپ جازىلعان حابارلامادا.
Nemolchi.uz جوباسى مارقۇمنىڭ قۇربىلارىمەن جازىسقان حات-حابارلارىن جاريالادى. وندا گۋزاليا كۇيەۋى مەن ەنەسىنىڭ قورلىعى تۋرالى ايتىپ, «ولسەم, ءبارى جەڭىلدەيتىن سياقتى» دەپ جازعان. ۇيىمنىڭ حابارلاۋىنشا, گۋزاليا وتباسىلىق زورلىق-زومبىلىق قۇربانى بولۋى مۇمكىن جانە بۇل جاعداي ونىڭ ءوز-وزىنە قول جۇمساۋىنا سەبەپ بولۋى ىقتيمال.
بۇل وقيعا قوعامدا ۇلكەن رەزونانس تۋدىردى. بەلگىلى ءانشى مۋنيسا ريزاەۆا Instagram-دا: «بۇكىل وزبەكستان قايعىرىپ جاتىر! ءبىر ادام ءوز ەركىمەن سەگىزىنشى قاباتتان سەكىرۋى مۇمكىن ەمەس. ول قانداي جاعدايعا جەتكىزىلدى? الدە ونى يتەرىپ جىبەردى مە?» دەپ پىكىر ءبىلدىردى. بلوگەر Urikguli ءوزىنىڭ Instagram پاراقشاسىندا مارقۇمنىڭ جازعان حاتتارىن ءبولىسىپ, ونىڭ نەكەدە قانداي قيىندىق كورگەنى ديالوگتاردان ايقىن بايقالاتىنىن جازدى.
قازىرگى ۋاقىتتا سامارقاند پروكۋراتۋراسى مارقۇمنىڭ ءوز-وزىنە قول جۇمساۋىنا سەبەپ بولعان جاعدايلاردى مۇقيات زەرتتەپ جاتىر. بۇل وقيعا قوعامداعى وتباسىلىق زورلىق-زومبىلىق ماسەلەسىن قايتا كوتەرىپ, قۇقىق قورعاۋ ورگاندارى مەن ازاماتتىق قوعامنىڭ نازارىن اۋدارتتى.
