جاڭالىقتار
ولجاس بەكتەنوۆ وتاندىق ءوندىرىستى دامىتۋعا قاتىستى ويىن ايتتى
فوتو: primeminister.kz
ۇكىمەت باسشىسى ولجاس بەكتەنوۆ ۇلىتاۋ وبلىسىنىڭ تاۋ-كەن مەتاللۋرگيا كەشەنىنىڭ قىزمەتىمەن تانىستى. جەزقازعان بايىتۋ فابريكاسى مەن تاجىريبەلىك گيدرومەتاللۋرگيا زاۋىتىنا باردى, – دەپ حابارلايدى qandastar.kz
پرەمەر-مينيستر جەزقازعان بايىتۋ فابريكاسىنىڭ وندىرىستىك الاڭدارىن ارالاپ, ءوندىرىستى جاڭعىرتۋ جوسپارلارىن كوردى. كاسىپورىن جىل سايىن شامامەن 21,3 ملن قمت (قۇرعاق مەتريكالىق توننا) مىس كەنىن قابىلدايدى, 445 مىڭ استام قمت كونتسەنترات وندىرەدى. 2020-2024 جىلدارى جەزقازعان بايىتۋ فابريكاسىن جاڭعىرتۋعا جانە جابدىق ساتىپ الۋعا 49,5 ملرد تەڭگە ينۆەستيتسيا باعىتتالدى.
«قازاقمىس» كورپوراتسياسى فابريكانى جاڭعىرتۋدى كەزەڭ-كەزەڭىمەن جالعاستىرۋدا. №1 جانە №2 بايىتۋ فابريكالارى باس كورپۋسىنىڭ №2 بلوگىن رەكونسترۋكتسيالاۋ جۇزەگە اسىرىلۋدا. ينۆەستيتسيا سوماسى – شامامەن 20 ملرد تەڭگە, مىس الۋ كورسەتكىشتەرىنىڭ ارتۋى ەسەبىنەن كونتسەنتراتتاعى مىس ءوسىمىنىڭ 3%-عا ءوسۋى كۇتىلۋدە. بۇگىنگى تاڭدا قۇرىلىس-مونتاجداۋ جۇمىسى اياقتالىپ, ىسكە قوسۋ-رەتتەۋ كەزەڭى باستالادى.
ولجاس بەكتەنوۆ وندىرىستىك وبەكتىلەردى جاڭعىرتۋدىڭ ماڭىزىن اتاپ ءوتتى, ويتكەنى بۇل وتاندىق تاۋ-كەن مەتاللۋرگيا سالاسىنىڭ دامۋىنا ەلەۋلى سەرپىن بەرەدى.
ۇكىمەت باسشىسىنا «جەزقازعانسيرەكمەت» رمك قىزمەتى تۋرالى اقپارات بەرىلدى. 25 جىلدان استام ۋاقىت بويى كاسىپورىن گيدرومەتاللۋرگيالىق تاسىلمەن مىس ءوندىرىسىنىڭ قالدىقتارىنان سيرەك مەتالداردى الۋمەن اينالىسادى. سونىمەن قاتار عارىش جانە اۆياتسيا يندۋسترياسىنىڭ ەلەكتر جابدىقتارىن وندىرۋدە قولدانىلاتىن امموني پەررەناتىنىڭ تمد-داعى ءىرى ءوندىرۋشىسى ءارى ەكسپورتتاۋشىسى سانالادى. ونىمدەر الەمدىك نارىقتا سۇرانىسقا يە.
پرەمەر-مينيستر مەملەكەت كاسىپورىندى جاڭعىرتۋعا قولداۋ كورسەتەتىنىن اتاپ ءوتتى. بۇل رەتتە ءوندىرىستى ءارتاراپتاندىرۋ, ءونىم جەلىسىن كەڭەيتۋ ساياساتىنىڭ ماڭىزى اتاپ ءوتىلدى.
