ولجاس بەكتەنوۆ اتىراۋداعى جۇمىسپەن قامتۋ شارالارىمەن تانىستى

ۇكىمەت باسشىسى ولجاس بەكتەنوۆ اتىراۋ وبلىسىنا جۇمىس ساپارى بارىسىندا APEC PetroTechnic جوعارى كوللەدجىندە ەل ەكونوميكاسى ءۇشىن جوعارى بىلىكتى ماماندار دايارلاۋ ىسىمەن تانىستى.

پرەمەر-مينيستر كوللەدجدە مۇناي-گاز ءىسى ماماندارىن وقىتاتىن زەرتحانالار مەن جاتتىعۋ پوليگوندارىن ارالادى.

كوللەدج ءبىلىم بەرۋ قىزمەتتەرىن الەمدىك وزىق تاجىريبەلەر مەن زاماناۋي جابدىقتاردى قولدانا وتىرىپ جۇزەگە اسىرادى. وقۋ پروتسەسى جاڭا ءبىلىم بەرۋ باعدارلامالارىنا باسا نازار اۋدارا وتىرىپ قۇرىلعان. ولاردىڭ ارقايسىسىنىڭ مازمۇنى حالىقارالىق ستاندارتتار مەن وزىق الەمدىك تاجىريبەنى, سونداي-اق قازاقستاندىق جانە شەتەلدىك مۇناي-گاز كومپانيالارىنىڭ تالاپتارىن ەسكەرە وتىرىپ ازىرلەنگەن. ستۋدەنتتەر بۇگىنگى تاڭدا مۇناي جانە گاز يندۋسترياسىندا نەگىزگى قۇرال بولىپ سانالاتىن اعىلشىن تىلىندە وقىپ جاتىر.

ولجاس بەكتەنوۆكە مۇندا دايارلانعان كادرلاردىڭ جوعارى سۇرانىسقا يە ەكەنى باياندالدى. ماسەلەن, بۇگىنگى تاڭدا APEC PetroTechnic تۇلەكتەرىنىڭ جۇمىسقا ورنالاسۋ كورسەتكىشى 90%-دان اسادى جانە ءۇش جىل ىشىندە ديناميكا ايتارلىقتاي جاقسارعان. ەگەر 2022 جىلى تۇلەكتەردىڭ 92,2%-ى جۇمىسقا ورنالاستىرىلعان بولسا, قازىر بۇل كورسەتكىش 97,5%-عا جەتتى. 2013 جىلدان باستاپ كوللەدج 2790-نان استام مامان دايىندادى, ولار قازىر العان ءبىلىمىن ءىرى مۇناي-گاز, مۇناي سەرۆيسى, ەنەرگەتيكا جانە IT كومپانيالاردا تابىستى قولدانىپ ءجۇر. ولاردىڭ قاتارىندا «تەڭىزشەۆرويل», North Caspian Operating Company N.V., «قازمۇنايگاز», KEGOC, Chevron, British Petroleum سەكىلدى الىپتار مەن باسقالارى بار.

بۇدان باسقا, APEC PetroTechnic تەڭىز كەن ورنىن كەلەشەك كەڭەيتۋ جوباسى قۇرىلىسىنىڭ اياقتالۋىنا بايلانىستى كەزەڭ-كەزەڭىمەن بوساتىلىپ جاتقان قىزمەتكەرلەردى قايتا وقىتۋ بويىنشا ەلىمىزدە ىسكە اسىرىلىپ جاتقان ماڭىزدى الەۋمەتتىك جوباعا قاتىسىپ وتىر. 2019 جىلدان باستاپ اككرەديتتەلگەن وقۋ ورىندارىندا 11 ەڭبەك ماماندىعى بويىنشا 2,5 مىڭنان استام ادام وقىتىلدى (ونىڭ ىشىندە جىلىوي اۋدانىنىڭ 350-گە جۋىق تۇرعىنى وقىتىلدى). ارنايى مامانداندىرىلعان كۋرستاردان وتكەننەن كەيىن 80%-ى تۇراقتى جۇمىسقا ورنالاستىرىلدى.

ەڭبەك جانە حالىقتى الەۋمەتتىك قورعاۋ مينيسترلىگى, اتىراۋ وبلىسىنىڭ اكىمدىگى مەن «تەڭىزشەۆرويل» جشس اراسىندا 2024 جىلعا ارنالعان جول كارتاسى ازىرلەنىپ, بەكىتىلدى. ونىڭ شەڭبەرىندە جىل باسىنان بەرى 94 ادام سۇرانىسقا يە ماماندىقتاردى وقۋعا كىرىستى. بيىل بارلىعى 250 ادامدى قامتۋ جوسپارلانۋدا. حالىقارالىق ۇلگىدەگى سەرتيفيكات ولارعا تابىستى جۇمىسقا ورنالاسۋعا جانە ارى قاراي ءوڭىردىڭ مۇناي-گاز كومپانيالارىندا جۇمىس ىستەۋگە مۇمكىندىك بەرەدى.

ۇكىمەت باسشىسى وتاندىق كادرلارعا سۇرانىستى ارتتىرۋدىڭ جانە شەتەلدىك جۇمىس كۇشىنە قاجەتتىلىكتى قىسقارتۋدىڭ ماڭىزىن اتاپ ءوتتى.

«وقۋ ورىندارى الەۋەتتى جۇمىس بەرۋشىلەرمەن ۇزاقمەرزىمدى سەرىكتەستىك ورناتۋى كەرەك. APEC PetroTechnic كوللەدجى – وسىنداي مەكەمەلەردىڭ ءبىرى. ءبىزدىڭ ەلىمىزدە وسى تارىزدەس مەكەمەلەر كوپ بولۋى ءتيىس, ويتكەنى ولار جالپى ءبىلىم بەرۋ جۇيەسىنىڭ دامۋىنا قۋاتتى سەرپىن بەرەدى, نارىققا قاجەتتى داعدىلارى بار ءارى الەمدىك نارىققا ەركىن شىعا الاتىن جوعارى بىلىكتى مامانداردى دايارلاۋعا جول اشادى», — دەپ اتاپ ءوتتى ولجاس بەكتەنوۆ.

قازاقستاندا 772 كوللەدج جۇمىس ىستەيدى, وندا 528 مىڭنان استام ستۋدەنت وقىپ جاتىر. بۇگىنگى تاڭدا ەلىمىزدىڭ 518 كاسىپورنى 410 كوللەدجگە قامقورلىق جاسايدى. پرەمەر-مينيستر وقۋ-اعارتۋ مينيسترلىگىنە اعىمداعى جاعدايدى تالداۋدى جانە وسىنداي مەكەمەلەردىڭ سانىن باسقا وڭىرلەردە دە كوبەيتۋ ماسەلەلەرىن قاراۋدى تاپسىردى.