جاڭالىقتار
ولجاس بەكتەنوۆ اقتوبە وبلىسىنىڭ بادامشا اۋىلىندا بولدى
فوتو: اشىق دەرەككوز
پرەمەر-مينيستر ولجاس بەكتەنوۆ اقتوبە وبلىسىنا جۇمىس ساپارى اياسىندا پرەزيدەنتتىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى جولداۋىن ىسكە اسىرۋ بارىسىن تەكسەردى. اتاپ ايتقاندا, بادامشا اۋىلىنداعى بىرقاتار نىسانداردى كورىپ, ۇكىمەت باسشىسى ەنەرگەتيكا سەكتورىنداعى ينفراقۇرىلىمدىق ماسەلەلەردى شەشۋ جانە ءبىلىم بەرۋ ساپاسىن جاقسارتۋ ىسىمەن تانىستى, -دەپ حابارلايدى qandastar.kz
يتاليالىق ENI ەنەرگەتيكالىق كومپانياسىنىڭ جەل ەلەكتر ستانساسىنا بارعان كەزدە پرەمەر-مينيسترگە «بادامشا», «بادامشا-2» جەس-ءنىڭ جۇمىسى تۋرالى باياندالدى. بۇل جوبالاردى ىسكە اسىرۋعا 69 ملرد تەڭگە جەكە ينۆەستيتسيا سالىندى. قازىرگى ۋاقىتتا «بادامشا-2» تۋربينالارى قازاقستانداعى ەڭ ءىرىسى سانالادى. جوبا شەڭبەرىندە جىل سايىنعى ەلەكتر ەنەرگياسىن ءوندىرۋ شامامەن 195 گۆت*ساع-تى قۇرايدى, بۇل شامامەن 37 مىڭ ءۇي شارۋاشىلىعىنىڭ ەنەرگيا تۇتىنۋ كورسەتكىشىنە تەڭ جانە CO2 قالدىقتارىن جىلىنا 172 مىڭ تونناعا قىسقارتۋعا مۇمكىندىك بەرەدى.
سونىمەن قاتار پرەمەر-مينيسترگە «قازمۇنايگاز» ۇك» اق-مەن بىرلەسكەن جوبا – ماڭعىستاۋ وبلىسىنىڭ جاڭاوزەن قالاسىنداعى گيبريدتى ەلەكتر ستانساسىنىڭ ىسكە اسىرىلۋ بارىسى تۋرالى باياندالدى.
Arm Wind وندىرىستىك قۋاتىن تەكسەرۋ بارىسىندا ولجاس بەكتەنوۆ ەكونوميكالىق تۇراقتىلىقتى ەكولوگيالىق تۇراقتىلىقپەن ۇيلەستىرۋدىڭ ماڭىزدى ەكەنىن باسا ايتتى جانە كومىرتەكسىزدەندىرۋ مەن شىعارىندى مولشەرىنىڭ تومەندىگىن ەسكەرە وتىرىپ, ەنەرگەتيكا ينفراقۇرىلىمىن ودان ءارى دامىتۋ قاجەتتىگىن اتاپ ءوتتى.
جالپى, اقتوبە وبلىسى بويىنشا تۇتىنىلاتىن ەلەكتر قۋاتىڭىڭ ورتاشا مولشەرى 947 مۆت, ونىڭ ىشىندە جەرگىلىكتى كوزدەرمەن گەنەراتسيالاۋ 496 مۆت-تى (52%) قۇرايدى. ەلەكتر ەنەرگياسىنىڭ تاپشىلىعى – 451 مۆت (48%). جۇكتەمەنىڭ ءوسۋ ديناميكاسىنا, سونداي-اق KEGOC بولجامىنا سۇيەنە وتىرىپ, 2028 جىلعا قاراي اقتوبە وبلىسىندا ەلەكتر ەنەرگياسىن تۇتىنۋ كولەمى 1 270 مۆت-تى قۇرايدى دەپ جوسپارلانىپ وتىر.
«جەل جانە كۇن ەلەكتر ستانسالارى قازاقستانداعى «جاسىل» ەنەرگيا ۇلەسىن ارتتىرۋعا باعىتتالعان جالپى جۇمىستىڭ ماڭىزدى بولىگى سانالادى, ولار بۇگىندە ەلىمىزدەگى جالپى ەلەكتر ەنەرگياسى كولەمىنىڭ 6%-ىن قامتاماسىز ەتەدى. سونىمەن قاتار ەلىمىزدەگى ەنەرگەتيكا سەكتورىنىڭ 70%-عا جۋىعى كومىر ەلەكتر ستانسالارىنا تاۋەلدى. وكىنىشكە قاراي, ەلىمىزدە جەو توزۋىنىڭ جوعارى دەڭگەيى جانە قاجەتتىلىك كولەمىنىڭ ارتۋى ەنەرگياعا تاۋەلدىلىككە الىپ كەلەدى. ءبىز مۇنى قازاقستاننىڭ سولتۇستىك وڭىرلەرى مەن رەسەيدەن ەلەكتر قۋاتىن ساتىپ الىپ وتىرعان اقتوبە وبلىسىنىڭ مىسالىنان كورىپ وتىرمىز. ۇزاقمەرزىمدى ەنەرگەتيكالىق تۇراقتىلىق ءۇشىن ەلىمىزگە ەنەرگيانىڭ ورنىقتى بالامالى كوزى قاجەت», — دەپ اتاپ ءوتتى پرەمەر-مينيستر.
