ولجاس بەكتەنوۆ جۇمىس ساپارىمەن شىعىس قازاقستاندا ءجۇر

فوتو: primeminister.kz

پرەمەر-مينيستر ولجاس بەكتەنوۆ جۇمىس ساپارىمەن شىعىس قازاقستان وبلىسىنا باردى. باستى ماقسات – مەملەكەت باسشىسىنىڭ ەنەرگەتيكالىق جانە الەۋمەتتىك ينفراقۇرىلىمدى جاڭعىرتۋ, مەتاللۋرگيا جانە فارماتسەۆتيكا ونەركاسىبىن دامىتۋ, سونداي-اق كولىك-لوگيستيكا جانە تۋريزم سالاسىن دامىتۋ جونىندەگى تاپسىرمالارىنىڭ ورىندالۋىن قاداعالاۋ.

ولجاس بەكتەنوۆ ريددەر جەو-عا بارعان كەزدە جىلۋ كوزىن رەكونسترۋكتسيالاۋ قارقىنىمەن تانىستى. قازاندىق تسەحىن تەكسەرۋ كەزىندە پرەمەر-مينيسترگە №4 جانە 5 قازاندىقتارداعى اپاتتان كەيىن ورتا قىسىمدى قازاندىق اگرەگاتتارىنىڭ تپ باج جاڭعىرتىلۋى جانە ستانسانى قالپىنا كەلتىرۋ تۋرالى باياندالدى. 1956 جىلى پايدالانۋعا بەرىلگەن جەو بۇگىندە 50 مىڭعا جۋىق تۇرعىندى جىلۋمەن قامتاماسىز ەتىپ وتىر. جابدىقتىڭ اعىمداعى توزۋى 57,7%-دى قۇرايدى. ريددەر جەو «قىزىل ايماققا» جاتاتىن 19 جىلۋ كوزىنىڭ تىزىمىنە ەنگەن. مەملەكەت باسشىسى بيىلعى اقپاندا وتكەن كەڭەيتىلگەن وتىرىستا ۇكىمەت الدىنا وسىنداي نىسانداردى شۇعىل جاڭعىرتۋ جۇمىستارىن بيىل اياقتاۋ مىندەتىن قويعان بولاتىن.

2024 جىلى ەنەرگەتيكا ينفراقۇرىلىمىن رەكونسترۋكتسيالاۋعا 8,5 ملرد تەڭگە: اتاپ ايتقاندا, ۇكىمەت قاۋلىسىمەن رەزەرۆتەن شامامەن 7,4 ملرد تەڭگە, وبلىستىق بيۋدجەتتەن 1,1 ملرد تەڭگە ءبولىندى. قازاندىق اگرەگاتتارىن جوندەۋگە 5,5 ملرد تەڭگە, تاراتۋ قۇرىلعىسىن (اتق) رەكونسترۋكتسيالاۋعا 280 ملن-نان استام, 19 كم جىلۋ جەلىلەرىن جاڭعىرتۋعا تاعى 2,7 ملرد تەڭگە كولەمىندە قاراجات ءبولىندى.

ريددەر جەو-دا جىلىتۋ ماۋسىمىنىڭ باسىنا قاراي 2 قازاندىق اگرەگاتىن ىسكە قوسۋ جوسپارلانۋدا, قالعاندارى تەمپەراتۋرا كەستەسىنە سايكەس سۋىق تۇسۋىنە قاراي پايدالانۋعا بەرىلەتىن بولادى. جۇمىس اياقتالعاننان كەيىن جىلۋ كوزىنىڭ توزۋى 40%-عا دەيىن تومەندەيدى.

ۇكىمەت باسشىسىنا جىلۋ جەلىلەرىن جوندەۋ جۇمىستارى كەستەگە سايكەس جۇرگىزىلىپ جاتقانى, سونداي-اق بيىلعى تامىز ايىنىڭ سوڭىنا دەيىن اياقتالاتىنى تۋرالى باياندالدى. جالپى ۇزىندىعى 19 شاقىرىم بولاتىن 55 ۋچاسكەگە 127 ادام مەن 20 تەحنيكا جۇمىلدىرىلعان. بۇگىنگى تاڭدا ءوڭىردىڭ ەنەرگەتيكالىق ينفراقۇرىلىمىنىڭ توزۋى 78,5%-عا جەتەدى. وسى كورسەتكىش بويىنشا ريددەر دە «قىزىل ايماقتا» ورنالاسقان. جوندەۋ جۇمىستارى اياقتالعاننان كەيىن توزۋ دەڭگەيى 24,1%-عا تومەندەيدى دەپ كۇتىلۋدە.

پرەمەر-مينيستر جىلىتۋ ماۋسىمىنىڭ تۇراقتى ءوتۋى ءۇشىن ەنەرگەتيكا ينفراقۇرىلىمىن جاڭعىرتۋدى جەدەلدەتىپ اياقتاۋ قاجەتتىگىن اتاپ ءوتتى. بۇگىنگى تاڭدا ينجەنەرلىك جەلىلەر 58,4%-عا, 32 ورتالىقتاندىرىلعان قازاندىق 51%-عا, گيدروەلەكتروستانسالار بويىنشا 69%-عا جانە جەو 52%-عا دايىن.

