Oljas Bektenov Aktıvterdi qaıtarý máseleleri jónindegi komıssııanyń otyrysyn ótkizdi

2024 jylǵy 29 naýryzda Qazaqstan Respýblıkasynyń Premer-Mınıstri
O. Bektenovtiń tóraǵalyǵymen Aktıvterdi qaıtarý máseleleri jónindegi komıssııanyń kezekti otyrysy boldy.

Komıssııa otyrysy jańartylǵan quramda ótti. Komıssııanyń jańartylǵan quramyna «Qazaqstannyń Azamattyq Alıansy» ZTB prezıdenti Baný Ǵanıqyzy Nurǵazıeva men Parlament Májilisiniń depýtaty Marat Sovetuly Báshimov kirdi.

1. Otyrys qorytyndysyna sáıkes Komıssııa kelesideı sheshimder qabyldady.
2.  Jalpy kólemi 85 mlrd teńgeden asatyn zańsyz ıemdenilgen aktıvterdi qaıtarý týraly birqatar kelisimder maquldandy.
3.  Memleketke qaıtarý josparlanyp otyrǵan aktıvterdiń qatarynda Qazaqstandaǵy jáne sheteldegi turǵyn úıler, ákimshilik ǵımarattar, aqshalaı qarajat, kompanııalardaǵy úlester, qymbat zergerlik buıymdar, 10 myń gektardan astam jer bar.
4. Sonymen qatar buryn memleketten «Zańsyz ıemdenilgen aktıvterdi memleketke qaıtarý týraly» Zań (budan ári — Zań) sýbektileriniń biriniń baqylaýyna zańsyz ótken quny 10 mlrd teńgeden astam somaǵa baǵalanatyn paıda bolýy túsiniksiz kásiporyndy aktıv retinde memleket kirisine aınaldyrý týraly sotqa talap-aryz engizý maquldandy.
5. Komıssııa sheshimimen Zań sýbektileriniń tizilimi eki jańa tulǵamen tolyqtyryldy, olarǵa qatysty Bas prokýratýranyń Aktıvterdi qaıtarý jónindegi komıteti tıisti is-sharalar qabyldaıdy.

«Memleket basshysynyń tapsyrmasy boıynsha zańsyz ıemdenilgen aktıvterdi qaıtarý jónindegi jumystar kúsheıtiledi. Bul rette bızneske qysym jasaýǵa jol berilmeıdi. Memleketke qaıtarylǵan barlyq aktıvter áleýmettik paıdaly maqsattarǵa baǵyttalatyn bolady», — dep atap ótti Oljas Bektenov.