ولجاس بەكتەنوۆ كەنشىلەرگە ماراپات تابىستادى

فوتو: primeminister.kz

ۇكىمەت باسشىسى ولجاس بەكتەنوۆ ۇلىتاۋ وبلىسىنا جۇمىس ساپارى بارىسىندا ءوڭىردىڭ ونەركاسىپتىك الەۋەتىمەن تانىستى. پرەمەر-مينيستر جىلاندى كەنىشىندە بولىپ, سالا قىزمەتكەرلەرىن كەلە جاتقان كاسىبي مەرەكەلەرى – شاحتەر كۇنىمەن قۇتتىقتادى, ولارعا پرەزيدەنت اتىنان مەملەكەتتىك ماراپاتتاردى تابىس ەتتى.

پرەمەر-مينيستر ولجاس بەكتەنوۆ «قازاقمىس كورپوراتسياسى» جشس باسقارما توراعاسى نۇراحمەت نۇريەۆتىڭ كومپانيانىڭ اعىمداعى قىزمەتى, ينۆەستيتسيالىق باعدارلامالارى, دامۋ جوسپارلارى, الەۋمەتتىك جوبالارى مەن ەل ىشىندەگى قۇندىلىقتى دامىتۋ بويىنشا اتقارىلىپ جاتقان جۇمىستارى تۋرالى بايانداماسىن تىڭدادى.

بيىلعى 6 ايدا كورپوراتسيا ۇلىتاۋ وبلىسىنداعى جەتكىزۋشىلەردەن 92,7 ملرد تەڭگەگە تاۋارلار, جۇمىستار مەن قىزمەتتەر (تجق) ساتىپ الدى, وڭىردەگى وندىرۋشىلەردەن تجق ساتىپ الۋ ۇلەسى 35,5%-دى قۇرادى. جەرگىلىكتى كاسىپورىندارمەن 27,8 ملرد تەڭگەگە وفتەيك كەلىسىمشارتتار جاسالدى. «قازاقمىس» ىشكى قۇندىلىعىنىڭ جالپى ۇلەسى بيىل 71,7%-دى قۇرادى. رەسپۋبليكالىق جانە جەرگىلىكتى بيۋدجەتكە تۇسەتىن تۇسىمدەر بىرنەشە ەسەگە ءوستى.

وبلىس ونەركاسىپتىڭ وتكەن جىلعى كورسەتكىشتەرىمەن سالىستىرعاندا 7% وسىممەن ەلىمىزدە 4-ورىندا تۇر. پرەمەر-مينيستر قارقىندى تومەندەتپەۋدى تاپسىردى جانە ودان ءارى ءوسۋ ءۇشىن قولدا بار رەزەرۆتەرگە نازار اۋداردى.

«مەملەكەت باسشىسى قازاقستان حالقىنا جولداۋىندا ەلىمىزدىڭ تاۋ-كەن مەتاللۋرگيا كەشەنىن دامىتۋدىڭ ماڭىزدى ەكەنىن باسا ايتتى. جەكەمەنشىك كاسىپورىنداردى گەولوگيالىق بارلاۋعا ينۆەستيتسيا سالۋعا ىنتالاندىرۋ – باسىم مىندەتتەر قاتارىندا. وڭدەۋ ونەركاسىپتەرىن شيكىزاتپەن قامتاماسىز ەتۋ كولەمىن ۇلعايتۋ ءۇشىن بارلىق كۇش-جىگەردى جۇمساۋىمىز قاجەت. ءبىزدىڭ الدىمىزدا جاڭا تەحنولوگيالاردى ەنگىزۋ, جەرگىلىكتى قامتۋدى ارتتىرۋ جانە ەكسپورتتى دامىتۋ ارقىلى ءوندىرىستىڭ باسەكەگە قابىلەتتىلىگىن ارتتىرۋ مىندەتى تۇر. سالانى ودان ءارى دامىتۋ ءبىزدىڭ وندىرۋشىلەردىڭ جاھاندىق ترەندتەر ۇسىنىپ وتىرعان تەحنولوگيالىق وزگەرىستەرگە تەز بەيىمدەلە الۋى مەن مۇمكىندىكتى بارىنشا پايدالانا الۋىنا تىكەلەي بايلانىستى», — دەگەن ولجاس بەكتەنوۆ بۇل باعىتتا مەملەكەتتىك ورگاندار مەن بيزنەس ۇيلەسىمدى جۇمىس ىستەۋى قاجەت ەكەنىن باسا ايتتى.

جىل سايىن تامىزدىڭ سوڭعى جەكسەنبىسىندە اتاپ وتىلەتىن شاحتەر كۇنى قارساڭىندا پرەمەر-مينيستر كەنشىلەردى كاسىبي مەرەكەلەرىمەن قۇتتىقتاپ, قازاقستان پرەزيدەنتى قاسىم-جومارت توقاەۆتىڭ اتىنان مەملەكەتتىك ماراپتتار تابىس ەتتى.

«قۇرمەت» وردەنىمەن «قازاقمىس كورپوراتسياسى» جشس فيليالىنىڭ ارداگەرلەر كەڭەسىنىڭ توراعاسى داۋلەت ايقىمباەۆ ماراپاتتالدى. ءىى دارەجەلى «ەڭبەك داڭقى» وردەنى تاۋ-كەن جۇمىسشىسى الياسقار ايمانوۆقا, ءىىى دارەجەلى «ەڭبەك داڭقى» وردەنى ۋچاسكە شەبەرلەرى قانات يسابەك پەن باۋىرجان قوپاباەۆقا, «ەرەن ەڭبەگى ءۇشىن» مەدالى – بۇرعىلاۋشىنىڭ كومەكشىسى دانيار اككيكەلوۆكە, وپەراتور راۋشان قالمىرزيناعا, ۇڭگىلەۋشى بەكمۇحان قالداروۆقا, ۋچاسكە باستىعىنىڭ ورىنباسارى اقبەيسەن قايىربەكوۆكە, بۇرعىلاۋشى كەنتاي ورازبەكوۆكە, ماشينيست بەيسەن ابىلماجينگە, جەتەكشى مەحانيك بوريس پوليكارپوۆقا جانە جەزقازعان بايىتۋ فابريكالارىنىڭ ءوندىرىس ديرەكتورى ارىستانبەك ابدىقايىروۆقا تابىستالدى.