«ولتىرە بەر, ءوزىم جاۋاپ بەرەمىن»: مەكتەپتەگى الىمجەتتىكتەن قازا تاپقان وقۋشىنىڭ اتا-اناسى زار جىلاپ وتىر

فوتو: اشىق دەرەككوز

قىركۇيەك ايىنىڭ باسىندا الىمجەتتىك سالدارىنان تاعى ءبىر وقۋشى كوز جۇمدى, دەپ جازادى qandastar.kz inbusiness.kz سايتىنا سىلتەمە جاساپ.

«كورەمىز» باعدارلاماسىنا ادىلدىك سۇراپ مارقۇمنىڭ تۋىسقاندارى كەلدى. 9-سىنىپ وقۋشىسىن ءبىر توپ بالا جابىلىپ ۇرعان كورىنەدى.

«6 بالانىڭ اناسىمىن. نۇرجان – ەكىنشى ۇلىم. 2009 جىلى 6 قازاندا دۇنيەگە كەلدى. بالالارىم كىشكەنتاي بولعاسىن مەكتەپتەگى الىمجەتتىك دەگەندى بىلمەپپىن. نۇرجاننىڭ ولىمىنەن كەيىن اۋىل شۋلاپ كەتتى. مەكتەپتە بۋللينگ بار ەكەن. بالەنىڭ ءبارى 9-سىنىپقا كوشكەننەن كەيىن باستالىپ وتىر. ماما, 15 جاسىمدى كۇشتى ەتىپ تويلايمىز عوي» دەپ ايتىپ جۇرەتىن. وعان جەتپەدى. 10-11 سىنىپتىڭ بالالارى جابىلىپ ۇرعان. سول وقيعانى كورگەن كورشى بالا اناسىنا جۇگىرىپ كەلىپ, ء«بىرجان اعانىڭ بالاسى قۇلاپ جاتىر» دەپتى. قاتتى قورقىپ كەتكەن سياقتى. ەسكى مونشانىڭ ىشىنە جينالعان. كولىكتىڭ جارىعى شاعىلىسا بەرگەسىن, ەسكى ۇيگە اپارىپ, توبەلەستى جالعاستىرعان. 11-سىنىپ وقيتىن وقۋشى «نۇرجاندى ولتىرە بەر, ءوزىم جاۋاپ بەرەم» دەپتى. مەنىڭ بالامدا نەندەي اكەسىنىڭ قۇنى بار?! ەندى جاۋاپ بەرسىن. قاراقۇستان تەپكەننەن كەيىن, تۇرماي قالعان», – دەدى امانگۇل راۋشانوۆا.

قاندى وقيعا قوعامدى دۇرلىكتىردى. ويتكەنى قىلمىستىڭ تەرگەلۋى «بارماق باستى, كوز قىستى» بولىپ كەتكەن. مارقۇمنىڭ اپكەسى الەۋمەتتىك جەلىدە ۆيدەو جاريالاپ, قوعامدىق رەزونانس تۋدىردى.

«اۋىلىمىزدا ءبىر عانا مەكتەپ بار. مەكتەپتەگى الىمجەتتىك بۇرىننان بار. جوعارى سىنىپ وقۋشىلارى تومەنگى سىنىپتاعى بالالارعا الىمجەتتىك جاسايتىن. نۇرجاننىڭ دەنە ءبىتىمى ءىرى بولعاسىن, كوبىندە ول سىنىپتاستارىن قورعاپ جۇرەتىن. بوكس ۇيىرمەسىنە بارعان. سىنىپتاس قىزدارى: «نۇرجاندى قاتتىراق ۇرىڭدار» دەگەن ءسوزدى ايتىپ جاتىر. ودان كەيىن پاپامنىڭ قارىنداسىنىڭ قىزىنا «10 ۋدار الامىن دا, قايتىپ كەلەمىن” دەپ جازىپ جىبەرىپتى. مەن الماتىدا بولعاسىن ءىنىمنىڭ جانازاسىنا ۇلگەرمەدىم. بىراق ەرتەڭىنە ۇلگەرىپ كەلدىم», – دەدى مارقۇمنىڭ اپكەسى اياجان سىدىق.

«كورەمىز» ءتۇسىرىلىم توبى بارعاندا مارقۇمنىڭ وتباسىنا كۇدىكتى 15 بالانىڭ اتا-اناسى بارىپ, كەشىرىپ سۇراپ كەلگەن. الايدا قارا جامىلعان وتباسى كەشىرىم بەرمەيتىندەرىن ايتتى. الايدا گۇلناز ەسىمدى كەلىنشەك ۇلىنىڭ سول وقيعانى كوزىمەن كورگەنىن ايتىپ بەردى.

«مەنىڭ ۇلىم ەراسىل نۇرجانعا كومەكتەسپەك بولىپ, اۋىل دارىگەرىن شاقىرعان. 11-سىنىپتىڭ وقۋشىلارى 10 سىنىپتىڭ وقۋشىلارىن جىل سايىن وسىلاي ۇرادى ەكەن. تارتىپكە سالىپ, كەۋدەلەرىنەن ۇرادى ەكەن. تەك ءبىر ۋدار عانا بەرەدى ەكەن. مەنىڭ بالام كومەكتەسكەن. نۇرجاۋعان دەگەن بالا ەكەۋى نۇرجاندى كوتەرىپ العان. ايتىلىپ جاتقان اقپاراتتىڭ ءبارى جالعان. ەشكىم ونى جابىلىپ ۇرعان جوق, كەرىسىنشە ءبارى كومەكتەسكەن”, – دەدى اۋىل تۇرعىنى.

14 جاستاعى بالانىڭ ولىمىنە ازىرگە ءۇش بالا كۇدىكتى دەپ تانىلدى. مەكتەپ مۇعالىمدەرى جانسەن مەن نۇرجاۋعان جانە ەركەبۇلاننىڭ ءتارتىپتى وقۋشى بولعانىن ايتادى. الايدا مارقۇمنىڭ اناسى كۇدىكتىلەر جازادان قۇتىلىپ كەتە مە دەپ الاڭدايدى. كۇدىكتىنىڭ اتا-انالارى مارقۇمنىڭ وتباسىن جالعان اقپارات تاراتىپ وتىر دەپ ايىپتايدى.

«جانسەن قازىر تەرگەۋدە وتىر. 11-سىنىپتىڭ وقۋشىلارى 10-سىنىپ وقۋشىلارىنا بۇيرىق بەرگەن. ۇلىمنىڭ كىسى ولىمىنە قاتىسى جوق. 10-سىنىپ وقۋشىلارى اقىرىنداپ ۇرا باستايدى, بىراق قاتتى ۇرىڭدار دەپ ايتادى. بەس بالانىڭ بەسەۋى دە ۇرىپ شىققان. ۇلىم قاشىپ كەتە المادىم, ءبارى قاراپ تۇر» دەدى. مارقۇمنىڭ وتباسى جالعان اقپارات تاراتتى. ولار نۇرجاندى ءولتىرىپ, قاشىپ كەتكەن جوق», – دەدى جانسەننىڭ اتاسى مەن اكەسى.