«بۇل – حالىقتىڭ تۇرمىس-تىرشىلىگى مەن قاۋىپسىزدىگىن قامتاماسىز ەتۋ ماسەلەسى. سوندىقتان بۇل جەردە قاتاڭ مەملەكەتتىك باقىلاۋ – تالاپ پەن قاداعالاۋ قاجەت. مەملەكەت وسىندا جانە جالپى العاندا ەلىمىزدەگى ينفراقۇرىلىمدى جاڭعىرتۋعا ءوز تاراپىنان قوماقتى قاراجات سالۋدا. جۇمىس قارقىنىن ارتتىرا ءتۇسۋ كەرەك. سۋىق تۇسكەندە ۇيلەردىڭ جىلۋسىز قالۋىنا نەمەسە ونىڭ جەتكىلىكسىز بەرىلۋىنە جول بەرمەۋ كەرەك. ساپانى ساقتاي وتىرىپ, بەكىتىلگەن كەستەدەن قالىپ قويماي, الدىن الا شارالار قابىلداۋ ماڭىزدى. الداعى جىلىتۋ ماۋسىمى جۇرگىزىلگەن جاڭعىرتۋ جۇمىستارىنىڭ ساپاسى مەن تيىمدىلىگىنىڭ كورسەتكىشى بولادى», — دەپ اتاپ ءوتتى ولجاس بەكتەنوۆ.

پرەمەر-مينيستر ەنەرگەتيكا مينيسترلىگىنە وبلىس اكىمدىگىمەن بىرلەسىپ, اتالعان ماسەلەنى ەرەكشە باقىلاۋدا ۇستاۋدى تاپسىردى.

سونداي-اق جۇمىس ساپارى بارىسىندا ۇكىمەت باسشىسى ريددەر قالاسىنداعى كوپسالالى مەديتسينالىق مەكەمە قۇرىلىسىنىڭ قارقىنىن تەكسەردى. ءبىر اۋىسىمدا 500 ادام قابىلدايتىن ەمحاناسى مەن 200 توسەك-ورىندىق ستاتسيونارى بار مەديتسينا كەشەنى ريددەردىڭ ءار تۇكپىرىندە ورنالاسقان جانە 80 جىلدان استام ۋاقىت جۇمىس ىستەپ تۇرعان اۋرۋحانىنىڭ ورنىنا سالىنۋدا. اتالعان دەنساۋلىق ساقتاۋ ۇيىمى بۇگىندە قالاداعى جالعىز ۇيىم بولىپ سانالادى.

جاڭا كوپسالالى كەشەننىڭ جالپى اۋدانى – 40 مىڭ م2, نىسان 60%-عا دايىن. شاتىر توسەۋ جانە تەرەزە ورناتۋ جۇمىستارى 100%, ينجەنەرلىك جەلىلەر (جىلىتۋ, سۋ قۇبىرى, كارىز) بويىنشا 85% ورىندالدى. قازىرگى ۋاقىتتا عيماراتتىڭ ءىشى مەن قاسبەتىن ارلەۋ جۇمىستارى جۇرگىزىلىپ جاتىر.

ەمحانا وسى جىلدىڭ كۇزىندە, ستاتسيونار كەلەسى جىلى پايدالانۋعا بەرىلەدى دەپ جوسپارلانىپ وتىر. مەديتسينالىق كەشەن ساراپتامالىق دەڭگەيدەگى قۇرال-جابدىقتارمەن جاراقتاندىرىلىپ, بىلىكتى ماماندارمەن قامتاماسىز ەتىلەدى. مۇندا 500-دەن استام قىزمەتكەر جۇمىس ىستەيتىن بولادى.

پرەمەر-مينيستر ولجاس بەكتەنوۆ مەديتسينالىق ينفراقۇرىلىمدى دامىتۋ مەملەكەت باسشىسىنىڭ ەرەكشە باقىلاۋىندا ەكەنىن جانە بۇل – ۇكىمەتتىڭ باسىم مىندەتتەرىنىڭ ءبىرى ەكەنىن اتاپ ءوتتى.

«قارجىلاندىرۋ ماسەلەلەرىن شەشەتىن بولامىز. اكىمدىك قاراجاتتىڭ ساپالى ءارى ماقساتتى پايدالانىلۋىن قامتاماسىز ەتۋى ءتيىس. ۇزاققا سوزباي, جۇمىس قارقىنىن ارتتىرىپ, نىساننىڭ “ساقالدى قۇرىلىستار” تىزىمىنە ءوتىپ كەتۋىنە جول بەرمەۋ كەرەك. تۇرعىندار بارلىق مەديتسينالىق قىزمەتتەردى وسى جەردە الۋى ءۇشىن اۋرۋحانانى قاجەتتى تەحنيكامەن جابدىقتاۋ كەرەك. ءبىز حالىقتىڭ اقىلى مەديتسيناعا جۇمساعان شىعىندارىن ازايتۋعا تىرىسۋىمىز قاجەت. ازاماتتاردىڭ قاجەتتىلىكتەرىن قولدانىستاعى ءمامس جۇيەسى جانە تەگىن مەديتسينالىق كومەكتىڭ كەپىلدەندىرىلگەن كولەمى شەڭبەرىندە جابۋعا تىرىسۋ كەرەك», — دەپ اتاپ ءوتتى ولجاس بەكتەنوۆ.

انىقتاما: قازىرگى تاڭدا قازاقستاننىڭ ءبىرتۇتاس ەلەكتر جۇيەسى قالىپتى جاعدايدا جۇمىس ىستەپ تۇر. بەكىتىلگەن كەستەگە سايكەس 10 ەنەرگوبلوكتا, 55 قازاندىقتا جانە 45 تۋربينادا كۇردەلى جوندەۋ جۇمىستارى جوسپارلانعان. كەنتاۋ, ريددەر, قىزىلوردا, ەكىباستۇز, كوكشەتاۋ قالالارىنىڭ ەنەرگەتيكالىق كەشەنىن الداعى جىلۋ بەرۋ كەزەڭىنە دايىنداۋ ءۇشىن ۇكىمەت رەزەرۆىنەن 22,6 ملرد تەڭگە ءبولىندى.