ولجاس بەكتەنوۆ بقو قورجىن اۋىلىندا بولدى

قازاقستان پرەمەر-ءمينيسترى ولجاس بەكتەنوۆ باتىس قازاقستان وبلىسىندا سۋ تاسقىنى سالدارىنان زارداپ شەككەن, شالعايدا ورنالاسقان قاراتوبە اۋدانى قورجىن اۋىلىنا باردى.

مۇندا قيراعان ۇيلەردىڭ ورنىنا ءبىر پاتەرلى 90 تۇرعىن ءۇي سالىنىپ جاتىر. ىرگەتاس قۇرىلىسى بويىنشا جۇمىس تولىعىمەن اياقتالعان. بۇگىنگى تاڭدا 34 ءۇيدىڭ قابىرعاسى تۇرعىزىلىپ, 56 ءۇيدىڭ توبەسى جابىلىپ جاتىر. نىسانداردىڭ جالپى دايىندىعى 50%-عا جەتەدى.

بۇعان دەيىن پرەمەر-ءمينيستردىڭ تاپسىرماسى بويىنشا ۋچاسكەدە جۇمىس ىستەيتىندەردىڭ سانى 30%-عا ارتقان بولاتىن. قازىرگى ۋاقىتتا نىسانداردا 288 ادام جۇمىس ىستەيدى. جۇمىس كەستەگە سايكەس جۇرگىزىلۋدە.

ولجاس بەكتەنوۆ سالىنىپ جاتقان قۇرىلىستاردىڭ ساپاسىنا ەرەكشە نازار اۋداردى.

قورجىن اۋىلىندا 6 مەردىگەر ۇيىم جۇمىس ىستەيدى. قۇرىلىس-مونتاجداۋ جانە جوندەۋ-قالپىنا كەلتىرۋ جۇمىستارىن جۇرگىزۋ كەزىندە بەكىتىلگەن قۇرىلىس نورمالارىنىڭ تالاپتارى بۇزىلعان جاعدايدا قۇرىلىس كومپانيالارى جاۋاپكەرشىلىككە تارتىلاتىنى اتاپ ءوتىلدى.

جوباعا سايكەس ۇيلەردە قالىڭدىعى 400 مم تاسپالى ىرگەتاس قاراستىرىلعان, ىرگەتاستىڭ تۇبىنەن بيىكتىگى 1500 مم بولادى. قابىرعالاردى تۇرعىزۋعا قاپتالعان سيليكاتتى قىزىل كىرپىش, كەرامزيتتى بلوك, مينەرالماقتا پليتاسى قولدانىلۋدا. سونداي-اق جوبادا ينجەنەرلىك جەلىلەردى جۇرگىزۋ كوزدەلگەن.

پرەمەر-مينيستر قۇرىلىس-جوندەۋ جۇمىسى بارىسىندا وتاندىق ءوندىرىس ماتەريالدارىن پايدالانۋدىڭ ماڭىزىن اتاپ ءوتتى.

الەۋمەتتىك ينفراقۇرىلىمعا كەلسەك: اۋىلدا قازىرگى ۋاقىتتا جوندەۋ جۇمىستارى جۇرگىزىلىپ جاتقان 400 ورىنعا ارنالعان مەكتەپ بار. سونىمەن قاتار جاڭا ۇيلەردىڭ بولاشاق تۇرعىندارى ءۇشىن بالالار الاڭى سالىنادى.

«جۇمىستا كەمشىلىكتەر بولماۋى كەرەك. مەملەكەت باسشىسى ۇيلەردىڭ ءتيىستى ساپاسىن قامتاماسىز ەتۋدى تاپسىردى. تۇرعىن ۇيلەردى بارلىق ينجەنەرلىك جەلىلەرگە بىردەن قوسۋ قاجەت. بۇل رەتتە جول ينفراقۇرىلىمى مەن الەۋمەتتىك نىسانداردى تەزىرەك قالپىنا كەلتىرۋدى قامتاماسىز ەتۋ ماڭىزدى. اۋرۋحانالار, مەكتەپتەر مەن بالاباقشالار ساپا مەن تەحنيكالىق جاراقتاندىرۋدىڭ زاماناۋي تالاپتارىن ەسكەرە وتىرىپ سالىنۋى كەرەك», — دەپ اتاپ ءوتتى ولجاس بەكتەنوۆ.

جاۋاپتى مينيسترلىكتەر مەن اكىمدىككە بىرقاتار تاپسىرما بەرىلدى.

انىقتاما: باتىس قازاقستان وبلىسىندا 775 ءۇيدىڭ قۇرىلىسى باستالدى, 2 248-ءى قايتالاما نارىقتان ساتىپ الىنادى, 1 383 نىسان جوندەلەدى. ۇيلەر مەن ساياجايلاردى جوندەۋ جۇمىستارى 82,3%-عا اياقتالدى. ءۇي سالۋ ءۇشىن 59 مەردىگەر ۇيىم انىقتالدى. ورال قالاسىندا 374 نىسان جانە اۋىلدىق جەرلەردە تاعى 401 ءۇي سالىنىپ جاتىر. جالپى دايىندىق 66% قۇرايدى.

سۋ تاسقىنىنان 12 الەۋمەتتىك مەكەمە, 53 كولىك ينفراقۇرىلىمى وبەكتىسى, 43 گيدروتەحنيكالىق قۇرىلىم زارداپ شەكتى — بارلىعى بويىنشا ءتيىستى جۇمىستار جۇرگىزىلۋدە. وڭىرلىك كوميسسيا سۋ تاسقىنىنان زارداپ شەككەندەرگە تولەمدەر بەرۋ جۇمىسىن اياقتادى. ماسەلەن, 9 994 وتباسى 100 اەك كولەمىندە وتەماقى الدى (3,7 ملرد تەڭگە), 10 222 ءوتىنىش بەرۋشىگە 150 اەك-كە دەيىن (3,7 ملرد تەڭگە) بەرىلدى, سۋعا كەتكەن مال ءۇشىن 151 ملن تەڭگە دەيىن تولەندى. بيزنەسكە كەلتىرىلگەن زالالدى وتەۋ جۇمىستارى 35%-عا ورىندالدى.