جاڭالىقتار
ولجاس بەكتەنوۆ قالدىقتارعا قاتىستى جاڭا تۇجىرىمداما ازىرلەۋدى تاپسىردى
فوتو: ۇكىمەت
قالدىقتاردىڭ بارلىق ءتۇرىن باسقارۋ تۇجىرىمداماسى 1 قىركۇيەككە دەيىن ازىرلەنەدى, – دەپ حابارلايدى qandastar.kz
ۇكىمەت وتىرىسىندا پرەمەر-مينيستر ولجاس بەكتەنوۆ ەكولوگيا جانە تابيعي رەسۋرستار مينيسترلىگىنە مۇددەلى مەملەكەتتىك ورگاندارمەن بىرلەسىپ, 1 قىركۇيەككە دەيىن قالدىقتاردى باسقارۋ پروتسەستەرىن ورتالىقتاندىرۋعا, بارلىق مۇددەلى تاراپتاردى تارتۋعا, تسيكلدىك ەكونوميكا مودەلىن قۇرۋعا باعىتتالعان قالدىقتاردىڭ بارلىق ءتۇرىن باسقارۋ تۇجىرىمداماسىن ازىرلەۋدى تاپسىردى. ونەركاسىپ جانە ەنەرگەتيكا مينيسترلىكتەرىنە وندىرىستىك قالدىقتاردى قايتا وڭدەۋ بويىنشا ونەركاسىپتىك جانە ەنەرگەتيكالىق كاسىپورىنداردى قولداۋ مەن ىنتالاندىرۋدىڭ ناقتى شارالارىن ازىرلەۋ تاپسىرىلدى. بۇل كومىر حيمياسى, قۇرىلىس ماتەريالدارىن جاساۋ, جەردە سيرەك كەزدەسەتىن مەتالداردى الۋ سالالارىندا جاڭا وندىرىستەر قۇرۋعا مۇمكىندىك بەرەتىنى اتاپ ءوتىلدى.
ەكولوگيا, ەنەرگەتيكا مينيسترلىكتەرى اكىمدىكتەرمەن بىرلەسىپ, ەكى اپتا مەرزىمدە قالدىقتاردى ەنەرگەتيكالىق كادەگە جاراتۋ سالاسىنداعى جوبالار تىزبەسىن انىقتاۋى قاجەت. الەۋەتتى ينۆەستورلار تارتۋ ءۇشىن ءساۋىر ايىندا اۋكتسيون ۇيىمداستىرۋ جوسپارى بار.
بۇگىنگى ۇكىمەت وتىرىسىندا كوممۋنالدىق جانە وندىرىستىك قالدىقتاردى قايتا وڭدەۋ جوبالارىن ىسكە اسىرۋعا ەرەكشە نازار اۋدارىلدى.
«جىل سايىن وتاندىق كاسىپورىنداردا 1 ملرد تونناعا جۋىق قالدىق جيناقتالىپ قالادى. ولاردى قايتا وڭدەۋ كولەمى شامالى, نەبارى 11%-دى قۇرايدى. ال دامىعان ەلدەردە بۇل كورسەتكىش 70-80%-عا جەتەدى. سونىمەن قاتار كەن ورىندارىنداعى ۇيىندىلەردىڭ قۇرامىندا باعالى جانە سيرەك كەزدەسەتىن مەتالل قوسپالارى بار. ولاردى الۋ ءۇشىن ءتيىمدى جاڭا تەحنولوگيالاردى قولدانۋ قاجەت. ەنەرگەتيكا كاسىپورىندارىنىڭ كۇل ۇيىندىلەرى دە كوبەيىپ بارادى. بارلىق قالدىقتاردى ءتيىمدى باسقارۋدىڭ ايقىن جۇيەسىن جاساپ, ونى تسيفرلاندىرۋ قاجەت. دۇرىس تاسىلدەردى قولدانۋ ارقىلى قالدىقتاردى جويىپ قانا قويماي, ولار وڭدەلىپ, قايتادان كادەگە جاراتىلۋعا ءتيىس», – دەپ اتاپ ءوتتى ولجاس بەكتەنوۆ.
