Oljas Bektenov Aqtóbe oblysynyń sý tasqynynan zardap shekken aýyldarynda úı qurylysy men ınfraqurylymdy qalpyna keltirý jumysyn tekserdi

Oljas Bektenov Aqtóbe oblysynyń sý tasqynynan zardap shekken aýyldarynda úı qurylysy men ınfraqurylymdy qalpyna keltirý jumysynyń qarqynyn tekserdi

Úkimet basshysy Oljas Bektenov Aqtóbe oblysyna jumys sapary aıasynda sý tasqynynan zardap shekken Temir jáne Oıyl aýdandarynyń turǵyndary úshin salynyp jatqan jańa úıler qurylysynyń qarqynymen tanysty.

Osy jyldyń 17 shildesinde ótken Sý tasqynynan keıin turǵyn úıler men ınfraqurylymdy qalpyna keltirý máseleleri jónindegi keńeste ákimdik pen tıisti mınıstrlikke berilgen jumystardy jedeldetý, kúshter men arnaıy tehnıkany jumyldyrý boıynsha tapsyrmalardyń oryndalýy tekserildi.

Oljas Bektenov Oıyl aýdany Qaratal aýylynda salynyp jatqan úılerdi aralap kórdi, buǵan deıin olardyń jospardan 15-25 kúnge keshigýi týraly másele kóterilgen bolatyn. Eldi mekende sý tasqyny saldarynan 210 ǵımarat zaqymdandy, olardy tekserý jumystary tolyǵymen aıaqtaldy. Aýyl turǵyndary úshin qaıtalama naryqtan 60 úı satyp alyndy. Jóndeýge jatatyn 18 nysan boıynsha tıisti tólemder júrgizildi. Aýylda turýǵa jaramsyz dep tanylǵan úılerdiń ornyna 132 turǵyn úı salynyp jatyr.

Premer-Mınıstr merdiger kompanııalardyń arnaıy tehnıkamen jáne eńbek resýrstarymen qamtamasyz etilý jaǵdaıymen tanysty. Qazirgi tańda 132 úıdiń barlyǵynyń irgetasy quıylyp, 120 úıde qabyrǵa qalaý jumystary aıaqtaldy, 65 úıdiń shatyry jabyldy, al 30 úıdiń ishki qurylys-montajdaý jumystary júrgizilip jatyr. Oljas Bektenov qurylys alańdaryna qosymsha kúsh pen arnaıy tehnıka tartýdy tapsyrdy.

Premer-Mınıstr Temir aýdany Qumsaı aýylyndaǵy qurylys barysyn tekserdi. Sý tasqyny saldarynan munda 46 turǵyn úı zaqymdandy. Aýyl turǵyndary arnaıy satyp alynǵan 18 úıge qonystandy, 7 úı jóndeýden ótti. 21 jańa úıdiń qurylysy júrgizilip jatyr, qazirgi ýaqytta qabyrǵa qalaý jumystary tolyǵymen aıaqtaldy. 19 jańa ǵımarattyń tóbesi jabylsa, onyń 6-ynda ishki qurylys-montajdaý jumystary júrgizilýde.

Premer-Mınıstrge Aqtóbe oblysy ákiminiń orynbasary Asylbek Esenbaev turǵyn úıdi, ınfraqurylymdy qalpyna keltirýge jáne ótemaqy tóleýge qatysty óńirdegi qazirgi jaǵdaı týraly baıandady.

«Infraqurylym men turǵyn úıler sý tasqynynan qatty zardap shekti. Prezıdent joldar men áleýmettik nysandardy rekonstrýkııalaýdy, úılerdi qalpyna keltirýdi jáne jańadan salýdy tapsyrdy. Barlyq tapsyrmalar qysqa merzimde oryndalýy tıis. Bul úshin ákimdikterge Úkimet pen salalyq mınıstrlikterden tolyq qoldaý kórsetiledi», — dep atap ótti Oljas Bektenov.

Úkimet basshysy oblys aýmaǵynda ornalasqan gıdrotehnıkalyq qurylystardyń jaı-kúıine jeke toqtaldy. Máselen, 206 qurylymnyń 15-i qıraǵan. Sý tasqynynyń saldaryn joıý úshin qazirgi ýaqytta qajetti jumystar júrgizilýde. Gıdroqurylystar boıynsha barlyq proesterdi jedeldetý, sondaı-aq 2025 jylǵy sý tasqyny kezeńine daıyndyq maqsatynda qaýiptiń aldyn alý týraly tapsyrmalar berildi.

Sonymen qatar óńirde 58 kólik ınfraqurylymyn qalpyna keltirý josparlanyp otyr. Buzylǵan joldardy jóndeý jáne rekonstrýkııalaý úshin QR Úkimetiniń rezervinen 10,2 mlrd teńge, oblystyq rezervten 6,4 mlrd teńge bólindi. Qazirgi ýaqytta saraptama nátıjeleri kútilýde.

Barlyǵy 100 sý ótkizgish qubyrdy, 23 kópirdi, 47,2 km joldy salý jáne jóndeý josparda bar.

Anyqtama: Aqtóbe oblysynda sý tasqyny saldarynan 4087 jyljymaıtyn múlik nysany zardap shekti. Onyń 3004-in jóndeýge jáne qalpyna keltirýge ıelerine jalpy somasy shamamen 9 mlrd teńgege ótemaqy tólendi. 441 otbasy qıraǵan baspanasynyń ornyna úı men páter aldy. Jalpy, sý tasqynynan zardap shekken aqtóbelikter úshin 503 úı satyp alynady. Sonymen qatar 55 merdiger kompanııa 511 úıdiń qurylysyn júrgizýde, jumys 86%-ǵa aıaqtaldy.

4 496 otbasy jalpy somasy 1,6 mlrd teńgege 100 AEK mólsherinde áleýmettik kómek aldy. 3 861 otbasyna 1,3 mlrd teńgege (150 AEK deıin) ótemaqy tólendi. Sýǵa ketken mal úshin berilgen memlekettik kómek kólemi 1,098 mlrd teńgeni qurady. Búlingen 18 áleýmettik nysandy qalpyna keltirýge shamamen 8 mlrd teńge bólindi. Onyń ishinde 7 jańa bilim berý jáne densaýlyq saqtaý nysandaryn salý, 8 bilim berý jáne sport nysandaryna kúrdeli jóndeý jáne qalǵan 3 nysanǵa aǵymdaǵy jóndeý júrgizý qajet.