مەملەكەت باسشىسىنىڭ تاپسىرماسىمەن بەكتەنوۆ ءۇي سالۋ جۇمىستارىن تەكسەردى

پرەمەر-مينيستر ولجاس بەكتەنوۆ سولتۇستىك قازاقستان وبلىسىنا جۇمىس ساپارى اياسىندا سۋ تاسقىنىنىڭ سالدارىن جويۋ جانە زارداپ شەككەن تۇرعىنداردى باسپانامەن قامتاماسىز ەتۋ جۇمىستارىنىڭ العاشقى ناتيجەلەرىمەن تانىستى. جاڭا ۇيلەر سالۋ جانە بەرۋ پروتسەسى تەكسەرىلىپ, تۇرعىنداردىڭ جانە مەحانيكالاندىرىلعان بريگادالاردىڭ قاتىسۋىمەن جوندەلگەن ۇيلەر قارالدى.

ۇكىمەت باسشىسى پەتروپاۆل قالاسىنداعى بىرلىك ىقشام اۋدانىندا جاڭادان بوي كوتەرگەن ءۇيدى ارالاپ, جاڭا باسپانا كىلتىن العان وتباسى مۇشەلەرىمەن اڭگىمەلەستى. ولجاس بەكتەنوۆ اۋقىمدى سۋ تاسقىنىنىڭ سالدارىن جويۋدا تۇسىنىستىك تانىتىپ, كومەكتەسكەنى ءۇشىن تۇرعىندارعا العىسىن ءبىلدىردى. قۇرىلىس قارقىنى مەن پايدالانۋعا بەرىلگەن تۇرعىن ءۇيدىڭ ساپاسى, سونداي-اق سۋ تاسقىنىنان كەيىنگى كەزەڭدە تۇرعىنداردى قولداۋ ماسەلەسى تالقىلاندى.

«پرەزيدەنت قاسىم-جومارت توقاەۆ سۋ تاسقىنىنان زارداپ شەككەن ازاماتتاردىڭ بارلىعىنىڭ باسپاناسىن قالپىنا كەلتىرۋ ماسەلەسىن ەرەكشە باقىلاۋدا ۇستاپ وتىر. سولتۇستىك قازاقستان وبلىسى قالاداعى سۋ باسقان ىقشام اۋداندارداعى ۇيلەردىڭ قۇرىلىسىن العاشقىلاردىڭ ءبىرى بولىپ اياقتادى. ءبىزدىڭ باستى مىندەتىمىز – زارداپ شەككەندەردىڭ بارلىعىن سۋىق تۇسكەنگە دەيىن ۇيلەرىنە كوشىرۋ», — دەپ اتاپ وتكەن ولجاس بەكتەنوۆ اكىمدىككە ىرگەلەس اۋماقتى اباتتاندىرۋدى تاپسىردى.

وڭىردە بارلىعى 700 ءۇي مەن 90 ورىندىق بالاباقشا سالىنىپ جاتىر. جاقىندا عانا وتباسىلارعا قونىستانۋ ءۇشىن 53 ءۇيدىڭ كىلتى بەرىلدى. ماۋسىم ايىنىڭ سوڭىنا دەيىن تاعى 47 ءۇي بەرۋ جوسپارلانسا, 600 ءۇيدىڭ قۇرىلىسى بيىلعى تامىز ايىنىڭ سوڭىنا دەيىن اياقتالادى. بىرلىك ىقشام اۋدانى قاجەتتى ينجەنەرلىك كوممۋنيكاتسيالارمەن قامتاماسىز ەتىلگەن, توپىراقتى جولدار سالىنىپ, سەرۋەندەۋگە جانە دەمالۋعا ارنالعان ايماقتاردى اباتتاندىرۋ جۇرگىزىلىپ جاتىر.

سالىنىپ جاتقان قۇراستىرمالى-قالقاندى ۇيلەردىڭ ساپاسى مەن تەحنولوگياسىنا ەرەكشە نازار اۋدارىلدى. قازىرگى تاڭدا 100-دەن استام ۋچاسكەدە ىرگەتاس قالانىپ, كونسترۋكتسيالار قۇراستىرىلا باستادى, سونىمەن قاتار سۋمەن جابدىقتاۋ جۇمىستارى جۇرگىزىلىپ جاتىر.

