ومبۋدسمان قازاقستاندىقتارعا پروبلەمالىق شاعىن نەسيەلەرمەن كومەكتەسەتىن بولادى

ميكروقارجى ومبۋدسمان ينستيتۋتى 2024 جىلدىڭ 21 جەلتوقسانىنان باستاپ جۇمىسىن باستايدى.

«ونىڭ نەگىزگى ماقساتى – ازاماتتاردىڭ قۇقىقتارىن قورعاۋدى قامتاماسىز ەتۋ جانە داۋلاردى سوتقا دەيىن رەتتەۋگە كومەكتەسۋ. ميكروقارجى ومبۋدسمانى قازاقستاندىقتاردىڭ ميكروكرەديتتەرگە بايلانىستى داۋلارىن, ونىڭ ىشىندە مەرزىمى وتكەن بەرەشەكتى رەتتەۋ ماسەلەلەرىن جانە كوللەكتورلىق اگەنتتىكتەرمەن داۋلاردى قارايتىن بولادى»,- دەپ حابارلادى ۆەدومستۆو.

ومبۋدسماننىڭ كومەگىنە ميكروقارجى ۇيىمدارىنىڭ (مقۇ) كليەنتتەرى – جەكە تۇلعالار عانا جۇگىنە الادى. ونىڭ قىزمەتتەرى تەگىن. ول سوتقا جۇگىنبەستەن جانجالداردى شەشۋگە ىقپال ەتەتىن تاۋەلسىز تورەشى رەتىندە ارەكەت ەتەدى.

«ومبۋدسماننىڭ شەشىمى قارىز الۋشى قابىلداعان جاعدايدا ميكروقارجى ۇيىمى ءۇشىن مىندەتتى تۇردە ورىندالۋى ءتيىس جانە ەگەر تاراپتار وزگە مەرزىم تۋرالى ۋاعدالاسپاسا, 30 كۇن ىشىندە ورىندالۋى ءتيىس».قارجى نارىعىن رەتتەۋ جانە دامىتۋ اگەنتتىگى

سونداي-اق, ۆەدومستۆو ميكروقارجى ومبۋدسمانىنىڭ قۇزىرەتىنە سوتقا بەرىلگەن نەمەسە زاڭدى كۇشىنە ەنگەن سوت اكتىلەرى بار ىستەر كىرمەيتىنىن اتاپ ءوتتى. مۇنىمەن قوسا, دالەلدەنبەگەن ءمان-جايلارمەن نەمەسە ءىستىڭ جاڭا ءمان-جايلارى بولماعان كەزدە قايتا جىبەرىلگەن وتىنىشتەردى قارامايدى.

2024 جىلعى 1 قازانداعى جاعداي بويىنشا قازاقستاندا 220 ميكروقارجى ۇيىمى, 215 كرەديتتىك سەرىكتەستىك جانە 497 لومبارد جۇمىس ىستەيدى.

بۇعان دەيىن 2025 جىلعا ارنالعان اكىمدىكتەردىڭ قارىز ءليميتى بەكىتىلگەنى حابارلانعان بولاتىن.