وزدەرىڭىز بىلەتىندەي, 6 قازاندا قازاقستاندا اتوم ەلەكتر ستانساسىن سالۋ بويىنشا رەسپۋبليكالىق رەفەرەندۋم وتەدى. حالىق قولداعان جاعدايدا, اتوم ەنەرگەتيكاسىن دامىتۋ ەلىمىزدى تۇراقتى ءارى ەكولوگيالىق تازا ەنەرگيامەن قامتاماسىز ەتۋگە مۇمكىندىك بەرەدى.
https://t.me/KZgovernment > UKIMET: 
پرەزيدەنت تاپسىرمالارىن ورىنداۋ اياسىندا ەلىمىزدىڭ شاعىن قالالارى مەن اۋىلدارىنداعى 1 مىڭعا جۋىق مەكتەپ جاڭعىرتىلىپ, 1,5 مىڭنان استام ءپان كابينەتى جابدىقتالدى.
«ساپالى ءبىلىم تۇرعىلىقتى جەرىنە قاراماستان بارلىق تۇرعىنعا قولجەتىمدى بولۋى ءتيىس. قالا مەن اۋىل اراسىندا ءبىلىم ساپاسىنداعى الشاقتىقتى ازايتۋ – ۇكىمەت جۇمىسىنىڭ نەگىزگى باسىمدىقتارىنىڭ ءبىرى. بۇل باعىتتا ءبىز حالىقتىڭ اسىرەسە, اۋىلدارداعى ازاماتتاردىڭ الەۋمەتتىك ءال-اۋقاتى مەن دامۋىنا مۇددەلى بەلسەندى بيزنەستى تولىق قولدايمىز», — دەپ اتاپ ءوتتى ولجاس بەكتەنوۆ.
بادامشا اۋىلىندا پرەمەر-مينيستر №2 ورتا مەكتەپتى جاڭعىرتۋ ناتيجەلەرىن قاراپ شىقتى. 55 جىل بۇرىن سالىنعان وقۋ ورنى وڭىردە العاشقىلاردىڭ ءبىرى بولىپ «اۋىلدىق جەرلەردە تىرەك مەكتەپتەردىڭ الەۋەتىن دامىتۋ» رەسپۋبليكالىق جوباسىنا ەندى. زاماناۋي جيھازدار, ينتەراكتيۆتى پانەلدەر, كومپيۋتەرلەر ساتىپ الىندى, STEAM-زەرتحانا, ART-ستۋديا, تەلەستۋديا, مۋزىكا كابينەتى, Intellectum حولل, كىتاپحانا, اكت جانە سپورت زالدارى جابدىقتالعان. پرەمەر-مينيستر جاڭعىرتۋدان كەيىن قول جەتىمدى بولعان وقۋ ۇدەرىسىنىڭ جاڭا ەلەمەنتتەرىمەن تانىستى. مەكتەپ وقۋشىلارى بيوارتۇرلىلىكتى قورعاۋ ءارى ساقتاۋ, مەديتسينادا, ەكولوگيادا, قاۋىپسىزدىكتە جانە ت.ب. قولدانۋعا بولاتىن وسىمدىكتەردىڭ قاسيەتتەرىن ساراپتاۋ جانە زەرتتەۋ سالاسىنداعى ءوز جوبالارىن ۇسىندى..
• ءبىلىم بەرۋدى تۇراقتى دامىتۋ قورىنىڭ ديرەكتورى دانيار توقتارباەۆ باعدارلامانىڭ ماقساتى – قازاقستاننىڭ 169 اۋدان ورتالىعى مەن 27 مونوقالاسىنىڭ ارقايسىسىندا ءبىر تىرەك مەكتەپ اشۋ ەكەنىن ايتتى. اقتوبە وبلىسىندا بۇگىندە 12 تىرەك مەكتەپ قۇرىلدى, ولاردىڭ ارقايسىسىنا 3 شاعىن جيناقتالعان مەكتەپ بەكىتىلدى. جوبا ىسكە اسىرىلعان 3 جىل ىشىندە ەلىمىزدىڭ 134 اۋىلدىق مەكتەبىندە ماتەريالدىق بازا جاڭارتىلدى, 5 مىڭ مۇعالىم بىلىكتىلىكتى ارتتىرۋ باعدارلاماسىنا قاتىستى. نزم جەتەكشى وقىتۋشىلارى ءبىلىم بەرۋ ساپاسىنىڭ مونيتورينگىن قامتاماسىز ەتەدى, اۋىل پەداگوگتەرىن قارقىندى وقىتۋ باعدارلاماسىن جۇرگىزەدى جانە ولارعا ادىسنامالىق قولداۋ كورسەتەدى.
