ولجاس بەكتەنوۆ: «قازىر باستىسى – ادام ءومىرىن ساقتاپ قالۋ جانە اپات زارداپتارىن ازايتۋ»

قر پرەمەر-ءمينيسترى ولجاس بەكتەنوۆ تجم-ءنىڭ داعدارىستىق جاعدايلاردا باسقارۋ ورتالىعىندا توتەنشە جاعدايلار ءمينيسترى شىڭعىس ءارىنوۆتىڭ ەسەبىن تىڭدادى. اۋماقتىق تجد-لار بەينەكونفەرەنتسبايلانىس رەجيمىندە قوسىلدى.

تجم دەرەكتەرى بويىنشا اكىمدىكتەرمەن بىرلەسىپ, 2,3 ملن تەكشە مەتردەن استام اعىن سۋ شىعارىلىپ, 162 مىڭنان استام قۇم تولتىرىلعان قاپشىق جانە 31 587 توننا ينەرتتى ماتەريال توسەلدى. اپاتتىق-قۇتقارۋ جۇمىستارىنا 6 349 ادام, 2 192 تەحنيكا, 689 سورعى قۇرالى جانە ت.ب. جۇمىلدىرىلدى.

«بۇل – سوڭعى جىلدارداعى ەڭ ۇلكەن سۋ تاسقىنى. قازىر باستىسى – ادام ءومىرىن ساقتاپ قالۋ جانە اپات زارداپتارىن ازايتۋ. كەيىن جەكەلەگەن لاۋازىمدى تۇلعالاردىڭ ءوز قىزمەتتىك مىندەتتەرىنە سالعىرت قاراۋىنىڭ ىقتيمال فاكتىلەرىن انىقتاۋ ماقساتىندا ەگجەي-تەگجەيلى تەكسەرۋ جۇرگىزىلەتىن بولادى.  مەن بۇل ماسەلەنى باس پروكۋرورمەن تالقىلادىم. بۇگىندە بارلىق كۇش سۋ تاسقىنىنا قارسى جۇمىستارعا جۇمىلدىرىلدى. بىرقاتار وڭىردە تج رەجيمى جاريالاندى. مەنىڭ ءبىرىنشى ورىنباسارىم رومان ۆاسيلەۆيچ سكليار ەڭ قاتتى زارداپ شەككەن وڭىرلەردە ءجۇر» , — دەدى ولجاس بەكتەنوۆ.

ۇكىمەت باسشىسى سونداي-اق سولتۇستىك وڭىرلەردە دە سۋ باسۋ قاۋپى بار ەكەنىن اتاپ ءوتتى. بۇعان دەيىن سولتۇستىك قازاقستان وبلىسىنداعى سۋ توراپتارىنىڭ جاعدايى تەكسەرىلگەن بولاتىن.
تجم باسشىلىعىنا ەلىمىزدىڭ بارلىق وڭىرىندەگى جۇمىستارعا باقىلاۋدى كۇشەيتۋ تاپسىرىلدى.