سونداي-اق جۇمىس ساپارى بارىسىندا پرەمەر-مينيستر الەمدىك دەڭگەيدە گيدرومەتاللۋرگيالىق تەحنولوگيالاردى دامىتۋ مەن وڭتايلاندىرۋدىڭ نەگىزگى بۋىنى سانالاتىن «Kazakhmys Smelting» جشس تاجىريبەلىك گيدرومەتاللۋرگيالىق زاۋىتىنا باردى. جوبانىڭ ماقساتى – ەنەرگيانى از تۇتىناتىن جانە ەكولوگيالىق قاۋىپسىز وندىرىسكە كوشۋدى قامتاماسىز ەتەتىن پيرومەتاللۋرگيادان مىس الۋ تەحنولوگياسىن گيدرومەتاللۋرگياعا قايتا باعدارلاۋ. بۇل ءادىس تومەن سورتتى شيكىزاتتى قالدىقسىز قايتا وڭدەۋگە مۇمكىندىك بەرەدى. بۇگىنگى تاڭدا ءتۇستى, سيرەك جانە باعالى مەتالداردى وندىرۋگە 3 پاتەنت بار. جاقىن ارادا گيدرومەتاللۋرگيا جوباسى تولىققاندى ءىرى زاۋىتقا اينالادى.
كورپوراتسيا 4 جىل ىشىندە عىلىمي-زەرتتەۋ قىزمەتىنە 25,4 ملرد تەڭگە ءبولدى. وندىرىستىك پروتسەستەردى تسيفرلاندىرۋ جانە اۆتوماتتاندىرۋ, ەكولوگيانى قورعاۋ شەشىمدەرى, دەنساۋلىق ساقتاۋ, گەولوگيالىق بارلاۋ, قىزمەتكەرلەردىڭ عىلىمي الەۋەتىن دامىتۋ جانە باسقا دا باعىتتار بويىنشا 242 عزتكج جوباسى ىسكە اسىرىلدى.
عىلىم جانە جوعارى ءبىلىم ءمينيسترى ساياسات نۇربەك پرەمەر-مينيسترگە وتاندىق عالىمداردىڭ ونەركاسىپ كاسىپورىندارىن, ونىڭ ىشىندە «قازاقمىستى» عىلىمي تۇرعىدا سۇيەمەلدەۋ بارىسى تۋرالى باياندادى. عىلىمي ورتا الدىنا كەن قۇرامى تومەن كونتسەنتراتتى وڭدەۋدىڭ يننوۆاتسيالىق تەحنولوگيالارىن ازىرلەۋ مىندەتى قويىلدى. بۇل ماقساتتارعا ناقتى ەكونوميكانىڭ سۇرانىسى مەن قاجەتتىلىگىن شەشۋدىڭ جاڭا تەتىكتەرىن ىزدەستىرەتىن عىلىمي-تەحنولوگيالىق حاكاتوندار باعىتتالاتىن بولادى.
«بۇل زاۋىتتىڭ اشىلۋى ونەركاسىپ پەن عىلىم ىنتىماقتاستىعىنىڭ ۇلگىسى سانالادى. عىلىمي زەرتتەۋ جۇمىستارىنا ينۆەستيتسيا سالۋعا جانە ەلىمىزدىڭ جوعارى وقۋ ورىندارىمەن بىرلەسە جۇمىس ىستەۋگە دەگەن ۇمتىلىستى باسقا كاسىپورىندار دا جالعاستىرۋى كەرەك. شيكىزاتتان مەتالل الۋدىڭ قولدانىستاعى ادىستەرىن جاقسارتۋ ءۇشىن وزىق زەرتتەۋلەردى قولدانعان ءجون. بۇل رەتتە قورشاعان ورتاعا تيگىزەتىن اسەرىن ەرەكشە باقىلاۋدا ۇستاۋ قاجەت», — دەپ اتاپ ءوتتى ولجاس بەكتەنوۆ.
