ولجاس بەكتەنوۆ «قورقىت اتا» اۋەجايىنداعى جاڭا تەرمينالدىڭ اشىلۋىنا قاتىستى

فوتو: primeminister.kz

مەملەكەت باسشىسىنىڭ تاپسىرماسى بويىنشا پرەمەر-مينيستر ولجاس بەكتەنوۆ قىزىلوردا قالاسىنداعى «قورقىت اتا» اۋەجايىندا جاڭا تەرمينالدىڭ اشىلۋىنا قاتىستى, دەپ جازادى qandastar.kz

بيزنەستىڭ الەۋمەتتىك جاۋاپكەرشىلىگى شەڭبەرىندە ىسكە اسىرىلعان جوبا ءوڭىردىڭ ساۋدا-ەكونوميكالىق, تۋريستىك الەۋەتىن دامىتۋعا جانە حالىقتىڭ تۇرمىس ساپاسىنا تىكەلەي اسەر ەتەتىن كولىك قىزمەتتەرىنىڭ قولجەتىمدىلىگىن قامتاماسىز ەتۋگە ىقپال ەتەدى. جاڭا تەرمينالدى ىسكە قوسۋ اۋە ايلاعىنىڭ وتكىزۋ مۇمكىندىگىن 7 ەسەگە – جىلىنا 300 مىڭنان 2 ملن جولاۋشىعا دەيىن ارتتىرادى. جاڭارتىلعان «قورقىت اتا» تەرمينالى حالىقارالىق اۋە كولىگى قاۋىمداستىعىنىڭ (IATA) جانە حالىقارالىق ازاماتتىق اۆياتسيا ۇيىمىنىڭ (ICAO) جوعارى ستاندارتتارىنا سايكەس كەلەدى.

«مەملەكەت باسشىسى حالىققا جولداۋىندا كولىك-لوگيستيكالىق سەكتوردى دامىتۋدى ستراتەگيالىق باسىمدىق دەپ اتادى. «قورقىت اتا» اۋەجايىنىڭ جاڭا تەرمينالى – ءوڭىر ءۇشىن عانا ەمەس, بۇكىل قازاقستان ءۇشىن ماڭىزدى ينفراقۇرىلىمدىق جوبا. ونى ىسكە اسىرۋ قوسىمشا اۋە باعىتتاردى, ونىڭ ىشىندە حالىقارالىق باعىتتاردى اشۋعا, ترانزيتتىك الەۋەتتى, جولاۋشىلار مەن جۇك اعىنىن ۇلعايتۋعا مۇمكىندىك بەرەدى, بۇل ىشكى ءتۋريزمنىڭ, ساۋدانىڭ جانە تۇتاستاي ەكونوميكانىڭ دامۋىنا وڭ اسەر ەتەدى. ۇكىمەت بيزنەستىڭ زاماناۋي, ساپالى كولىك-لوگيستيكالىق ينفراقۇرىلىمدى سالۋ جونىندەگى الەۋمەتتىك باعدارلانعان باستامالارىن تولىق قولدايتىن بولادى – بۇل ءبىزدىڭ ەلىمىزدىڭ بولاشاعىنا قوسىلعان ۇلەس»,— دەپ اتاپ ءوتتى ولجاس بەكتەنوۆ جانە جوبانىڭ ىسكە قوسىلۋىن قىسقا مەرزىمدە قامتاماسىز ەتكەندەردىڭ بارلىعىنا العىسىن ءبىلدىردى.

ۇكىمەت باسشىسى ىشكى جانە حالىقارالىق رەيستەردىڭ جولاۋشىلارىنا قىزمەت كورسەتۋ ۇدەرىسىمەن تانىستى. اۋدانى 7 500 شارشى مەتر تەرمينال تەلەسكوپيالىق باسپالداقتار, قول جۇگىن تەكسەرۋدىڭ اۆتوماتتاندىرىلعان جۇيەسى جانە باسقا دا وزىق تەحنولوگيالارمەن جابدىقتالعان. جوبانى ىسكە اسىرۋعا بولات وتەمۇراتوۆ قورى الەۋمەتتىك جاۋاپكەرشىلىك شەڭبەرىندە 20,9 ملرد تەڭگە ينۆەستيتسيا سالدى. جەرگىلىكتى بيۋدجەتتەن ينجەنەرلىك-كوممۋنيكاتسيالىق ينفراقۇرىلىمعا, اۆتوجول سالۋعا, اۋەجاي اۋماعىن اباتتاندىرۋعا جانە جارىقتاندىرۋعا 4,3 ملرد تەڭگەدەن استام قاراجات ءبولىندى.

«قورقىت اتا» اۋەجايى» اق باسقارما توراعاسى بايان اجمولداەۆ وڭىردەگى جىل سايىن ءوسىپ كەلە جاتقان جولاۋشىلار اعىنىن ەسكەرە وتىرىپ, تەرمينالدىڭ ۋاقتىلى ىسكە قوسىلعانى تۋرالى حابارلادى. ماسەلەن, بيىلعى 9 ايدا اۋەجايدا 265 مىڭ جولاۋشىعا قىزمەت كورسەتىلدى, بۇل وتكەن جىلدىڭ سايكەس كەزەڭىمەن سالىستىرعاندا 20%-عا ارتىق. اپتاسىنا 26 ىشكى رەيس جۇزەگە اسىرىلادى (17-ءسى استاناعا, 9-ى الماتىعا). وسى جىلدىڭ ماۋسىم ايىندا انتاليا (تۇركيا) قالاسىنا حالىقارالىق چارتەرلىك رەيس ىسكە قوسىلدى.

قىزىلوردا وبلىسى اكىمىنىڭ ءبىرىنشى ورىنباسارى دانيار جانالينوۆ اقتاۋ جانە اتىراۋ قالالارىندا قوسىمشا رەيستەر اشۋ, سونداي-اق «قىزىلوردا–كوكشەتاۋ», «قىزىلوردا–اقتوبە», «قىزىلوردا–قاراعاندى» سياقتى اۋە باعىتتاردى الەۋمەتتىك ماڭىزى بار رەيستەر تىزبەسىنە ەنگىزۋ جوسپارى تۋرالى باياندادى.

ءوڭىر جۇرتشىلىعى اتىنان ءسوز سويلەگەن قىزىلوردا وبلىسى ارداگەرلەر كەڭەسىنىڭ توراعاسى سەرىك دۇيسەنباەۆ جاڭارتىلعان اۋەجايدا جولاۋشىلاردىڭ بارلىق ساناتتارى ءۇشىن جاسالعان قىزمەت ساپاسى مەن قولايلى جاعدايلاردى جاقسارتۋدىڭ ماڭىزىنا توقتالدى.

«قىزىلوردا وبلىسى ارقىلى ءبىز وڭىرلەردى مەملەكەت تاراپىنان قولداۋ شارالارىنىڭ وڭ ناتيجەلەرىن كورىپ وتىرمىز. بۇگىن ءبىزدىڭ جەرلەستەرىمىزدىڭ ارمانى ورىندالدى – جاڭا اۋەجاي تەرمينالى اشىلدى. مەملەكەت باسشىسىنا وڭىرگە ەرەكشە كوڭىل بولگەنى ءۇشىن العىس بىلدىرگىم كەلەدى, بۇل بارلىق سالادا وسۋگە ىقپال ەتەدى», — دەدى سەرىك دۇيسەنباەۆ.