سونداي-اق ساپار بارىسىندا ولجاس بەكتەنوۆ قالپىنا كەلتىرۋگە جاتاتىن ۇيلەردى جوندەۋ جۇمىستارىمەن تانىستى. سولتۇستىك قازاقستان وبلىسى – سۋ تاسقىنى سالدارىن جويۋعا مەحانيكالاندىرىلعان بريگادالار تارتىلعان جالعىز ءوڭىر. ماسەلەن, تەك ويقالا ىقشام اۋدانىندا 1 133 ءۇي سۋ باسۋ ايماعىندا بولدى, ونىڭ 309-ى جوندەۋدى قاجەت ەتەدى. جۇمىستاردى 24 مەحبريگادا كەزەڭ-كەزەڭىمەن ورىنداپ جاتىر, پەتروپاۆل بويىنشا بارلىعى 85 وسىنداي قۇراما بار. قازىرگى تاڭدا ەدەندەردى اۋىستىرۋ, قابىرعالاردى سىلاۋ, گيپس قاتىرماسىن توسەۋ جۇمىستارى جۇرگىزىلىپ جاتىر. سونىمەن قاتار ۇكىمەت باسشىسى مەنشىك يەلەرى وتەماقى تۇرىندە تولەنگەن قاراجاتقا وزدەرى جوندەۋ جۇمىستارىن جۇرگىزەتىن جەكە تۇرعىن ۇيگە باردى. ولجاس بەكتەنوۆ ۇكىمەتتىڭ نەگىزگى مىندەتى – بارلىق ەۆاكۋاتسيالانعان تۇرعىنداردى ءوز ۇيلەرىنە قايتارۋ ەكەنىن اتاپ ءوتتى, بۇگىندە 64 مىڭ ادام ءوز ۇيلەرىندە تۇرىپ جاتىر.

سۋ تاسقىنى سالدارىن جويۋ جانە جۇرگىزىلىپ جاتقان ءىس-شارالاردى تالداۋ شەڭبەرىندە پرەمەر-مينيسترگە پەتروپاۆلدا رەزەرۆتىك سۋمەن جابدىقتاۋ كوزىن سالۋ جوسپارلارى تۋرالى باياندالدى. جوبالىق قۋاتى ساعاتىنا 100 مىڭ م3 بولاتىن تەحنيكالىق قۇرىلىستى تابيعي جانە تەحنوگەندىك سيپاتتاعى تج تۋىنداعان جاعدايدا حالىقتى تازا اۋىز سۋمەن قامتاماسىز ەتۋ ءۇشىن جۇمىسى توقتاتىلعان سورعى ستانساسىنىڭ ورنىندا سالۋ كوزدەلگەن. جوبانى ىسكە اسىرۋ كوكتەمدە پەتروپاۆل تۇرعىندارى تاپ بولعان قيىندىقتاردى بولدىرماۋعا مۇمكىندىك بەرەدى. ۇكىمەت باسشىسى مۇنداي اپاتتى جاعدايدىڭ قايتالانۋىنا جول بەرىلمەيتىنىن اتاپ ءوتىپ, سقو اكىمدىگىنە قارجى مينيسترلىگىمەن بىرلەسىپ جوبانى ىسكە اسىرۋعا قاراجات ءبولۋ ماسەلەسىن پىسىقتاۋدى تاپسىردى.

انىقتاما: قازاقستاننىڭ زارداپ شەككەن وڭىرلەرىندە بۇگىندە 841 وتباسى قيراعان تۇرعىن ۇيلەرىنىڭ ورنىنا جاڭا ۇيلەر مەن پاتەرلەر الدى. 1825 جاڭا ءۇي سالىنىپ جاتىر. 4521 وتباسى تۇرعىن ءۇيدى جوندەۋگە جانە قالپىنا كەلتىرۋگە وتەماقى الدى.