جاڭالىقتار
ولجاس بەكتەنوۆ شىمكەنت قالاسىنىڭ دامۋى جانە پرەزيدەنت جولداۋىن ىسكە اسىرۋ شارالارىمەن تانىستى
فوتو: primeminister.kz
قازاقستان پرەمەر-ءمينيسترى ولجاس بەكتەنوۆ شىمكەنتكە جۇمىس ساپارى اياسىندا مەگاپوليستىڭ قازىرگى دامۋ بارىسىمەن جانە مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى جولداۋىن ىسكە اسىرۋ شارالارىمەن تانىستى, دەپ حابارلايدى qandastar.kz.
«وڭتۇستىك» يندۋستريالدى ايماعىنىڭ اۋماعىندا ۇكىمەت باسشىسى سۋسىندارعا ارنالعان اليۋميني قالبىرلار مەن قاقپاقتار شىعاراتىن QazAlPack كاسىپورىندا بولدى. وندىرىستىك قۋاتى جىلىنا 1,2 ملرد دانا بانكا شىعارۋعا مۇمكىندىك بەرەدى. زاۋىتتا 360 ادام جۇمىس ىستەيدى.
QazAllPack جشس ديرەكتورى رۋستام سۋحوۆ اۆتوماتتاندىرىلعان ءوندىرىس پروتسەسىن تانىستىرىپ, قاپتامانىڭ بۇل ءتۇرى ءوزىنىڭ تۇتىنۋشىلىق قاسيەتتەرى بويىنشا ەڭ پروگرەسسيۆتى ءارى ەكولوگيالىق تازا ەكەنىن ايتتى. زاماناۋي ساپا ستاندارتتارى بويىنشا وندىرىلەتىن ونىمدەر ىشكى نارىقتا ساتىلىپ, وزبەكستان, قىرعىزستان, رەسەي, تاجىكستان ەلدەرىنە ەكسپورتتالادى. مەملەكەتتىك قولداۋ شارالارى مەن يا اۋماعىندا قۇرىلعان قولايلى جاعدايلاردىڭ ارقاسىندا كومپانيا 2025 جىلعا قاراي ەكىنشى وندىرىستىك جەلىنى ىسكە قوسىپ, ءونىم كولەمىن 2,3 ملرد بانكاعا دەيىن ارتتىرۋدى جوسپارلاپ وتىر.
شىمكەنت قالاسى اكىمىنىڭ ورىنباسارى ايدىن كارىموۆ شىمكەنت قالاسىنىڭ جالپى يندۋستريالدى نەگىزىن جالپى اۋدانى 1 276 گەكتار 7 ونەركاسىپ ايماعى قۇرايتىنىن, وندا بۇگىندە 293 جوبا ىسكە اسىرىلعانىن, 8,2 مىڭنان استام جاڭا جۇمىس ورنى اشىلعانىن باياندادى. «وڭتۇستىك» ينۆەستيتسيالىق پورتفەلىنە جالپى قۇنى 151,3 ملرد تەڭگەنى قۇرايتىن 70 جوبا كىرەدى.
ۇكىمەت باسشىسى سونداي-اق «پەتروقازاقستان ويل پروداكتس» مۇناي وڭدەۋ زاۋىتىندا ءتۇرلى وتىن تۇرلەرىن ءوندىرۋدىڭ تەحنولوگيالىق تىزبەگىمەن تانىستى. كاسىپورىن جىلىنا 6 ملن توننا مۇناي وڭدەيدى. شىعارىلاتىن ءونىم تۇرلەرىنىڭ قاتارىنا اۆتوموبيل بەنزيندەرى, ديزەل وتىنى, اۆياتسيالىق كەروسين, سۇيىتىلعان كومىرسۋتەك گازى, مازۋت جانە باسقا دا مۇناي ونىمدەرى جاتادى.
پرەمەر-مينيسترگە شىمكەنت ءموز وندىرىستىك قۋاتىن جىلىنا 12 ملن توننا قايتا وڭدەلگەن مۇنايعا دەيىن ۇلعايتۋ جوباسىنىڭ باستالعانى تۋرالى باياندالدى. ولجاس بەكتەنوۆ ججم نارىعىنداعى تۇراقتىلىقتى قامتاماسىز ەتۋدىڭ ماڭىزدى ەكەنىن اتاپ ءوتتى. ءوڭىر مەن ءموز باسشىلىعىنىڭ نازارى قايتا وڭدەۋ ساپاسىن ودان ءارى جاقسارتۋعا, سونداي-اق مۇناي ونىمدەرىنىڭ اعىنى مەن «سۇر ەكسپورتىنا» جول بەرمەۋگە اۋدارىلدى.
