ولجاس بەكتەنوۆ: ءبىز قۋاتتى اۆتوموبيل دەرجاۆاسىنا اينالۋىمىز كەرەك

پرەمەر-مينيستر ولجاس بەكتەنوۆ الماتىعا جۇمىس ساپارى اياسىندا يندۋستريالىق ايماقتاعى بىرقاتار كاسىپورىنداردى ارالادى.

ۇكىمەت باسشىسى «يرريگاتور قازاقستان» زاۋىتىندا ونىمدىلىكتى ارتتىرۋ جانە سۋدى ۇنەمدەۋ ماقساتىندا اۋىل شارۋاشىلىعى داقىلدارىن تامشىلاتىپ سۋارۋعا ارنالعان يزرايلدىك تەحنولوگيا بويىنشا قۇبىرلار ءوندىرىسىن كوردى. قاڭتار ايىندا ىسكە قوسىلعان كاسىپورىن جىلىنا 270 ميلليون مەتر ءونىم شىعارۋعا قاۋقارلى. كومپانيا ديرەكتورى مۇرات اقشالوۆ جوباعا يزرايلدىك كومپانيالاردىڭ بىرىنەن 770 ميلليوننان استام شەتەلدىك ينۆەستيتسيا تارتىلعانىن, بۇل جوبانىڭ جالپى سوماسىنىڭ ۇشتەن بىرىنە جۋىعىن قۇرايتىنىن حابارلادى.

پرەمەر-مينيستر سۋدى ۇنەمدەۋگە باعىتتالعانجوبانىڭ ماڭىزدىلىعىن اتاپ ءوتتى. مەملەكەتتىك ورگاندارعا كاسىپورىندى تولىق قۋاتقا جۇكتەۋ ماسەلەسىن پىسىقتاۋدى, سونداي-اق اۋىل شارۋاشىلىعى كاسىپورىندارىمەن ساۋدا-ساتتىقتى جولعا قويۋ بويىنشا ءوزارا ارەكەتتەسۋدە كومەك كورسەتۋدى تاپسىردى. جيىندا قازاقستانداعى تامشىلاتىپ سۋارۋ نارىعى 70 مىڭ گەكتاردى قۇرايتىنى ايتىلدى.

ولجاس بەكتەنوۆ اۆتوموبيل زاۋىتىندا بولىپ, كۇردەلى تەحنولوگيالىق وندىرىستىك پروتسەستەرگە كوشۋ جوسپارلارىمەن تانىستى. پرەمەر-مينيسترگە زاۋىتتى كەڭەيتۋ جانە جاڭعىرتۋ, ونىڭ اۋماعىن 40 مىڭ شارشى مەترگە دەيىن ۇلعايتۋ تۋرالى باياندالدى. جۇمىس ورىندارىنىڭ سانىن 1700-گە دەيىن كوبەيتۋدى كوزدەيتىن 16,4 ملرد تەڭگەلىك كەڭەيتۋ جوباسى تولىعىمەن ينۆەستور ەسەبىنەن جۇزەگە اسىرىلدى. سونىمەن قاتار, كومپانيا ءوندىرىستىڭ قۋاتتىلىعىن ارتتىرۋ, تولىق وندىرىستىك تسيكلگە كوشۋ ماقساتىندا دانەكەرلەۋ, بوياۋ جانە قۇراستىرۋ تسەحتارىن جاڭعىرتۋعا ينۆەستيتسيا سالۋدا.

«قازاقستاننىڭ اۆتوونەركاسىبىن سىنايتىندار كوپ. بىراق كىم نە دەسە دە, قازاقستاندىق اۆتوونەركاسىپ ودان ءارى دامىپ كەلەدى. دامۋعا, لوكاليزاتسيانى ارتتىرۋعا بيزنەستىڭ ءوزى دە مۇددەلى. ءبىز قۋاتتى اۆتوموبيل دەرجاۆاسىنا اينالۋىمىز كەرەك», – دەدى ولجاس بەكتەنوۆ.

كاسىپكەر نۇرلان سماعۇلوۆ وندىرىستىك كلاستەردى دامىتۋ جوسپارلارىمەن ءبولىستى. بۇل جوسپارعا جۇمىس ىستەپ تۇرعان اۆتوموبيل زاۋىتىنان باسقا, جىلىنا 90 مىڭ جولاۋشىلار ۆاگونىن شىعاراتىن (2025 جىلى ىسكە قوسۋ جوسپارلانۋدا) سالىنىپ جاتقان مۋلتيبرەندتى زاۋىت, ءۇش اۆتوموبيل بولشەكتەرىن شىعاراتىن زاۋىتتار مەن لوگيستيكالىق حاب كىرەدى. جۇمىس ورىندارىنىڭ جالپى سانى 6 مىڭ ادامنان اسادى.

ايتا كەتسەك, بۇگىن الماتىعا قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ جۇمىس ساپارىمەن كەلدى. ۇكىمەت باسشىسى قالانىڭ رەزەرۆتىك سۋ قۇبىرىن تارتۋ جۇمىستارىمەن تانىستى.