ساپار بارىسىندا پرەمەر-مينيستر جاڭا سالىنىپ جاتقان بىرقاتار الەۋمەتتىك جانە جول نىساندارى مىسالىندا شىمكەنت قالاسى باس جوسپارىنىڭ ىسكە اسىرىلۋىمەن تانىستى. وندا جىل سوڭىنا دەيىن 2,6 مىڭ پاتەرگە ارنالعان 66 تۇرعىن ءۇيدى پايدالانۋعا بەرۋ جوسپارى تۋرالى باياندالدى. بيىلعى قورىتىندى بويىنشا 1,4 ملن م2 تۇرعىن ءۇي پايدالانۋعا بەرىلەدى دەپ كۇتىلۋدە. تۇرعىن اۋدانداردا جايلى مەكتەپتەر, ەمحانالار, زاماناۋي سپورت كەشەندەرىنىڭ, سونداي-اق وقۋشىلار سارايىنىڭ قۇرىلىسى جۇرگىزىلىپ جاتىر.
پرەمەر-مينيستر 36 تۇرعىن ءۇي سالىنىپ جاتقان اقجايىق شاعىن اۋدانىنا ارالاۋ بارىسىندا قۇرىلىس ساپاسىنا جانە قازاقستاندىق تاۋارلار مەن قىزمەتتەردىڭ ۇلەسىن ودان ءارى ارتتىرۋ قاجەتتىگىنە نازار اۋداردى.
سونداي-اق ۇكىمەت باسشىسىنا قالانى اينالىپ وتەتىن ترانزيتتىك كولىكتىڭ ءوتۋىن قامتاماسىز ەتۋ ءۇشىن ۇزىندىعى 28,2 كم «قورعاس-الماتى-شىمكەنت-وزبەكستان رەسپۋبليكاسى شەكاراسى» ا-2 اۆتوجولىن رەكونسترۋكتسيالاۋ جۇمىستارى جۇرگىزىلىپ جاتقانى تۋرالى باياندالدى.
قالانىڭ ودان ءارى دامۋى, وندىرىستىك قۋاتتاردىڭ كەڭەيۋى جانە جاڭا ينفراقۇرىلىمدىق جوبالاردىڭ ىسكە قوسىلۋى تۇراقتى جانە ۇزدىكسىز ەنەرگيامەن جابدىقتاۋدى تالاپ ەتەتىنى اتاپ ءوتىلدى. بۇگىنگى تاڭدا شىمكەنتتە جەكە وندىرىلەتىن ەنەرگيانىڭ جالپى قۋاتى 120 مۆت قۇرايدى, سونىمەن بىرگە قالا 400 مۆت, سۇرانىستىڭ ەڭ جوعارى كەزەڭدەردە – 500 مۆت قۋاتتى تۇتىنادى.
ۇكىمەت باسشىسى قازىرگى ۋاقىتتا قازاقستاننىڭ ەنەرگەتيكالىق سەكتورى ەلىمىزدە وندىرىلەتىن بارلىق ەلەكتر ەنەرگياسىنىڭ شامامەن 70%-ىن قامتاماسىز ەتەتىن كومىر ەلەكتر ستانسالارىنا قاتتى تاۋەلدى ەكەنىن اتاپ ءوتتى. الايدا, بۇل مودەل كۇردەلى ماسەلەلەرگە تاپ بولۋدا, ويتكەنى جۇمىس ىستەپ تۇرعان ستانسالاردىڭ توزۋ دەڭگەيى جوعارى. بيىلعى 6 قازانداعى رەفەرەندۋمدا وڭ شەشىم قابىلدانعان جاعدايدا اتوم ەلەكتر ستانساسى وسى پروبلەمالاردىڭ شەشىمى بولا الادى. اەس تۇراقتى ەنەرگيامەن قامتاماسىز ەتە الادى. اەس قۇرىلىسى ەنەرگەتيكالىق جانە ونەركاسىپتىك ءوندىرىستى ارتاراپتاندىرۋعا ىقپال ەتەتىن بولادى, بۇل رەتتە قالدىقتاردى جيناۋ مەن ساقتاۋدان باستاپ ۋتيليزاتسيا مەن قايتا وڭدەۋگە دەيىنگى باسقارۋدىڭ بارلىق اسپەكتىلەرى ەسكەرىلەتىن بولادى.
